Mutalubi Kuti Jehova ngu “Leza Muumi”

1. Ncinzi cigwasya bantu ba Jehova kuzumanana kumukomba nokuba kuti balajana mapenzi?

BBAIBBELE lyaamba kuti tupona ‘muziindi zikatazya ncobeni.’ (2Tim. 3:1) Kunze aamapenzi ngobajana bantu boonse mubweende obuno bwazintu, bantu ba Jehova balakazyigwa alimwi akupenzyegwa. Ncinzi citugwasya kukomba Jehova nokuba kuti tulajana mapenzi aali boobu? Cintu cimwi catugwasya nkuzyiba kuti Jehova “ngo Leza muumi.”—Jer. 10:10; 2Tim. 1:12.

2. Muunzila nzi Jehova mwali Leza muumi?

² Jehova ulaabwene mapenzi oonse ngotujana alimwi lyoonse ulilibambilide kutugwasya. (2Mak. 16:9; Int. 23:4) Kumubona kuti ngu Leza muumi kuyootugwasya kuzwidilila ciindi notwajana mapenzi. Amubone makani aaya mbwaakaba aamasimpe kujatikizya Davida.

3. Ncinzi ncaakali kupandulula Davida naakaamba kuti “Jehova muumi”?

³ Davida wakalimuzyi Jehova alimwi wakali kumusyoma. Ciindi Mwami Saulo alimwi abamwi nobakali kuyanda kumujaya, Davida wakapaila kuli Jehova kutegwa amugwasye. (Int. 18:6) Leza naakawiingula mupailo wakwe kwiinda mukumuvwuna, Davida wakaamba kuti: “Jehova muumi!” (Int. 18:46) Majwi aaya, taatondezyi kuti Davida wakali kwaamba kubako kwa Leza. Bbuku limwi litondezya kuti aawa Davida, wakali kwaamba mbwaakali kusyoma Jehova kuti “ngo Leza uupona uulibambilide kugwasya bantu bakwe.” Masimpe, Davida wakalizyi kuzwa kuzintu zyakamucitikila kuti Leza muumi ncobeni. Kusinizya makani aaya kwakamugwasya kuzumanana kumubelekela alimwi akumutembaula Jehova.—Int. 18:​28, 29, 49.

4. Ino tugwasyigwa buti kuzyiba kuti Jehova ngu Leza muumi?

⁴ Kusinizya kuti Jehova ngu Leza muumi kulatugwasya kumubelekela cabusungu. Tuyooba anguzu zyakucikonzya kuliyumya kumasunko alimwi akukulwaizyigwa kubeleka canguzu mumulimo wakwe. Alimwi tuyooba amakanze aakuzumanana kuba acilongwe ciyumu a Jehova.

LEZA MUUMI UYOOMUYUMYA

5. Ncinzi cikonzya kutupa kutayoowa ciindi notwajana masunko? (Bafilipi 4:13)

⁵ Tuyoocikonzya kuliyumya kumasunko mapati naa masyoonto, kufwumbwa buyo kuti katuzyi kuti Jehova muumi akuti ulilibambilide kutugwasya. Amana buya, kunyina penzi likonzya kumwaalila kumana Leza wesu. Ngu Singuzuzyoonse alimwi ulakonzya kutupa nguzu zyakuliyumya. (Amubale Bafilipi 4:13.) Aboobo, tulijisi twaambo tubotu itweelede kutupa kutayoowa ciindi notwajana masunko. Kubona lugwasyo ndwatupa Jehova mumasunko masyoonto, citupa kusinizya kuti uyootugwasya nociba ciindi twaakujana masunko mapati.

6. Nzintu nzi zyakacitikila Davida naakacili mukubusi izyakayumya lusyomo lwakwe muli Jehova?

⁶ Atubone zintu zyobilo zyakamucitikila Davida izyakayumya lusyomo lwakwe muli Jehova. Ciindi naakali mweembezi, cibbeya alimwi asyuumbwa zyakali kuyanda kulya mbelele zyabausyi. Mubukkale oobu, Davida cabusicamba wakatandaanya banyama aaba akuvwuna mbelele. Pele kunyina naakayeeya kuti wakazwidilila kwiinda munguzu zyakwe. Wakalizyi kuti Jehova ngowakamupa kuzunda. (1Sam. 17:​34-37) Davida kunyina naakaziluba zintu eezyi zyakacitika. Kwiinda mukuzinzibala kuyeeya kujatikizya zintu eezyi, wakaba alusyomo lwakuti Leza muumi wakali kuyoomuyumya akumbele.

7. Mbuti kuzilanga munzila iili kabotu zintu mbokwakamugwasya Davida kuzunda Goliati?

⁷ Kumbele, ambweni naakacili mukubusi, Davida wakaswaya nkambi yabasikalumamba yabana Israyeli. Wakajana kuti basikalumamba bakaliyoowede kapati akaambo kamu Filisiti wazina lya Goliati iwakaboola akutalika “kusampaula basikalumamba bana Israyeli.” (1Sam. 17:​10, 11) Basikalumamba bakayoowa akaambo kambwaakali mulamfwu alimwi amajwi aakusampaula ngaakali kwaamba. (1Sam. 17:​24, 25) Pele oobo tabusyi mbwaakali kuzilanga zintu Davida. Wakabona kuti ciindi Goliati naakali kusampaula basikalumamba bana Israyeli, wakali kutukila “Leza muumi.” (1Sam. 17:26) Davida wakali kuyeeya kujatikizya Jehova. Wakalizyi kuti Leza iwakamugwasya ciindi naakali mweembezi, wakali kuyoomugwasya amubukkale buli boobu. Kwiinda mukugwasyigwa a Jehova, Davida wakamulwana Goliati akumuzunda!—1Sam. 17:​45-51.

8. Mbuti mbotukonzya kuzumanana kusyoma Jehova ciindi notwajana masunko? (Amubone acifwanikiso.)

⁸ Andiswe tulakonzya kwaazunda masunko kuti twasyoma kuti Leza muumi ulilibambilide kutugwasya. (Int. 118:6) Tulakonzya kuyumya lusyomo oolu kwiinda mukulanga-langa Jehova ncaakacita musyule. Amubale zibalo zyamu Bbaibbele izikonzya kumuyeezya mbwaakabavwuna bakombi bakwe. (Is. 37:​17, 33-37) Alimwi amulange malipooti awebbusaiti yesu ya jw.org alo aatondezya Jehova mbwabagwasya bakwesu abacizyi mazuba aano. Kuyungizya waawo, amuyeeye kujatikizya Jehova mbwaakamugwasya lwanu kumugama. Mutalibiliki kuti naa kunyina nomwakalijana kale mubukkale ibuli mbuli kulwana cibbeya naa syuumbwa. Nkaambo nzi? Masimpe ngakuti, kuli zintu zinji Jehova nzyaamucitila mubuumi. Wakamutamba kutegwa mube balongwe bakwe. (Joh. 6:44) Amana buya, lino mucili mukasimpe akaambo kalugwasyo lwakwe. Mbuti kuti mwamulomba kuti amugwasye kuyeeya ziindi naakaingula mipailo yanu, naakamugwasya aciindi ceelede naa naakamulanganya nomwakali mubukkale bukatazya? Kuyeeya twaambo tuli boobu, kuyoomugwasya kuba alusyomo lwakuti Jehova uyoozumanana kuba andinywe.

9. Mbuti mbotweelede kwaabona masunko? (Tusimpi 27:11)

⁹ Ciindi notwasunkwa, tweelede kubikkila maano kuzintu ziyandika kapati. Diabolosi waamba kuti, ikuti twasikilwa mapenzi inga twamukaka Jehova. Aboobo mbotucita ciindi notwasikilwa masunko cilamujatikizya Jehova. (Job. 1:​10, 11; Amubale Tusimpi 27:11.) Pele ciindi notwaazunda masunko, tutondezya kuti tulamuyanda Jehova akuti Diabolosi mubeji. Sena mujisi penzi lyakukazyigwa amfwulumende, kubula ziyandika, kukazyigwa nomukambauka naa masunko aambi buyo? Kuti kacili boobo, amuzyibe kuti bukkale bwanu bumupa coolwe cakukkomanisya Jehova. Alimwi mutalubi kuti, kunyina nayoomulekela kuti musunkwe kwiinda mpozigolela nguzu zyanu. (1Kor. 10:13) Uyoomupa nguzu zyakuliyumya.

LEZA MUUMI UYOOMULONGEZYA

10. Ncinzi Leza muumi ncayoobacitila aabo bamukomba?

¹⁰ Jehova ngu Sikupa Bulumbu kuli baabo bamukomba. (Heb. 11:6) Ulatupa luumuno alimwi akukkutila lino, mpoonya kumbele uyootupa buumi butamani. Tulakonzya kuba alusyomo lwakuti Jehova uyootulumbula alimwi akuti ulijisi nguzu zyakucita boobo. Kuba alusyomo luli boobu kulatugwasya kujata bubi mubukombi bwesu mbubwenya mbobakacita kaindi babelesi ba Leza basyomeka. Oobu mbombubo mbwaakacita Timoteyo mumwaanda wamyaka wakusaanguna.—Heb. 6:​10-12.

11. Ncinzi cakakulwaizya Timoteyo kubeleka canguzu mumbungano? (1 Timoteyo 4:10)

¹¹ Amubale 1 Timoteyo 4:10. Timoteyo wakamusyoma cakumaninina Leza muumi. Aboobo, wakalijisi kaambo kabotu ikakali kumupa kubeleka canguzu akulitakata. Ino ncinzi ncaakacita? Mwaapostolo Paulo wakamukulwaizya kuba mwiiyi uucibwene mumulimo wamumuunda alimwi amumbungano. Timoteyo alimwi wakeelede kuba cikozyanyo cibotu kubasyominyina, bana alimwi abapati. Kunze lyaboobo, wakapedwe mukuli uukatazya, iwakali kubikkilizya akupa lulayo lwaluyando kuti kwayandika kucita boobo. (1Tim. 4:​11-16; 2Tim. 4:​1-5) Timoteyo wakalisinizyide kuti nokuba kuti mulimo ngwaakali kucita zimwi ziindi tiiwakali kubonwa, alimwi bamwi kunyina nobakali kulumba, Jehova wakali kuyoomulumbula.—Rom. 2:​6, 7.

12. Ncinzi cikonzya kubakulwaizya baalu kuzumanana kujata bubi mumulimo wabo? (Amubone acifwanikiso.)

¹² Mazuba aano, baalu abalo balakonzya kuba alusyomo lwakuti Jehova ulaibona milimo mibotu njobacita alimwi ulalumba kapati. Kunze buyo lyakucita nyendo zyabweembezi, kuyiisya, alimwi akukambauka, baalu banji balagwasyilizya mumilimo yamayake alimwi anokwacitika ntenda. Bamwi babelekela mu Tubunga Tuswaya Balwazi naa mumakkomiti aa Hospital Liaison. Baalu balyaabide kubeleka milimo iili boobu babona mbungano kuti mbubambe bwa Jehova, ikutali mbunga yakapangwa amuntu. Akaambo kaceeci, balabeleka cakusyomeka mumilimo yabo kabajisi lusyomo luyumu lwakuti Jehova uyoobalumbula akaambo kamilimo njobacita.—Kol. 3:​23, 24.

13. Ino Jehova ulimvwa buti akaambo kakusolekesya nkomucita mumulimo wakwe?

¹³ Tabali boonse bakonzya kuba baalu. Pele toonse kuli ncotukonzya kumupa Jehova. Leza wesu ulalumba kapati ciindi notumubelekela kusikila mpotugolela. Ulabona ciindi notusanga kumulimo wanyika yoonse, nokuba kuti twasanga mali masyoonto. Ulakkomana kapati ciindi notutambika kutegwa tupe bwiinguzi lyamuswaangano wa Bunakristo nokuba kuti tulaansoni, alimwi ulakkomana ciindi notulekelela baabo batulubizyila. Nokuba kuti mulimvwa kuti tamuciti zinji mumulimo wa Jehova, amube alusyomo lwakuti ulalumba kapati kumilimo yoonse njomucita. Ulamuyanda kapati alimwi uyoomupa bulumbu.—Lk. 21:​1-4.

AMUZUMANANE KUBA ACILONGWE CIYUMU A LEZA MUUMI

14. Mbuti kuba acilongwe ciyumu a Jehova mbokutugwasya kuzumanana kusyomeka? (Amubone acifwanikiso.)

¹⁴ Kuti Jehova kali mwini-mwini kulindiswe, ciyootuubila kuzumanana kusyomeka kulinguwe. Oobu mbwaakacita Josefa. Wakakaka kucita bumambe. Leza wakali mwini-mwini kulinguwe alimwi tanaakali kuyanda kumunyemya. (Matl. 39:9) Kutegwa Jehova abe mwini-mwini kulindiswe, tweelede kunoojana ciindi cakupaila kulinguwe alimwi akubala Jwi lyakwe. Kuti twacita oobo, cilongwe cesu anguwe ciyooyuma. Mpoonya mbubwenya mbuli Josefa, tatukaciti cintu cili coonse cikonzya kumunyemya Jehova.—Jak. 4:8.

15. Nciiyo nzi ncotwiiya kuli cakabacitikila bana Israyeli ciindi nobakali munkanda? (Bahebrayo 3:12)

¹⁵ Aabo batasyomi kuti Jehova ngu Leza muumi, ncuuba-uba kulimbabo kuleka kusyomeka kulinguwe. Amubone ncobakacita bana Israyeli ciindi nobakali munkanda. Bakalizyi kuti Jehova nkwali, pele bakali kudooneka kuti naa wakali kukonzya kubapa nzyobakali kuyandika. Mane buya bakabuzya kuti: “Sena Jehova mpali akati kesu naa pe?” (Kul. 17:​2, 7) Kuzwa waawo, bakamuzangila. Masimpe, tatuyandi kwiiya cikozyanyo cabo cibyaabi calo citucenjezya.—Amubale Bahebrayo 3:12.

16. Ncinzi cikonzya kusunka lusyomo lwesu?

¹⁶ Nyika eeyi ipa kuti kacituyumina kuba acilongwe ciyumu a Jehova. Bantu banji tabazumini kuti Leza nkwali. Kanji-kanji, aabo ibatatobeli zyeelelo zya Leza balibonya kuzwidilila mubuumi. Ciindi notucibona eeci kacicitika, lusyomo lwesu inga lwasunkwa. Nokuba kuti inga katuzyi kuti Leza nkwali, tulakonzya kutalika kudooneka kuti naa inga watugwasya. Oobu mbwaakalimvwa mulembi wa Intembauzyo 73. Wakabona baabo ibatakali kutobela zyeelelo zya Leza kabakkomene mubuumi. Akaambo kaceeci, wakatalika kulibuzya naa cakalikugwasya kubelekela Leza.—Int. 73:​11-13.

17. Ncinzi ciyootugwasya kuzumanana kuba acilongwe ciyumu a Jehova?

¹⁷ Ncinzi cakagwasya sintembauzyo mukuya kwaciindi kutalika kuzilanga kabotu zintu? Wakatalika kuzinzibala kuyeeya cakali kuyoobacitikila aabo baleka kusyoma Jehova. (Int. 73:​18, 19, 27) Alimwi wakabikkila maano kumpindu iboola akaambo kakubelekela Leza. (Int. 73:24) Andiswe tulakonzya kuyeeya nzila Jehova mbwaatulongezya. Amuyeeye buyo buumi bwesu mbobwali kukonzya kuba ikuti notwatali kubelekela Jehova. Kuyeeya kaambo aaka kulakonzya kutugwasya kuzumanana kusyomeka, akwaamba majwi ngaakaamba sintembauzyo naakati: “Mebo, cilandibotela kuswena kuli Leza.”—Int. 73:28.

18. Nkaambo nzi ncotukonzya kuba basicamba kujatikizya zintu ziboola kumbele?

¹⁸ Tulilibambilide kulangana amasunko amusyobo uuli woonse mumazuba aano aamamanino akaambo kakuti ‘tubelekela Leza uupona alimwi mwini-mwini.’ (1Tes. 1:9) Alimwi Leza wesu mwini-mwini ulilibambilide kutugwasya. Wakatondezya kuti wakali aabantu bakwe kaindi, alimwi ulaandiswe amazuba aano. Ino-ino tulangilwa kuyoolangana amapenzi mapati aatanabwenwe munyika. Pele tatunooli tolikke pe. (Is. 41:10) Aboobo toonse ‘atube basicamba akwaamba kuti: ‘Jehova ngomugwasyi wangu; tandikooyoowa pe.’’—Heb. 13:​5, 6.