Jehova Mbwatugwasya Kutegwa Tuliyumye

1. Nkaambo nzi ncotuyandika kuliyumya? Nguni uukonzya kutugwasya kutegwa tuliyumye? (1 Petro 5:10)

MUMAZUBA aaya aamamanino aakatazya ncobeni, bantu ba Jehova bayandika kuliyumya. Mucikozyanyo, bamwi balapenga akaambo kakuciswa bulwazi butaponi naa kufwidwa muyandwa wabo. Kunze lyaboobo, bamwi balakazyigwa abanamukwasyi naa amfwulumende. (Mt. 10:​18, 36, 37) Tacikwe makani amapenzi ngomujisi, mulakonzya kuba masimpe kuti Jehova ulakonzya kumugwasya kutegwa muliyumye.—Amubale 1 Petro 5:10.

2. Ncinzi citugwasya kuliyumya?

² Kuliyumya caamba kuzumanana kusyomeka kuli Jehova akumubelekela calukkomano nokuba kuti tujisi buyumuyumu, tulapenzyegwa naa kusunkwa kucita cibi. Aboobo kutegwa tuliyumye, tweelede kuba alusyomo lwakuti zintu zilaba kabotu. Tulakonzya kuliyumya akaambo ‘kanguzu zigambya ziinda zyabantu’ nzyatupa Jehova ikutali munguzu zyesu tobeni. (2Kor. 4:7) Mucibalo eeci, tulabandika zintu zili 4 Jehova nzyaatupa kutegwa atugwasye kuliyumya. Kunze lyaboobo, tulabandika ncotweelede kucita kutegwa tugwasyigwe anzizyo.

MUPAILO

3. Nkaambo nzi mupailo ncoukonzya kwaambwa kuti maleele?

³ Jehova wacita cintu cimwi cigambya calo cikonzya kutugwasya kuliyumya. Nokuba kuti tuli basizibi, wapa kuti cikonzyeke kulindiswe kubandika anguwe alimwi ulatuswiilila. (Heb. 4:16) Amuyeeye buyo kujatikizya kaambo aaka: Tulakonzya kupaila kuli Jehova ciindi cili coonse alimwi akumwaambila makani aali woonse. Kunze lyaboobo, ulakonzya kutumvwa mumwaambo uli woonse ngotukonzya kubelesya alimwi akubusena buli boonse nkotubede, tacikwe makani tuli tolikke naa tuli muntolongo. (Jon. 2:​1, 2; Mil. 16:​25, 26) Nociba ciindi notulibilikide kapati cakuti tatujisi majwi aakubelesya kutegwa tumwaambile mbotulimvwa, Jehova ulakonzya kuzyiba ncotuyanda kwaamba. (Rom. 8:​26, 27) Masimpe, mupailo maleele.

4. Nkaambo nzi ncotukonzya kwaambila kuti mipailo yesu yakulomba Jehova kutegwa atugwasye kuliyumya ileendelana akuyanda kwakwe?

⁴ Mu Jwi lyakwe, Jehova utusyomezya kuti “kufwumbwa cintu ncotumulomba ceendelana akuyanda kwakwe, ulatumvwa.” (1Joh. 5:14) Aboobo, sena inga twamulomba Jehova kutugwasya kuliyumya? Inzya. Nkaambo kucita boobo, kuleendelana akuyanda kwakwe. Nkaambo nzi ncotwaambila boobo? Nkaambo notuliyumya kumasunko, tupa kuti Jehova akonzye kumwiingula Saatani Diabolosi walo uumusampaula. (Tus. 27:11) Kuyungizya waawo, Bbaibbele lyaamba kuti Jehova uliyandide kutondezya nguzu zyakwe “ikugwasya baabo bamusyoma camoyo woonse.” (2Mak. 16:9) Aboobo, tulakonzya kuba masimpe kuti Jehova uliyandide kutugwasya kutegwa tuliyumye alimwi uyootupa nguzu nzyotuyandika kutegwa tucikonzye kucita boobo.—Is. 30:18; 41:10; Lk. 11:13.

5. Mbuti mupailo mboukonzya kutugwasya kuba aluumuno lwamumizeezo? (Isaya 26:3)

⁵ Bbaibbele lyaamba kuti ciindi notupaila kuzwa ansi aamoyo kujatikizya zintu zitupa kulibilika, ‘luumuno lwa Leza oolo lwiinda maano oonse luyookwabilila myoyo yesu amizeezo yesu.’ (Flp. 4:7) Amubone eeci ncocaamba. Bantu batamubelekeli Jehova abalo balijisi mapenzi. Alimwi balabelesya nzila ziindene-indene kutegwa bakonzye kuba aluumuno lwamumizeezo naa kuluba mapenzi aabo. Mucikozyanyo, bamwi basola kusowa mizeezo yabo kutegwa bakonzye kukkalwa moyo. Kucita boobo, kuletela ntenda yakumuuya. (Amweezyanisye a Matayo 12:​43-45.) Alimwi nokuba kuti bantu balakkalwa moyo bamana kubelesya nzila eezyi, tabajisi luumuno lwini-lwini luzwa kuli Jehova lwalo ilwiinda kubota. Aboobo, ciindi notupaila kuli Jehova, tulatondezya kuti tulamusyoma cakumaninina akuti ulatupa “luumuno lutamani.” (Amubale Isaya 26:3.) Nzila imwi Jehova mbwatugwasya nkwiinda mukuyeeya magwalo alo aakonzya kutuumbulizya. Magwalo aaya alatuyeezya mbwatuyanda kapati alimwi ambwayandide kutugwasya calo cikonzya kutupa kukkalwa moyo.—Int. 62:​1, 2.

6. Nzintu nzi nzyomukonzya kubikkilizya mumupailo? (Amubone acifwanikiso.)

⁶ Ncomukonzya kucita. Ciindi nomujisi mapenzi, amumwaambile Jehova mbomulimvwa. ‘Amuwaale mukuli wanu uuminya’ kulinguwe akumulomba kuti amupe luumuno. (Int. 55:22) Amumulombe kuti amupe busongo mbomuyandika kutegwa mukonzye kuliyumya. (Tus. 2:​10, 11) Kunze lyaboobo, tamweelede kuluba kumulumba Jehova mumipailo yanu. (Flp. 4:6) Amubone mbwamugwasya buzuba abuzuba kutegwa muliyumye, akumulumba akaambo kalugwasyo lwakwe alimwi azintu zibotu nzyamupa. Nokuba kuti mujisi mapenzi, tamweelede kuluba Jehova mbwaamugwasya kale.—Int. 16:​5, 6.

JWI LYAKWE

7. Mbuti kwiiya Bbaibbele mbokukonzya kutugwasya kuliyumya?

⁷ Jehova wakatupa Jwi lyakwe Bbaibbele kutegwa atugwasye kuliyumya nkaambo lijisi zibalo zinji zyalo zitondezya mbwayandide kutugwasya. Amubone buyo cikozyanyo comwe. Lugwalo lwa Matayo 6:8 lwaamba kuti: “Uso ulizyi zintu nzyomuyandika kamutaninga akumulomba.” Jesu walo uumuzyi kabotu-kabotu Jehova kwiinda muntu uli woonse, nguwakaamba majwi aaya. Aboobo ciindi notupenga, tulakonzya kuba masimpe kuti Jehova ulizyi zintu nzyotuyandika alimwi uyootugwasya. Kunze lyaboobo, Bbaibbele lijisi zisyomezyo zinji zya Jehova zyalo zikonzya kutugwasya kuti tuliyumye ciindi notuli mumapenzi.—Int. 94:19.

8. (a) Ndulayo nzi Bbaibbele ndolitupa? (b) Ncinzi cikonzya kutugwasya kuyeeya lulayo lwamu Bbaibbele ciindi notuyandika ndulo?

⁸ Bbaibbele lilatupa lulayo lukonzya kutugwasya kuliyumya muziindi zikatazya. Lulayo ndolitupa lulakonzya kutugwasya kuba basongo alimwi akucikonzya kusala kabotu. (Tus. 2:​6, 7) Mucikozyanyo, Bbaibbele litwaambila kuti tatweelede kulibilika kujatikizya zintu zikonzya kucitika buzuba butobela. Muciindi caboobo, tweelede kusyoma Jehova kuti unootugwasya buzuba abuzuba. (Mt. 6:34) Aboobo ikuti katubala Bbaibbele buzuba abuzuba akuzinzibala kuyeeya, ciyootuubila kuyeeya lulayo luli mulindilyo lwalo lukonzya kutugwasya kupanga cakusala naa kuzyiba mbotukonzya kuliyumya kupenzi limwi.

9. Mbuti zibalo zyamu Bbaibbele mbozikonzya kuyumya lusyomo lwesu lwakuti Jehova ulakonzya kutugwasya?

⁹ Bbaibbele alimwi lilijisi zikozyanyo zyabantu ibali mbulindiswe ibakasyoma Jehova alimwi ibakagwasyigwa anguwe. (Heb. 11:​32-34; Jak. 5:17) Ciindi notuzinzibala kuyeeya zibalo zili boobo, tuyumya lusyomo lwesu muli Jehova lwakuti “mayubilo eesu alimwi ninguzu zyesu, mugwasyi ngotukonzya kujana lyoonse muziindi zyamapenzi.” (Int. 46:1) Alimwi ciindi notuzinzibala kuyeeya mbobakamusyoma Jehova akuzumanana kumubelekela nomuba muziindi zikatazya, cilatukulwaizya kuyanda kubaiya.—Jak. 5:​10, 11.

10. Ncinzi ncomweelede kucita kutegwa mugwasyigwe kapati a Bbaibbele?

¹⁰ Ncomukonzya kucita. Amubale Bbaibbele buzuba abuzuba akuyobola magwalo ngomuyeeya kuti alakonzya kumugwasya kapati. Banji bajana kuti cilagwasya kutalika buzuba kwiinda mukulingaula magwalo, nkaambo cibapa kuba acintu ncobakonzya kuyeeya buzuba boonse. Eeci ncecakagwasya mucizyi wazina lya Mariea walo iwakali kulanganya bazyali bakwe bobilo ibakajanwa abulwazi bwakkansa alimwi ibakali aafwaafwi kufwa. Wakaamba kuti: “Ndakali kubala lugwalo kuzwa mukabbuku ka Kulingaula Magwalo Abuzuba akuzinzibala kuyeeya ncondakali kwiiya. Eeci cakali kundigwasya kuyeeya Jehova abuzuba alimwi azintu zibotu nzyatuyiisya mu Jwi lyakwe muciindi cakubikkila maano kumapenzi ngondakajisi.”—Int. 61:2.

BASYOMIMA

11. Nkaambo nzi ncocikulwaizya kuzyiba kuti tatuli tolikke ciindi notuliyumya kumapenzi?

¹¹ Jehova watupa bakwesu abacizyi munyika yoonse kutegwa batugwasye kuliyumya. Kuzyiba kuti “ciinga coonse cabakwesu munyika bainda mumapenzi ngoonya aaya,” cilatukulwaizya kuzyiba kuti tatuli tolikke. (1Pet. 5:9) Tulakonzya kuba masimpe kuti kufwumbwa mubukkale motukonzya kulijana, bamwi bakalijana kale mubukkale oobo alimwi bakacikonzya kuliyumya. Aboobo andiswe tulakonzya kuba alusyomo lwakuti tulakonzya kuliyumya.—Mil. 14:22.

12. Mbuti bakombima mbobakonzya kutugwasya? Ncinzi ncotukonzya kubacitila? (2 Bakorinto 1:​3, 4)

¹² Ciindi notuliyumya, bakombima balakonzya kutukulwaizya. Oobo mbocakabede akumwaapostolo Paulo. Mumagwalo aakwe, wakaamba mazina aabaabo ibakamugwasya ciindi naakaangidwe muŋanda alimwi wakabalumba. Nkaambo bakali kumuumbulizya, kumukulwaizya alimwi akumupa nzyaakali kuyandika. (Flp. 2:​25, 29, 30; Kol. 4:​10, 11) Mazuba aano, bakombima balakonzya kutuumbulizya akutupa lugwasyo ndotuyandika kutegwa tuliyumye muziindi zikatazya. Mbubwenya buyo, andiswe tulakonzya kubagwasya ciindi nobajisi mapenzi.—Amubale 2 Bakorinto 1:​3, 4.

13. Ncinzi cakagwasya mucizyi wazina lya Maya kuliyumya?

¹³ Mu 2020, bakapokola baku Russia cakutayeeyela bakanjila muŋanda yamucizyi Maya akutalika kwiisecca. Kumane wakeelede kuunka kunkuta kutegwa akaliiminine akaambo kakwaambila bamwi nzyasyoma. Mucizyi Maya wakaamba kuti Bakwesu abacizyi bakamukulwaizya kapati muziindi eezyo zikatazya. Wakapandulula kuti: “Aciindi eeco ndakalikatede, kulibilika alimwi akuusa. Pele bakwesu abacizyi bakali kunditumina fooni akundilembela magwalo aatondezya mbobakali kundiyanda kapati. Lyoonse ndakalizyi kuti bakwesu abacizyi balandiyanda akuti mukwasyi wangu. Pele nozyakacitika zintu eezyi ndakakasinizya kaambo aaka.”

14. Ncinzi ncomukonzya kucita kutegwa mugwasyigwe abasyominyoko? (Amubone acifwanikiso.)

¹⁴ Ncomukonzya kucita. Ciindi nomujisi mapenzi, cilayandika kubandika abasyominyoko akujana ciindi cakuba ambabo. Alimwi tamweelede kuwayawaya kulomba lugwasyo kubaalu nkaambo balakonzya kuba “busena bwakutijila muwo, busena bwakuyusila mvwula mpati yamuwo.” (Is. 32:2) Alimwi cilayandika kuyeeya kuti bakombinyoko abalo balajana mapenzi. Aboobo, ciindi nomwacitila muntu umwi uuli mumapenzi cintu cibotu, ciyoomugwasya kwaalanga munzila iili kabotu masunko aanu alimwi akuzumanana kuba bantu bakkomene.—Mil. 20:35.

BULANGIZI MBOTUJISI

15. (a) Mbuti bulangizi bwakumbele mbobwakamugwasya Jesu? (b) Mbuti mbobukonzya kutugwasya andiswe? (Bahebrayo 12:2)

¹⁵ Jehova watupa bulangizi businizyide bwalo butugwasya kuliyumya. (Rom. 15:13) Kamuyeeya kuti Jesu wakacikonzya kuliyumya muziindi zikatazya mubuumi bwakwe anyika akaambo kabulangizi mbwaakajisi. (Amubale Bahebrayo 12:2.) Wakalizyi kuti kusyomeka kwakwe kwakali kuyoopa kuti zina lya Bausyi lilemekwe. Kunze lyaboobo, wakali kulangila ciindi naakali kuyoopiluka kujulu kuli Bausyi alimwi aciindi naakali kuyooba Mwami akulela aba 144,000. Mbubwenya buyo, bulangizi mbotujisi bwakuyoopona mane kukabe kutamani munyika mpya njatusyomezyede Leza, bulatugwasya kuliyumya tacikwe makani amapenzi ngotukonzya kujana munyika ya Saatani.

16. Mbuti bulangizi mbobwakagwasya mucizyi umwi kuliyumya? Ncinzi ncomwiiya kumajwi ngaakaamba?

¹⁶ Amubone bulangizi mbobwakagwasya mucizyi wazina lya Anna waku Russia walo uujisi mulumi wakaangidwe iwakali kulindila kubuzyigwa-buzyigwa munkuta. Nocakacitika eeci, mucizyi Anna wakaamba kuti: “Kupaila kujatikizya bulangizi bwakumbele alimwi akuzinzibala kuyeeya kujatikizya mbubo kwakali kundigwasya kutatyompwa cakuzwa munzila. Ndilizyi kuti ciminya-minya buyo pele tacijayi nkaambo Jehova uyoobazunda basinkondonyina alimwi akuyootulumbula.”

17. Mbuti mbotukonzya kutondezya kulumba akaambo kabulangizi Jehova mbwatupede? (Amubone acifwanikiso.)

¹⁷ Ncomukonzya kucita. Amujane ciindi cakuzinzibala kuyeeya kujatikizya zintu zibotu Jehova nzyamusyomezyede kumbele akweezeezya kuti muli munyika mpya kamukkomene azintu nzyayoomucitila. Kufwumbwa mapenzi ngotukonzya kujana lino “ngakaindi buyo kaniini alimwi mauba-uba” twaayezyanisya akuyoopona mane kukabe kutamani mu Paradaiso. (2Kor. 4:17) Aboobo, amucite kufwumbwa ncomukonzya kutegwa mwaambile bantu bamwi kujatikizya zintu zibotu Leza nzyatusyomezyede kumbele. Amweezeezye buyo mbocili ciyumu kubantu aabo kuliyumya kumapenzi aamunyika ya Saatani pele kabatazyi zintu zibotu Leza nzyatusyomezyede kumbele. Nokuba kuti mwabaambila buyo zintu zisyoonto, mulakonzya kubakulwaizya kuyanda kuzyiba zinji kujatikizya Bwami bwa Leza azisyomezyo zyakwe.

18. Nkaambo nzi ncotweelede kuzisyoma zisyomezyo zya Jehova?

¹⁸ Naakamana kuliyumya kumapenzi manji akuzumanana kusyomeka, Jobu wakaambila Jehova kuti: “Lino ndazyiba kuti yebo ulakonzya kucita zintu zyoonse akuti kunyina cintu ncokanza kucita icikonzya kukwaalila.” (Job. 42:2) Jobu wakaiya kuti kunyina cikonzya kulesya Jehova kuzuzikizya zisyomezyo zyakwe. Ikuti andiswe twaba alusyomo luli boobo, tulakonzya kuliyumya. Mucikozyanyo, amweezeezye mukaintu iwali kuciswa kwaciindi cilimbocibede. Ulityompedwe akaambo kakuti waunka kuli bamadokota banji pele kunyina naba omwe wacikonzya kumusilika. Kumane wajana dokota uucibwene alimwi uusyomwa walo wamwaambila cini icimupa kuciswa alimwi ambwakonzya kumugwasya kutegwa apone. Ndilyonya wakkomana nokuba kuti weelede kulindila kwaciindi cilimbocibede kutegwa apone. Lino ncuubauba kumukaintu ooyu kuliyumya akaambo kakuti ulizyi kuti uyoopona. Mbubwenya buyo, tulazumanana kuliyumya akaambo kakuti tulisinizyide kuti cisyomezyo ca Leza ca Paradaiso ciyoocitika ncobeni.

19. Ino tuyandika nzi kutegwa tuzumanane kuliyumya?

¹⁹ Mbubwenya mbotwaiya, Jehova ulatugwasya kutegwa tuliyumye kwiinda mumupailo, Jwi lyakwe, bakombima alimwi abulangizi mbotujisi. Ikuti twazibelesya cakumaninina zintu eezyi Jehova nzyatupede, uyootugwasya tacikwe makani amapenzi ngotukonzya kujana lino. Eeci ciyootugwasya kuzumanana kuliyumya kusikila ciindi nyika ya Saatani yaakunyonyoonwa alimwi amapenzi aali mumo aakumana.—Flp. 4:13.