Mbomukonzya Kuzyibila Kumbungano Mpya

Ba Nicolas aba Céline bakajana buyumuyumu bwiindene. Bakazumina ciindi bakumutabi waku France nobakabaambila kulongela kumbungano mpya. Bakaamba kuti: “Kumatalikilo twakalikkomene, mpoonya mukuya kwaciindi twakatalika kubayeeya kapati balongwe besu. Tiitwakalinazyibilana kapati abakwesu alimwi abacizyi bamumbungano mpya.”a Kweelana abuyumuyumu mbomukonzya kujana, mbuti mbomukonzya kukkomana alimwi akuyaambele ciindi nomwalongela kumbungano mpya? Ncinzi bamwi ncobakonzya kucita kutegwa bagwasye? Alimwi mbuti mbomukonzya kukulwaizyigwa lwanu kumugama alimwi akukulwaizya bamwi mumbungano mpya?

NJIISYO ZYONE IZIKONZYA KUMUGWASYA KUZYIBILA

1. Amusyome Jehova. (Int. 37:5) Ba Kazumi, baku Japan, bakaisiya mbungano nkobakali kuzulilwa kwamya iili 20, ciindi balumi babo nobakacincwa busena bwakubelekela. Mbuti ‘mbobakabikka nzila zyabo mumaanza aa Jehova’? Bakaamba kuti: “Cakwiinduluka-induluka, ndakamwaambila Jehova mbondakalendeledwe alimwi ambondakalibilikide. Ciindi nondakali kucita boobo, wakali kundipa nguzu nzyondakali kuyandika.”

Mbuti mbomukonzya kumusyoma cakumaninina Jehova? Mbubwenya cisyango mbociyandika meenda alimwi abusani kutegwa cikomene, alwalo lusyomo lwesu luyandika meenda alimwi abusani bwamaambilambali kutegwa luyume. Ba Nicolas, ibaambwa kale, bakajana kuti kuzinzibala kuyeeya cikozyanyo ca Abrahamu, Jesu alimwi a Paulo, ibaalumi bakalyaaba kucita kuyanda kwa Leza mumbazu zinji, kwakabapa kusinizya kuti Jehova wakali kuyoobagwasya abalo. Ikuti lyoonse kamubala Bbaibbele, muyoogwasyigwa kuliyumya kukucinca kuli koonse alimwi muyakwiiya zintu nzyomukonzya kubelesya kukulwaizya bakwesu abacizyi mumbungano mpya.

2. Muteezyanisyi mbungano nkomwakabede ambungano mpya. (Muk. 7:10) Ba Jules bakeelede kuzyibila cilengwa cipya ciindi nobakalonga kuzwa ku Benin kuya ku United States. Bakaamba kuti: “Ndakali kulimvwa kuti ndakeelede kumwaambila kujatikizya buumi bwangu muntu uuli woonse ngondabandika anguwe ciindi cakusaanguna.” Akaambo kakuti tiibakazyibide kucita boobo, bakatalika kutantamuka bakwesu abacizyi. Ciindi nobakabazyiba kabotu bakwesu abacizyi, bakatalika kuzilanga kabotu zintu. Bakaamba kuti: “Ndakasyoma kuti kufwumbwa nkokonzya kuunka munyika, bantu balikozyenye. Balaambaula alimwi akucita zintu munzila ziindene-indene. Kubabweza bantu kweelana ambobabede ncintu ciyandika kapati.” Aboobo amweelebe kweezyanisya mbungano nkomwakabede ambungano mpya. Mucizyi umwi mupainiya wazina lya Anne-Lise, wakaamba kuti: “Tiindakalonga kutegwa ndikajane zintu nzyondakasiya. Muciindi caboobo, ndakalongela kuyakwiiya zintu zipya.”

Baalu abalo tabeelede kweezyanisya mbungano nkobakabede kumbungano mpya. Kucita zintu munzila yiindene mumbungano mpya, talili lyoonse nocaamba kuti bakwesu balilubizyide. Ncabusongo kusaanguna kuzyiba bukkale bwakumbungano mpya kamutanaamba mizeezo yanu. (Muk. 3:​1, 7b) Cili kabotu kuyiisya bakwesu kwiinda mucikozyanyo canu cibotu muciindi cakubasinikizya buya kucita zintu kweelana ambomuyeeya.—2Kor. 1:24.

3. Amujate bubi mumbungano mpya. (Flp. 1:27) Kulonga kuyandika ciindi alimwi anguzu, pele cilayandika kapati kujanika cacigamimina kumiswaangano kumbungano mpya kakucili kumatalikilo kwini. Bakwesu alimwi abacizyi mumbungano mpya inga bayanda kuti kabamubona ciindi aciindi kutegwa babe acilongwe ciyumu andinywe alimwi akuti kabamugwasya. Ba Lucinda, ibakalongela mudolopo pati ku South Africa abana babo basimbi bobilo, bakaamba kuti: “Balongwe bangu bakandikulwaizya kuyanzana abakwesu abacizyi mumbungano mpya, kubeleka abamwi mubukambausi alimwi akutola lubazu lyamiswaangano. Alimwi twakaambila bakwesu kuti, inga kababelesya ŋanda yesu kucitila miswaangano yakulibambila kuunka mumulimo wamumuunda.”

‘Kubelekela antoomwe’ mumilimo yakumuuya abakwesu abacizyi mumbungano yanu mpya kuyoomukulwaizya nywebo alimwi abamwi. Ba Anne-Lise, baambidwe kale, bakakulwaizyigwa abaalu kuti kabaunka mubukambausi abantu boonse mumbungano mpya. Ncinzi cakazwa mpawo? “Bakaamba kuti eeyi njenzila yiinda kubota kutegwa uzyibile mumbungano mpya.” Alimwi ciindi nomubeleka milimo mbuli kusalazya alimwi akulanganya Ŋanda ya Bwami, bakwesu abacizyi bayoozyiba kuti mbungano mpya lino mwiibona kuba mbungano yanu. Kuti kamutalizanduli, bakwesu abacizyi bayoofwambaana kumuzyibila alimwi muyoolimvwa kuba mumukwasyi.

4. Amujane balongwe bapya. (2Kor. 6:​11-13) Kutondezya kuti mulababikkila maano bamwi njenzila yiinda kubota yakufwambaana kuba abalongwe, aboobo kaitanatalika alimwi anoyamana miswaangano amujane ciindi cakubandika abamwi kutegwa mubazyibe. Amusolekesye kwaazyiba mazina aabo. Kuti kamwaazyi mazina aabamwi alimwi kamusikilika, bayooyanda kumuzyiba alimwi ambweni inga mwaakuba azilongwe zili kabotu ambabo.

Muciindi cakuliceengezya kutegwa bantu bamuyande, balongwe banu bapya beelede kuzyiba bwini mbomubede. Amwiiye kuli ba Lucinda ibakaamba kuti, “Tulijisi balongwe banji lino akaambo kakuti twakali kubatamba bamwi kuŋanda yesu.”

“AMUTAMBULANE”

Bamwi cilabayumina kunjila mu Ŋanda ya Bwami imuli bantu mbobatazyi. Aboobo, mbuti mbomukonzya kubapa kwaanguluka aabo ibalongela kumbungano nkomuzulilwa? Mwaapostolo Paulo wakakulwaizya kuti: “Amutambulane mbubonya Kristo mbwaakatutambula andiswe.” (Rom. 15:7) Kwiinda mukwiiya Kristo, baalu balakonzya kugwasya bapya kulimvwa kutambulwa. (Amubone kabbokesi kakuti “Ncinzi Cikonzya Kupa Kuti Kulonga Kwanu Kweende Kabotu?”) Nokuba boobo, boonse buyo mumbungano kubikkilizya abana, balakonzya kugwasya bapya kulimvwa kwaanguluka.

Kutambula bamwi, kulabikkilizya akubatamba kumaanda alimwi akubapa lugwasyo ndobayandika. Mucikozyanyo, mucizyi umwi wakabelesya ciindi cakwe ikugwasya mucizyi iwakali mweenzu kwiinda mukumutondezya mbolibede dolopo alimwi akumupandulwida mbokweendwa kubelesya mabbaasi azitima. Eeci cakamukkomanisya kapati mucizyi ooyu mweenzu alimwi cakamugwasya kuzyibila.

KUYAAMBELE KUMUUYA

Kana kakayuni inga kalawayawaya kuzwa muciteente kutegwa katalike kwiiya kuuluka. Pele katalika, mukuya kwaciindi kalacikonzya kuulukisya. Mbubwenya buyo, ciindi nomwalongela mumbungano mpya, kulibilika kulakonzya kumupa kwaalilwa kuluuka munzila yamaambilambali mumulimo wa Jehova, aboobo tamweelede kulibilika pe. Ba Nicolas aba Céline bakaamba kuti: “Kulonga kupa kwiiya zinji. Kutegwa tubazyibile bantu alimwi abusena, tuyandika kwiiya bube bupya.” Ba Jean-Charles, ibaambwa kumatalikilo bakaamba mbowakagwasyigwa mukwasyi wabo. Bakati: “Mumbungano mpya bana besu bakaba acilongwe ciyumu a Jehova. Nokwakainda myezi misyoonto buyo, mwaneesu musimbi wakatalika kupegwa zibeela mumuswaangano wamukati kansondo, mpoonya mwaneesu musankwa wakaba sikumwaya uutanabbapatizyigwa.”

Mucikozyanyo, mbuti kuti bukkale bwanu kabutamuzumizyi kuyoobelekela kubusena bubulide? Mulakonzya kupa kuti mbungano yanu yakaindi ibe mpya kulindinywe kwiinda mukubelesya twaambo tumwi ituli mucibalo eeci. Kumwi kamusyoma Jehova, amuzumanane kujata bubi mumbungano yanu kwiinda mukubeleka abamwi mumulimo wamumuunda, kupanga balongwe bapya alimwi akuyumya zilongwe ziliko kale. Ambweni mulakonzya kubelesya bupampu kugwasya bapya munzila zigaminide naa ibamwi buyo bayandika lugwasyo. Mbwaanga luyando ndoluzyibya Banakristo bakasimpe, kugwasya bamwi kulakonzya kupa kuti tube acilongwe ciyumu a Jehova. (Joh. 13:35) Mulakonzya kuba masimpe kuti “Leza ulabotelwa azipaizyo zili boobo.”—Heb. 13:16.

Nokuba kuti balajana buyumuyumu, Banakristo banji balikkomene alimwi bacikonzya kucita zinji mumbungano mpya, andinywe mulakonzya kucita oobo! Ba Anne-Lise bakaamba kuti:“Kucinca mbungano kwakandigwasya kujalula moyo.” Ba Kazumi bakaamba kuti kwiinda mukulonga, “Jehova ulakonzya kumugwasya munzila nzyomutayeeyeli.” Ino ba Jules bakalimvwa buti? Bakati: “Zilongwe nzyondakapanga zyakandigwasya kuzyibila. Lino ndilimvwa kuba cibeela cambungano mpya cakuti inga candiyumina kwiisiya mbungano eeyi.”