CIBALO CAKWIIYA 15
LWIIMBO 30 Ngu Taata, ngu Leza Wangu, Mweenzuma
Ncibotu “Kuswena Kuli Leza”!
“Mebo, cilandibotela kuswena kuli Leza.”—INT. 73:28.
ZILAAYIIGWE
Mbotukonzya kuba acilongwe ciyumu a Jehova alimwi abubotu buboola akaambo kakucita boobo.
1-2. (a) Ncinzi ncotweelede kucita kutegwa tube acilongwe amuntu umwi? (b) Ncinzi ncotutiibandike mucibalo eeci?
SENA mulijisi mulongwe ngomumvwana kapati? Ino mwakatalika buti kumvwana anguwe? Ambweni mwakali kujanika antoomwe, mwakazyiba zintu zyakamucitikila mubuumi, zintu nzyayanda anzyatayandi. Mwakabona kuti ulijisi bube bubotu bwalo mbomukonzya kwiiya. Aboobo mwakatalika kumuyanda mulongwe wanu ooyo.
2 Kuba acilongwe amuntu umwi, ciyanda ciindi alimwi akubeleka canguzu. Oobo mbocibede ikuti katuyanda kuba acilongwe ciyumu a Jehova Leza. Mucibalo eeci, tulabandika mbotukonzya kuba acilongwe ciyumu a Leza. Pele cakusaanguna, amuleke tubone bubotu buboola akaambo kakucita boobo.
3. Nkaambo nzi ncotweelede kuzinzibala kuyeeya bubotu buboola akaambo kakuba acilongwe a Jehova? Amupe cikozyanyo.
3 Cilayandika kapati kuzinzibala kuyeeya kaambo ncocili cibotu kuba acilongwe a Jehova. (Int. 63:6-8) Nkaambo nzi? Amubone cikozyanyo eeci. Bantu banji balizyi kuti ncibotu kulya zyakulya zijisi busani, kunyanyaasya mubili, kuba aciindi cinji cakoona alimwi akunywa meenda manji buzuba abuzuba. Pele banji tabazibikkili maano zintu eezyi, aboobo tabajisi buumi buli kabotu. Nokuba boobo, bantu ibayeeya mbozigwasya zintu eezyi kanji-kanji balalangilwa kunoozicita. Mbubwenya buyo, tulizyi mbocili cibotu kuba acilongwe a Jehova. Pele kuzinzibala kuyeeya kaambo ncotweelede kucitila boobu, ciyootukulwaizya kuzumanana kuba acilongwe ciyumu anguwe.—Int. 119:27-30.
4. Ncinzi ncaakaamba sintembauzyo kulugwalo lwa Intembauzyo 73:28?
4 Amubale Intembauzyo 73:28. Mulembi wa Intembauzyo 73 wakali mu Levi iwakasalidwe kubeleka kali mwiimbi atempele lya Jehova. Kweelede kuti wakali kumukomba Jehova cakusyomeka kwamyaka minji. Pele wakalizyi mbocakali kuyandika kapati kuyeeya kuti “kuswena kuli Leza” cakali cintu cibotu kulinguwe alimwi wakali kuyanda kuti abamwi bazyibe kuti kuba acilongwe a Leza ncintu cibotu. Ino mbubotu nzi bumwi buboola akaambo kakucita boobo?
“KUSWENA KULI LEZA” KULETELA LUKKOMANO
5. (a) Nkaambo nzi kuswena kuli Leza ncokutuletela lukkomano? (b) Mbuti busongo mbwapa Jehova mbobumugwasya akumukwabilila? (Tusimpi 2:6-16)
5 Mbociyaabuyuma cilongwe cesu a Jehova, alwalo lukkomano lwesu lunooyaabuyungizyika. (Int. 65:4) Kuli twaambo tunji tuyoopa kuti cibe boobo. Kaambo kamwi nkakuti, tulagwasyigwa ciindi notutobela lulayo lwabusongo ilujanika mu Jwi lyakwe, Bbaibbele. Busongo oobu bulakonzya kutukwabilila kuzintu zikonzya kutuletela mapenzi alimwi akukucita zibi zipati. (Amubale Tusimpi 2:6-16.) Nkakaambo kaako Bbaibbele lyaamba kuti: “Ulikkomene muntu ooyo uujana busongo ayooyo uulijanina bupampu.”—Tus. 3:13.
6. Ncinzi cakapa kuti sintembauzyo amaninwe lukkomano?
6 Masimpe kuti nobaba babelesi ba Jehova zimwi ziindi balausa. Mulembi wa Intembauzyo 73 wakamaninwa lukkomano ciindi naakalekela mizeezo iitali kabotu kumweendelezya. Wakatalika kuyeeya kuti bantu babi bakali kupona buumi bubotu nokuba kuti tiibakali kumumvwida Leza alimwi eeci cakapa kuti alimvwe bubi. Mane buya wakali kuyanda kuti awalo abe azintu nzyobakajisi. Wakali kuyeeya kuti bantu basinkondo alimwi balisumpula bakali bukkede alimwi tiibakali kupenga. (Int. 73:3-7, 12) Sintembauzyo wakakatazyigwa kapati mumizeezo cakuti wakatalika kulibuzya naa kubelekela Jehova cakali kugwasya. Kauside kapati wakaamba kuti: “Masimpe ndaile kulipenzya buyo kusalazya moyo wangu akusamba kumaanza kutondezya kuti ndinyina mulandu.”—Int. 73:13.
7. Ncinzi ncotweelede kucita ciindi notwausa? (Amubone acifwanikiso icili .)
7 Sintembauzyo wakaluuside kapati, pele kuli cintu cimwi ncaakacita kutegwa azilange munzila iili kabotu zintu. Wakanjila “mucikombelo ca Leza cipati,” kwalo Jehova nkwaakamugwasya kululamika kuyeeya kwakwe. (Int. 73:17-19) Ciindi notuuside, Jehova Mulongwe wesu inga ulizyi. Aboobo, ikuti twapaila kulinguwe kulomba busolozi akuzumina lugwasyo ndwapa kwiinda mu Jwi lyakwe alimwi amumbungano, tuyooba anguzu nzyotuyandika kutegwa tuzumanane kumubelekela nokuba kuti tuluuside. Nociba ciindi notwalibilika kapati, Jehova ulakonzya kutuumbulizya akututontozya.—Int. 94:19.a
Mu Levi iwakalemba Intembauzyo 73, uliimvwi “mucikombelo ca Leza cipati.” (Amubone muncali 7)
“KUSWENA KULI LEZA” KUTUPA KUBA ABUUMI BUBOTU LINO ALIMWI ABULANGIZI BWAKUMBELE
8. Muunzila nzi zimbi ziyandika kapati kuswena kuli Leza mbokuli kubotu kulindiswe?
8 Kuswena kuli Leza nkubotu kulindiswe munzila azimbi zyobilo ziyandika kapati. Yakusaanguna, kutupa kuba abuumi bubotu. Yabili, kutupa kuba abulangizi bwini-bwini bwakumbele. (Jer. 29:11) Amuleke tuzilange-lange nzila eezyi cakulomya.
9. Mbuti kuba acilongwe a Jehova mbokutupa kupona buumi bukkomanisya?
9 Kuba acilongwe a Jehova kutupa kuba abuumi bubotu. Bantu banji ibatasyomi kuti Leza nkwali bayeeya kuti buumi bunyina mpindu alimwi akuti mukuya kwaciindi bantu boonse bayoomana kufwa. Nokuba boobo, kweelana anzyotwakaiya mu Jwi lyakwe, tulisinizyide kuti Leza nkwali ncobeni akuti milimo yoonse njotumubelekela taili yabuyo nkaambo ‘ngusikupa bulumbu kuli baabo bamuyandaula cabusungu.’ (Heb. 11:6) Naaba mazuba aano, tupona buumi bukkomanisya kapati akaambo kakuti tucita ceeco ncotwakalengelwa, nkokuti kubelekela Taateesu wakujulu, Jehova.—Dt. 10:12, 13.
10. Kweelana alugwalo lwa Intembauzyo 37:29, ino Jehova ubasyomezya nzi aabo bamusyoma?
10 Bantu banji, tabajisi bulangizi bwini-bwini bwakumbele. Babikkila buyo maano kubeleka, kuba amukwasyi alimwi akuyobola mali ngobanoobelesya baakucileka kubeleka. Kayi tabazyi Leza ncasyomezyede kumbele. Pele babelesi ba Jehova basyoma nguwe. (Int. 25:3-5; 1Tim. 6:17) Tulamusyoma Leza mbwali mulongwe wesu alimwi azintu nzyaakatusyomezya. Eeci cibikkilizya bulangizi bwakunoomukomba mane kukabe kutamani mu Paradaiso.—Amubale Intembauzyo 37:29.
11. Ino kuswena kuli Leza kutugwasya buti? Ino ulimvwa buti notuswena kulinguwe?
11 Kuswena kuli Leza kulatugwasya munzila azimbi zinji. Mucikozyanyo, Jehova usyomezya kutulekelela zibi zyesu ikuti tweempwa. (Is. 1:18) Akaambo kaceeci, tulaleka kulipa mulandu akaambo kazibi nzyotwakacita kaindi. (Int. 32:1-5) Alimwi Jehova ulakkomana kapati ciindi notuswena kulinguwe. (Tus. 23:15) Cakutadooneka, mulakonzya kuyeeya zilongezyo zimbi ziboola akaambo kakuba acilongwe a Leza. Pele mbuti mbomukonzya kuzumanana kuswena kuli Leza?
MBOMUKONZYA KUZUMANANA “KUSWENA KULI LEZA”
12. Ncinzi ncotweelede kucita kutegwa tube acilongwe ciyumu a Leza?
12 Ikuti naa muli Munakristo uubbapatizyidwe, kweelede kuti mwakacita zintu zinji kutegwa mube acilongwe a Jehova. Mwakaiya kasimpe kujatikizya Jehova Leza a Kristo Jesu, mwakeempwa zibi zyanu, mwakatondezya lusyomo luyumu muli Leza alimwi akusolekesya kupona kweelana akuyanda kwakwe. Nokuba boobo, kutegwa tube acilongwe ciyumu a Leza, tweelede kuzumanana kuzicita zintu eezyi.—Kol. 2:6.
13. Nzintu nzi zyotatwe zikonzya kutugwasya kuzumanana kuba acilongwe ciyumu a Jehova?
13 Ncinzi ciyootugwasya kuzumanana kuba acilongwe ciyumu a Jehova? (1) Tweelede kuzumanana kubala akwiiya Bbaibbele. Ciindi notucita oobo, tweelede kuba amakanze aakwiiya zinji kunze buyo lyanjiisyo zyantalisyo kujatikizya Leza. Tweelede kusolekesya kumvwisya ncayanda Leza kulindiswe akupona kweelana anjiisyo zijanika mu Jwi lyakwe. (Ef. 5:15-17) (2) Tweelede kuyumya lusyomo lwesu kwiinda mukuzinzibala kuyeeya zintu zinji zitondezya kuti ulatuyanda. (3) Tweelede kuzumanana kusulaika zintu zimunyemya Jehova akweeleba kuyanzana abantu bacita zintu eezyo.—Int. 1:1; 101:3.
14. Ncinzi ncotweelede kucita buzuba abuzuba kutegwa tumukkomanisye Jehova? (1 Bakorinto 10:31) (Amubone azifwanikiso.)
14 Amubale 1 Bakorinto 10:31. Cilayandika kapati kuzumanana kucita zintu zimukkomanisya Jehova. Eeci tacigoleli buyo akuunka mubukambausi alimwi akujanika kumiswaangano yambungano. Pele cilabikkilizya azintu nzyotucita buzuba abuzuba. Mucikozyanyo, ciindi notusyomeka muzintu zyoonse alimwi akwaabana zintu nzyotujisi abamwi, tukkomanisya Jehova. (2Kor. 8:21; 9:7) Kunze lyaboobo, Jehova uyanda kuti katutondezya kulumba kucipego cabuumi. Aboobo tulabikkila maano kujatikizya kutaciindizya kulya akunywa alimwi tulacita zintu zikonzya kupa kuti tube abuumi buli kabotu. Kufwumbwa kusolekesya kuli koonse nkotucita kutegwa tumukkomanisye Jehova, nomuba muzintu zilibonya kuti nzisyoonto, kupa kuti atuyande kapati.—Lk. 16:10.
Kweenzya kabotu, kunyanyaasya mubili, kulya zyakulya zijisi busani alimwi akuba baabi, ninzila zimwi mbotukonzya kumukkomanisya Jehova (Amubone muncali 14)
15. Ino Jehova uyanda kuti katubeendelezya buti bamwi?
15 Jehova ulaaluzyalo kubantu baluleme abataluleme. (Mt. 5:45) Aboobo uyanda kuti andiswe katutondezya luzyalo kuli bamwi. Mucikozyanyo, tatweelede ‘kusampaula muntu uuli woonse naa kuba basinkazi, pele tweelede kunyoneka akutondezya kubomba moyo cakumaninina kubantu boonse.’ (Tit. 3:2) Aboobo, tatweelede kubasampaula bamwi akaambo buyo kakuti tabasyomi nzyotusyoma. (2Tim. 2:23-25) Tulakonzya kuba acilongwe ciyumu a Jehova ikuti katubeendelezya caluzyalo bantu boonse.
TULAKONZYA “KUSWENA KULI LEZA” NOLIBA LEELYO NOTWALUBIZYA
16. Ino mulembi wa Intembauzyo 73 wakalimvwa buti aciindi cimwi?
16 Pele mbuti kuti mukuya kwaciindi mwatalika kulimvwa kuti tamweeleli kuyandwa a Jehova? Amuyeeye cikozyanyo camulembi wa Intembauzyo 73. Wakaamba kuti: “Maulu aangu akatiileye; maulu aangu akatiitezemuke.” (Int. 73:2) Wakazumina kuti ‘wakalinyemede kapati, tanaakali kuyeeya kabotu alimwi wakali mbuli munyama uutayeeyi’ kumbele lya Jehova. (Int. 73:21, 22) Sena wakalimvwa kuti tanaakali kweelela kuyandwa a Jehova akaambo kakutazilanga kabotu zintu?
17. (a) Ncinzi ncaakacita sintembauzyo nokuba kuti wakalityompedwe kapati? (b) Ncinzi ncotukonzya kwiiya kuzintu zyakamucitikila? (Amubone azifwanikiso.)
17 Ikuti sintembauzyo wakalimvwa kulekelezyegwa a Jehova, kweelede kuti wakalimvwa oobo kwaciindi cisyoonto buyo. Cikkomanisya ncakuti, nociba ciindi naakatyompedwe kapati, wakalizyi kuti wakeelede kuzumanana kuba acilongwe a Jehova. Wakalemba kuti: “Pele lino ndilaanduwe [Jehova] ciindi coonse, wandijatilila kujanza lyangu lyalulyo. Ulandisololela alulayo lwako, mpoonya kumbele uyoondisisya kubulemu.” (Int. 73:23, 24) Mbubwenya buyo, andiswe tweelede kulomba Jehova kuti atuyumye ciindi notwalimvwa kuti lusyomo lwesu lwayaansi naa ciindi notwatyompwa akaambo kakulubizya kwesu. (Int. 73:26; 94:18) Nociba ciindi notwacita zibi zipati, tulakonzya kupiluka kuli Jehova katusinizyide kuti “ulilibambilide kulekelela zibi.” (Int. 86:5) Cilayandika kapati kuswena kuli Leza, kwaambisya ciindi notutyompedwe.—Int. 103:13, 14.
Ciindi notwalimvwa kuti twayaansi kumuuya, tweelede kuswena kuli Jehova kwiinda mukupaila akujanika kumiswaangano lyoonse (Amubone muncali 17)
“KUSWENA KULI LEZA” LYOONSE MANE KUKABE KUTAMANI
18. Nkaambo nzi ncotukonzya kuzumanana kuswena kuli Leza mane kukabe kutamani?
18 Tulakonzya kuzumanana kuswena kuli Leza mane kukabe kutamani nkaambo kunyina notuyooleka kwiiya kujatikizya nguwe. Bbaibbele lyaamba kuti nzila zya Jehova, busongo bwakwe alimwi aluzyibo lwakwe “kunyina uunga waziteelela.”—Rom. 11:33.
19. Ncisyomezyo nzi ncotujana kulugwalo lwa Intembauzyo?
19 Lugwalo lwa Intembauzyo 79:13 lwaamba kuti: “Swebo, tobantu bako alimwi tobutanga bwamumacelelo aako, tunookulumba lyoonse mane kukabe kutamani alimwi tunookutembaula kumazyalani oonse.” Mbumunooyaabuzumanana kuswena kuli Leza, andinywe mulakonzya kuba masimpe kuti mulakonzya kulongezyegwa mane kukabe kutamani akwaamba cakusinizya kuti: “Leza nindomba yamoyo wangu alimwi ncaabilo cangu lyoonse mane kukabe kutamani.”—Int. 73:26.
LWIIMBO 32 Amube Kulubazu lwa Jehova!
a Bamwi ibazumanana kutyompwa naa kulibilika kwaciindi cilamfwu, inga bayandika kulomba lugwasyo kuli bamadokota. Kutegwa muzyibe makani manji, amubone Ngazi Yamulindizi, No. 1 2023.