“Amulisalile Nobeni . . . Ngomuyanda Kubelekela”

1. Ncinzi ncotweelede kucita kutegwa katukkomene ncobeni? Nkaambo nzi? (Isaya 48:​17, 18)

TAATEESU wakujulu ulatuyanda kapati alimwi uyanda kuti katukkomene mubuumi bwesu lino akumbele. (Muk. 3:​12, 13) Wakatulenga munzila yakuti katucikonzya kucita zintu zimwi munzila iilibedelede. Nokuba boobo, tanaakatulenga kuti katulyeendelezya naa kulisalila tobeni ciluzi acitaluzi. (Muk. 8:9; Jer. 10:23) Kutegwa katukkomene ncobeni mubuumi, ulizyi kuti tweelede kumubelekela alimwi akupona kweelana azyeelelo zyakwe.—Amubale Isaya 48:​17, 18.

2. Ncinzi Saatani ncayanda kuti tusyome? Ino Jehova wacita nzi?

² Saatani uyanda kuti tusyome kuti tulakonzya kukkomana nokuba kuti katutamubelekeli Jehova alimwi akuti bantu balakonzya kuzwidilila kulyeendelezya lwabo beni. (Matl. 3:​4, 5) Kutegwa atondezye kuti Saatani mubeji, Jehova wazumizya bantu kuti balyeendelezye kwaciindi cili mbocibede. Pele twalibonena bweendelezi bwabantunsi mbobwaalilwa. Nokuba boobo, Bbaibbele lilaamba kujatikizya bamaalumi abamakaintu ibakakkomene akaambo kakubelekela Jehova. Jesu Kristo ngumwi wabo. Mucibalo eeci, tulaiya twaambo itwakapa kuti Jesu asale kubelekela Jehova. Mpoonya tulabandika kaambo ncotweelede kukomba buyo Taateesu wakujulu. Kumane, tulalanga-langa twaambo tumwi itutupa kusala kumubelekela.

TWAAMBO ITWAKAPA KUTI JESU ASALE KUBELEKELA JEHOVA

3. Ino Saatani wakasyomezya kumupa nzi Jesu? Ino Jesu wakacita buti?

³ Naakali anyika, Jesu wakatondezya kuti wakasala kubelekela Jehova. Mucikozyanyo, nokwakainda ciindi cisyoonto buyo kuzwa naakabbapatizyigwa, Saatani wakamusyomezya kumupa mami oonse aamunyika kuti wamukomba ciindi comwe buyo. Jesu wakamwiingula kuti: “Kozwa aawa Saatani! Nkaambo kulilembedwe kuti: ‘Ngu Jehova Leza wako ngoelede kukomba, alimwi ngonguwe alikke ngoelede kubelekela mulimo uusetekene.’” (Mt. 4:​8-10) Nkaambo nzi Jesu ncaakacitila boobu? Amubone twaambo tumwi.

4-5. Ntwaambo nzi tumwi itwakapa kuti Jesu asale kubelekela Jehova?

⁴ Kaambo kapati kakapa kuti Jesu asale kubelekela Jehova, nkakuti ulamuyanda. (Joh. 14:31) Kuyungizya waawo, Jesu ulamubelekela Jehova akaambo kakuti ncecintu ciluzi cakucita. (Joh. 8:​28, 29; Ciy. 4:11) Ulizyi kuti Ngokasensa kabuumi, ulasyomeka alimwi mwaabi. (Int. 33:4; 36:9; Jak. 1:17) Lyoonse Jehova wali kwaamba masimpe kuli Jesu alimwi ngowakamupa zintu zyoonse nzyajisi. (Joh. 1:14) Mukwiimpana, walo Saatani wakaleta lufwu. Amana buya mubeji, ulaliyanda alimwi ngusyaacivwulemwangu. (Joh. 8:44) Akaambo kakuzyiba twaambo ootu, Jesu kunyina naakayanda kwiiya Saatani kwiinda mukuzangila Jehova.—Flp. 2:​5-8.

⁵ Kaambo kambi kakapa Jesu kuti asale kubelekela Jehova nkakuti wakabikkilide maano kububotu ibwakali kumbele. (Heb. 12:2) Wakalizyi kuti, ikuti wazumanana kusyomeka, wakali kuyoolisalazya zina lya Bausyi akupa kuti cikonzyeke kumana mapenzi oonse aakatalisyigwa a Diabolosi.

KAAMBO NCOTWEELEDE KUMUKOMBA JEHOVA

6-7. Nkaambo nzi bantu banji mazuba aano ncobatamubelekeli Jehova? Nkaambo nzi ncotweelede kukomba buyo nguwe alikke?

⁶ Bantu banji mazuba aano, tabamubelekeli Jehova akaambo kakuti tabanabuzyiba bube bwakwe bubotu alimwi azintu zyoonse nzyaakabacitila. Oobo mbocakabede akubantu mbaakakambaukila mwaapostolo Paulo ku Atene.—Mil. 17:​19, 20, 30, 34.

⁷ Paulo wakabapandulwida bantu aaba kuti Leza wakasimpe “nguupa bantu boonse buumi, muya alimwi azintu zyoonse.” Wakayungizya kwaamba kuti: “Walo nguutupa buumi, kweenda akupona.” Akaambo kakuti Leza Mulengi, “kuzwa kumuntu omwe wakalenga bantu ibali muzisi zyoonse,” aboobo ngonguwe alikke ngotweelede kukomba.—Mil. 17:​25, 26, 28.

8. Ncinzi Jehova ncatalangilwi kucita? Amupandulule.

⁸ Mbwali Mulengi alimwi Mweendelezi wabubumbo boonse, naalikuyanda Jehova naalikubasinikizya bantu kumubelekela. Pele kunyina nacita oobo. Muciindi caboobo, watupa bumboni butondezya kuti nkwali ncobeni akuti ulamuyanda kapati umwi aumwi wesu, calo citugwasya kusala kumubelekela naa pe. Alimwi uyanda kuti bantu banji babe balongwe bakwe mane kukabe kutamani. (1Tim. 2:​3, 4) Nkakaambo kaako, watuyiisya kutegwa tukonzye kuyiisya bamwi kujatikizya makanze aakwe alimwi akubaambila zintu zibotu nzyayoobacitila bantu. (Mt. 10:​11-13; 28:​19, 20) Aboobo watupa mbungano mwalo motukonzya kumukomba alimwi akugwasyigwa abaalu.—Mil. 20:28.

9. Muunzila nzi Jehova mwatondezya luyando?

⁹ Jehova ulatondezya luyando kwiinda mukubapa zintu zibotu bantu nobaba baabo ibatayandi kusyoma kuti nkwali. Amubone kaambo aaka: Kuzwa kaindi, bantu banji bali kulisalila kucita ceeco ncobabona kuti nceciluzi naa citaluzi muciindi cakumvwida Jehova. Nokuba boobo, Jehova wazumanana kubapa nzyobayandika kutegwa bazumanane kupona akukkomana mubuumi. (Mt. 5:​44, 45; Mil. 14:​16, 17) Akaambo kaluyando lwakwe, balakonzya kuba abalongwe alimwi abanamukwasyi babayanda, kuba abana, kubeleka alimwi akubukkomanina buumi. (Int. 127:3; Muk. 2:24) Aboobo, cilalibonya kuti Taateesu wakujulu ulabayanda bantu boonse. (Kul. 34:6) Lino amuleke tubandike twaambo tumwi tutupa kuti katumubelekela Jehova alimwi ambwabalongezya aabo basala kucita boobo.

TWAAMBO TUTUPA KUSALA KUBELEKELA JEHOVA

10. (a) Nkaambo nzi kapati katupa kubelekela Jehova? (Matayo 22:37) (b) Ino mwagwasyigwa buti akaambo kakukkazika moyo kwa Jehova? (Intembauzyo 103:​13, 14)

¹⁰ Mbubwenya mbuli Jesu, kaambo kapati katupa kubelekela Jehova nduyando ndotujisi kulinguwe. (Amubale Matayo 22:37.) Ciindi notwiiya kujatikizya bube bwa Jehova, citupa kuswena kulinguwe. Mucikozyanyo, amubone Jehova mbwakkazika moyo. Nokuba kuti bana Israyeli bakamuzangila cakwiinduluka-induluka, wakabakombelezya kuti: “Ndakomba, amuleke nzila zyanu zibi.” (Jer. 18:11) Aboobo, nokuba kuti twalubizya ziindi zinji, Jehova ulatulekelela nkaambo ulizyi kuti tatulondokede, tuli bulongo buyo. (Amubale Intembauzyo 103:​13, 14.) Ciindi nomuzinzibala kuyeeya kukkazika moyo kwa Jehova abube bwakwe bumwi, sena tacimupi kuyanda kumubelekela mane kukabe kutamani?

11. Ntwaambo nzi tumbi tutupa kusala kubelekela Taateesu wakujulu?

¹¹ Tulamubelekela Jehova akaambo kakuti ncecintu ciluzi cakucita. (Mt. 4:10) Alimwi tulizyi kuti kubelekela Jehova cakusyomeka kupa kuti kucitike zintu zinji zibotu. Mucikozyanyo, tupa kuti zina lya Jehova lisalazyigwe, tutondezya kuti Diabolosi mubeji alimwi tukkomanisya moyo wa Taateesu. Kunze lyaboobo, ikuti twasala kumubelekela Jehova mazuba aano, tunoojisi bulangizi bwakunoomubelekela mane kukabe kutamani.—Joh. 17:3.

12-13. Ncinzi ncotwiiya kucakuluula caba Jane aba Pam?

¹² Nociba ciindi notucili bana, tulakonzya kwiiya kumuyanda kapati Jehova alimwi luyando oolo luyoozumanana kukomena mbotuyaabukomena. Eeci ncecakacitikila banabokwabo bobilo ba Jane aba Pam.a Ba Jane bakajisi myaka iili 11 mpoonya ba Pam bakajisi iili 10 ciindi nobakatalika kwiiya Bbaibbele. Nokuba kuti bazyali babo tiibakali kuyanda kwiiya, bakabazumizya kuti kabayanzana a Bakamboni kufwumbwa buyo kuti kabaunka kucikombelo camukwasyi kumamanino aansondo. Ba Jane bakaamba kuti: “Nzyobakandiyiisya Bakamboni kuzwa mu Bbaibbele, zyakandigwasya kutayungwa abeenzuma kubelesya misamu iikola alimwi akutalilemeka mumakani aakoonana.”

¹³ Nokwakainda myaka misyoonto buyo, boonse bobilo bakaba basikumwaya. Kumane mukuya kwaciindi, bakatalika bupainiya kumwi kabalanganya bazyali babo ibakali kuyaabucembaala. Bayeeya zyamusyule, ba Jane bakaamba kuti: “Ndakaiya kuti Jehova ulabalanganya balongwe bakwe cakusyomeka alimwi akuti ‘ulibazyi aabo bazulilwa kulinguwe,’ kweelana ambolwaamba lugwalo lwa 2 Timoteyo 2:19.” Aboobo, tacidoonekwi buya kuti Jehova ulabalanganya aabo basala kumubelekela akaambo kakuti balamuyanda.

14. Mbuti mbotukonzya kumwiiminina Jehova? (Amubone azifwanikiso.)

¹⁴ Tuyanda kuti bamwi bazyibe kasimpe kajatikizya Jehova. Amweezeezye bukkale oobu: Mulijisi mulongwe ngomumvwana kapati, uulaaluzyalo, mwaabi alimwi uulekelela. Lino buzuba bumwi, mwamvwa muntu umwi kaamba mulongwe wanu kuti ngusilunya alimwi tasyomeki. Ino inga mwacita buti? Mulakonzya kumwiiminina, tee kayi? Mbubwenya buyo, ciindi bantu nobaamba zintu zibi kujatikizya Jehova, tulamwiiminina kwiinda mukwaamba makani aamasimpe kujatikizya nguwe. (Int. 34:1; Is. 43:10) Aboobo ciindi notumwiiminina Jehova kwiinda muzintu nzyotwaamba akucita, tutondezya kuti tulayanda kumubelekela camoyo woonse.

15. Ino Paulo wakagwasyigwa buti akaambo kakucinca mbaakani zyakwe? (Bafilipi 3:​7, 8)

¹⁵ Tulalisungula kucinca mbaakani zyesu mubuumi kutegwa tumubelekele Jehova munzila njakkomanina naa kutegwa tucite zinji mumulimo wakwe. Mucikozyanyo, mwaapostolo Paulo wakasiya cuuno cakwe caatala mubukombi bwaci Juda, kutegwa abe sikwiiya wa Kristo akubelekela Jehova. (Gal. 1:14) Akaambo kaceeci, wakapona buumi bulaampindu akuba acoolwe cakuyoolela a Kristo kujulu. Kunyina naakausa akaambo kakusala kubelekela Jehova, andiswe tatukausi akaambo kakucita boobo.—Amubale Bafilipi 3:​7, 8.

16. Ncinzi ncotwiiya kucakuluula caba Julia? (Amubone azifwanikiso.)

¹⁶ Ikuti kubelekela Jehova caba cintu ciyandika kapati mubuumi bwesu, tunoopona buumi bukkomanisya lino alimwi akumbele. Amubone cakuluula camucizyi wazina lya Julia. Katanaiya kasimpe, wakali kwiimba mukkwaya yacikombelo cabo kuzwa kubwana. Wakali kwiimba kabotu cakuti mwiimbi umwi uucibwene wakamubona akutalika kumuyiisya kutegwa awalo abe mwiimbi uucibwene. Tiilyakalampa, mucizyi Julia wakaba ampuwo kapati cakuti wakatalika kwiimba mumasena aakazyibidwe kapati. Ciindi naakali kucikolo cakwiiya kwiimba, sicikolonyina umwi wakatalika kubandika anguwe kujatikizya Leza akumwaambila kuti Leza ulijisi zina lyakuti Jehova. Aboobo, wakatalika kwiiya Bbaibbele ziindi zyobilo ansondo. Mukuya kwaciindi, wakasala kubelesya buumi bwakwe kubelekela Jehova muciindi cakusala kuba mwiimbi. Kwaamba masimpe, cakusala eeco tiicakali cuubauba. Wakaamba kuti: “Bantu banji bakandaambila kuti tiicakali camaano kusala kucileka kwiimba akutalika kubelekela Jehova, pele mebo ndakali kuyanda kubelesya buumi bwangu kubelekela Jehova cakumaninina.” Ino mucizyi Julia ulimvwa buti mazuba aano kujatikizya cakusala eeci ncaakapanga myaka iili 30 yainda? Wakaamba kuti: “Ndilijisi luumuno lwamumizeezo alimwi ndilisinizyide kuti kumbele Jehova uyoondipa zyoonse nzyouyanda moyo wangu.”—Int. 145:16.

AMUZUMANANE KUBELEKELA JEHOVA

17. (a) Ncinzi ncobeelede kucita aabo batanatalika kumubelekela Jehova? Nkaambo nzi? (b) Ino aabo ibakasala kale kumubelekela Leza beelede kuzyiba nzi?

¹⁷ Tupona kwini kumamanino aabweende bwazintu. Mwaapostolo Paulo wakalemba kuti: “Nkaambo kusyeede buyo ‘kaindi kaniini,’ eelyo ‘ooyo uuboola ulasika alimwi takoomuka pe.’” (Heb. 10:37) Ino eeci caamba nzi? Caamba kuti, ciindi casyaala kuli baabo batanatalika kumubelekela Jehova caceya, aboobo beelede kubweza ntaamu cakufwambaana. (1Kor. 7:29) Ikuti twakasala kale kubelekela Leza, tweelede kuzyiba kuti nokuba kuti twajana mapenzi, anooli buyo “akaindi kaniini.”

18. Ino Jesu a Jehova bayanda kuti tucite nzi?

¹⁸ Jesu wakakulwaizya bantu kuti babe basikwiiya bakwe akuzumanana kumutobela. (Mt. 16:24) Aboobo, ikuti naa twali kumubelekela Jehova kwamyaka minji, aabe makanze eesu aakuzumanana kucita boobo. Nkaambo uyanda kuti tuzumanane kupona kweelana akusala kwesu kwakuti tumubelekele. Masimpe kuti, talili lyoonse nocili cuubauba kucita boobo, pele tweelede kubeleka canguzu. Alimwi tulakonzya kukkomana azilongezyo ziboola akaambo kakumubelekela.—Int. 35:27.

19. Ncinzi ncotwiiya kucakuluula ca Gene?

¹⁹ Bamwi balimvwa kuti kubelekela Jehova cilaminya. Ikuti naa muli mukubusi, sena mulimvwa kuti kubelekela Jehova inga kwamupa kwiindwa zintu zimwi? Mukwesu umwi mukubusi wazina lya Gene wakaamba kuti: “Ndakali kulimvwa kuti kuba umwi wa Bakamboni ba Jehova, kwakali kundipa kwiindwa zintu zimwi zikkomanisya. Cakali kulibonya mbuli kuti beenzuma balo bakali kulikondelezya mumapobwe, kusyabana akusobana mavidiyo aankondo kakuli mebo ndakeelede kuba kumiswaangano amumulimo wamumuunda.” Ino kuyeeya kuli boobu kwakamujatikizya buti Gene? Wakaamba kuti: “Ndakatalika kucita zintu zimwi zibyaabi nzyobakali kucita beenzuma. Pele eeci tiicakandiletela lukkomano lwini-lwini. Aboobo, ndakatalika kuzinzibala kuyeeya kasimpe kamu Bbaibbele nkondakalekede kubikkila maano akutalika kubelekela Jehova camoyo woonse. Kuzwa leelyo, ndabona kuti Jehova wali kuyiingula mipailo yangu yoonse.”

20. Ino makanze nzi ngotweelede kuba angawo?

²⁰ Sintembauzyo wakaimbila Jehova kuti: “Ulikkomene muntu ngosala akuswenya kulinduwe, kuti akkale mumabuwa aako.” (Int. 65:4) Aboobo atube amakanze ngaakajisi Joshua naakaamba kuti: “Mebo amukwasyi wangu tunoobelekela Jehova.”—Jos. 24:15.