Jehova Wakali Kutugwasya Kuzyibila Kuli Koonse Nkotwakali Kutumwa

Mukwesu amucizyi Kassholm bakanjila Cikolo ca Gileadi mu 1979. Mpoonya mukuya kwamyaka bakatumwa kuyoobelekela ku Iran, Mauritius, Myanmar, Tanzania, Uganda alimwi aku Zaire. Kabacili kucikolo eeci, mukwesu Jack Redford wakabapa lulayo lwalo ilwakabagwasya kuzyibila kucinca mumulimo uuli woonse ngobakali kupegwa. Amuleke batwaambile cakuluula cabo.

Amutwaambile mbomwakakaiya kasimpe.

Ba Mats: Bataata bakali kukkala ku Poland lya Nkondo Yanyika Yoonse Yabili alimwi bakabona kuupaupa ameso mucikombelo ca Katolika. Nokuba boobo, kanji-kanji bakali kwaamba kuti, “Kweelede kuti kasimpe nkokali.” Mukuya kwaciindi, ndakabona kuti ncobakali kwaamba akali masimpe. Aboobo, ndakaula mabbuku manji. Akati kamabbuku aayo, kwakali bbuku ilyakali kutegwa The Truth That Leads to Eternal Life. Mutwe wabbuku eeli wakali kukkomanisya kapati. Alimwi ndakalibala bbuku lyoonse mubusiku oobo cakuti kusikila kuseeni, ndakazyiba kuti ndakajana kasimpe.

Kuzwa mu April 1972, ndakabala mabbuku manji aa Bakamboni ba Jehova akujana bwiinguzi kumibuzyo yamu Bbaibbele njondakajisi. Ndakalimvwa mbuli sikweendeenda wamucikozyanyo ca Jesu walo naakamana kujana ngale iidula kapati, wakasambala zintu zyoonse nzyaakajisi akuyuula. Ndakacita mbubonya oobo akusala kubelekela Jehova muciindi cakuunka kuyunivesiti kutegwa ndikabe dokota. (Mt. 13:​45, 46) Kumane ndakabbapatizyigwa mu December 10, 1972.

Mumwaka buyo omwe, bazyali bangu amusyoonto wangu bakaiya kasimpe akubbapatizyigwa. Kumane mu July 1973, ndakatalika mulimo waciindi coonse. Akati kabapainiya basungu ibakali mumbungano yesu, kwakali mucizyi iwakali kuzibikkila kapati maano zintu zyakumuuya wazina lya Ann-Catrin. Twakayandana akukwatana mu 1975 alimwi kwamyaka iili 4 yakatobela, twakazumanana kukkala mudolopo lya Strömsund, busena bubotu mu Sweden kwalo bantu banji nkobakajisi luyandisisyo lwakuyanda kuzyiba kasimpe.

Ba Ann-Catrin: Bataata bakakaiya kasimpe nobakali afwaafwi kumana lwiiyo lwabo lwakuyunivesiti ku Stockholm. Aciindi eeco, ndakajisi buyo myezi yotatwe yakuzyalwa pele bakali kunditolelezya kumiswaangano amumulimo wamumuunda. Baama tiibakali kuciyanda eeci alimwi bakali kuyanda kutondezya kuti Bakamboni tabaluzi. Pele tiibakacikonzya kucita oobo. Mpoonya mukuya kwaciindi abalo bakabbapatizyigwa. Aboobo nondakajisi myaka iili 13 ndakabbapatizyigwa kumane nondakajisi myaka iili 16 ndakaba mupainiya waciindi coonse. Kumane nondakamana kubelekela ku Umeå kwalo kwakabulide basikumwaya ba Bwami, ndakaba mupainiya waalubazu.

Notwakamana kukwatana, mebo abalumi bangu twakaba acoolwe cakugwasya bantu banji kwiiya kasimpe. Akati kabo kwakali mucizyi wazina lya Maivor, walo iwakacileka kusobana zisobano zyakuzundana kutegwa abelekele Jehova akutalika kubeleka amusyoonto wangu musimbi mumulimo wabupainiya. Mu 1984, bakanjila Cikolo ca Gileadi akutumwa kuyoobelekela ku Ecuador.

Mumulimo wanu wabumisyinali, ncinzi camugwasya kuzyibila kucinca akuzumanana kuba bantu bakkomene?

Ba Mats: Mumulimo wesu wabumisyinali, twakali kutumwa mumasena ayiindene-indene. Pele cintu icakatugwasya kuzyibila nkwiiya Jesu ikwaambisya cikozyanyo cakwe cakulicesya. (Kol. 2:​6, 7) Mucikozyanyo, muciindi cakulangila bakwesu abacizyi bakubusena oobo kuti bacince akutalika kucita zintu kweelana ambotwakazyibide, twakasoleka kwiiya kaambo ncobakali kucitila zintu munzila imwi. Twakali kuyanda kumvwisya mbobayeeya alimwi azilengwa zyabo. Ciindi notwakali kumwiiya Jesu, cakali cuubauba kuzyibila kucinca akuzumanana kuba bantu bakkomene mumulimo wesu.—Int. 1:​2, 3.

Ba Ann-Catrin: Ciindi cisyango nocajugwa akusimpwa kumbi, ciyandika mumuni wazuba. Jehova lyoonse wali mbuli ‘zuba’ kulindiswe. (Int. 84:11) Wakatulongezya kwiinda mukutupa bakwesu abacizyi batuyanda. Mucikozyanyo, mumbungano nsyoonto mu Tehran ku Iran, bakwesu abacizyi bakali baabi kapati. Bwaabi bwabo bwakali kutuyeezya mbobakali kucita bantu mbotubala mu Bbaibbele. Twakali kuyanda kukkala mu Iran, pele mu July 1980 mulimo wa Bakamboni ba Jehova wakalesyegwa mucisi eeci. Alimwi twakaambilwa kuzwa mumazuba buyo obilo. Kumane twakatumwa kuyoobelekela ku Zaire (cisi lino iciitwa kuti Congo) mu Africa.

Ciindi nondakazyiba kuti twakali kuyootumwa kuyoobelekela ku Africa, ndakalila. Nondakamvwa kuti kuli nzoka alimwi amalwazi manji mu Africa, ndakayoowa kapati. Pele balongwe besu bobilo ibakabeleka kwaciindi cilamfwu ku Africa bakatwaambila kuti: “Tamweelede kuyoowa! Tamunaunkide ku Africa, pele tulizyi kuti muyookukkomanina.” Amana buya oobo mbocakacitika. Bakwesu abacizyi mbaasiluyando alimwi balasangalizya. Mubwini notwakali kuzwa mu Zaire kakwiindide myaka iili 6 akaambo kakuti mulimo wesu wakalilesyedwe, ndakalisekela akaambo kakuti aciindi eeci ndakali kupaila kuli Jehova kuti, “Akaka kotuleka tuzumanane kukkala mu Africa.”

Nzilongezyo nzi nzyomwajana akaambo kakubelekela Jehova?

Ba Mats: Akaambo kakuti twakali kutumwa mumasena ayiindene-indene, twakaba balongwe abamisyinali bambi ibakali kuzwa mumasena ayiindene-indene. Kunze lyaboobo, mebo abakaintu bangu twakali kusololela ziiyo zya Bbaibbele zili 20 aumwi, calo icakali kutupa kukkomana kapati alimwi akulimvwa kukkutila. Tandikalulubi luyando alimwi akusamausya nkobakatutondezya bakwesu baku Africa. Mucikozyanyo, notwakali kuswaya mbungano zyamu Tanzania, bakwesu bakali kuba masimpe kuti batubambila zintu nzyotwakali kuyandika nokuba kuti bakali bacete. (2Kor. 8:3) Zimwi ziindi twakali kuba aciindi cibotu cakwaana. Eeci cakali kucitika kumamanino aabuzuba bumwi abumwi ciindi mebo abakaintu bangu, notwakali kukkala akubandika zintu zyacitika buzuba oobo akumulumba Jehova akaambo kakuba andiswe.

Ba Ann-Catrin: Mebo cindipa kukkomana kapati, nkuba cibeela cabunyina bwanyika yoonse. Twakaiya myaambo mipya mbuli ci Farsi, French, Luganda aci Swahili. Alimwi twakaiya zilengwa zipya. Kunze lyaboobo, twakagwasya bantu kuba basikwiiya alimwi twakaba abalongwe beni-beni balo mbotubeleka limwi “calukamantano” mumulimo wa Jehova.—Zef. 3:9.

Kuyungizya waawo, twakabona zilenge zya Jehova ziindene-indene alimwi zibotu kapati. Lyoonse notwakali kupegwa mulimo mupya mumulimo wa Jehova, twakali kulimvwa kuti Jehova ulaandiswe alimwi akuti uli kumbele lyesu kutegwa atusololele. Wakatuyiisya zintu zinji kapati zyalo nzyotwatakali kukonzya kuliyiisya tobeni.

Mbuyumuyumu nzi mbomwakajana alimwi ino mwakabuzunda buti?

Ba Mats: Zimwi ziindi, twakali kuciswa malwazi ayiindene-indene kubikkilizya abulwazi bwa malaria. Mpoonya bakaintu bangu ba Ann-Catrin bakali kujanika mubukkale bwacibukila mbuta mobakali kuyandika kwaandulwa. Kunze lyaboobo, twakali kulibilika kujatikizya bazyali besu ibakali kuyaabucembaala. Pele tulabalumba kapati banamukwasyi ibakazumanana kubalanganya ciindi notwakali mumulimo wesu. Bakazumanana kucita oobo cakukkazika moyo, caluyando alimwi acalukkomano. (1Tim. 5:4) Nokuba kuti twakali kucita kufwumbwa ncotwakali kukonzya kugwasya bazyali besu katuli kulamfwu, zimwi ziindi twakali kuusa akaambo kakuti tiitwakali kukonzya kucita oobo kweelana ambotwakali kuyanda.

Ba Ann-Catrin: Mu 1983 katubelekela mu Zaire, ndakaciswa bulwazi bwa cholera. Badokota bakaambila balumi bangu ba Mats kuti, “Amubagusye mucisi eeci sunu ndilyonya!” Aboobo buzuba bwakatobela twakazwa, pele nzila ilikke yakali kukonzya kutubelekela nkubelesya ndeke iinyamuna zintu iyakali kuunka ku Sweden.

Ba Mats: Twakali kuyeeya kuti mulimo wesu wabumisyinali wamana, aboobo twakalila citaambiki. Pele mukwiimpana ambobakali kuyeeya badokota, ba Ann-Catrin bakapona. Kumane nokwakainda mwaka, twakapiluka alimwi ku Zaire, pele aciindi eeci twakatumwa kumbungano nsyoonto iyakali kubelesya mwaambo waci Swahili ku Lubumbashi.

Ba Ann-Catrin: Katuli ku Lubumbashi, ndakamita pele mwanaangu wakafwa katanatumbukwa. Masimpe kuti tiitwakajisi makanze aakutalisya mukwasyi, pele kufwidwa mwana kwakandipa kuusa kapati. Nokuba boobo, muziindi eezyo zikatazya Jehova wakatupa cipego cimwi. Twakatalisya ziiyo zya Bbaibbele zinji kwiinda kaindi. Mumwaka buyo omwe, mweelwe wabasikumwaya mumbungano motwakabede wakatanta kuzwa a 35 kusika ku 70 alimwi awalo mweelwe wabantu bajanika kumuswaangano wakatanta kuzwa a 40 kusika ku 220. Twakajisi bubi kukambauka alimwi Jehova wakali kutulongezya akaambo kakusolekesya kwesu calo icakali kundipa kulimvwa kabotu. Nokuba boobo, ziindi zinji tulaakuyeeya alimwi akubandika kujatikizya mwaneesu. Pele tuliyandide kuyoolibonena Jehova mbwayookumana kuusa kwesu mu Paradaiso.

Ba Mats: Aciindi cimwi, bakaintu bangu ba Ann-Catrin bakatalika kulimvwa kubula nguzu akukatala kapati. Mpoonya aciindi ncomunya, ndakajanwa akkansa yakubula, aboobo ndakali kuyandika kwaandulwa. Pele mazuba aano mbubo ndili buyo kabotu alimwi bakaintu bangu balacita kufwumbwa ncobakonzya kutegwa bamubelekele Jehova.

Twakazyiba kuti tatuli buyo tolikke notwiinda mumasunko. Noyakainda nkondo yacijaye-jaye ku Rwanda mu 1994, twakaswaya bakwesu abacizyi munkambi yabazangalisi. Kubona lusyomo lwabo, mbobakaliyumya akuzumanana amuuya wakusamausya, kwakatuyiisya kuti Jehova ulijisi nguzu zyakuzumanana kulanganya bantu bakwe mumapenzi aali oonse ngobakonzya kujana.—Int. 55:22.

Ba Ann-Catrin: Kuli buyumuyumu abumbi mbotwakajana notwakaunkide kumuswaangano wakwaaba mutabi waku Uganda mu 2007. Nowakamana muswaangano, twakatanta moota kupiluka ku Nairobi, Kenya antoomwe akabunga kabamisyinali abamukwasyi wa Beteli babalilwa ku 25. Pele katutananjila mu Kenya, tilaki iyakali kuboola kumbele lyesu yakatalika kweendela kulubazu nkotwakali kweendela calo cakapa kuti ipwayane amoota yesu. Cuusisya ncakuti, dilaiva alimwi abakwesu abacizyi bali 5 bakafwa mpoonya-mpoonya. Kumane mucizyi omwe wakafwida kucibbadela. Eelo kaka tulacilangila ciindi notuyoobonana abalongwe besu alimwi!—Job. 14:​13-15.

Mukuya kwaciindi zilonda zyangu zyakapona. Pele mebo abalumi bangu kubikkilizya abaabo mbotwakali limwi mumoota, twakatalika kuba apenzi lyakulibilika akaambo kantenda yakatucitikila. Penzi eeli mebo lyakali kuvwula kundicitikila masiku calo icakali kundipa kuba acilabila akulimvwa kuti ndijisi penzi lyamoyo. Eeco cakali kundiyoosya. Pele kupaila kuli Jehova akubala magwalo ngotwakali kuyandisya, cakatugwasya kukkalwa moyo. Kunze lyaboobo, twakaunka kuli bamadokota ibakalizyi kabotu penzi eeli lyakulibilika calo icakatugwasya kapati. Lino penzi eeli lyaceya alimwi tulazumanana kumulomba Jehova kutegwa azumanane kubaumbulizya bamwi ibajisi penzi ndyomunya eeli.

Ciindi nomwali kupandulula mbomwakaliyumya kubuyumuyumu, mwaamba kuti Jehova wakali kumunyamuna mbuli “maji aatajikidwe.” Ncinzi ncomwali kusola kupandulula?

Ba Mats: Mabala aaya azwa kukaambyo kamuci Swahili kakuti “Tumebebwa kama mayai mabichi,” naa “Twakali kunyamunwa mbuli maji aatajikidwe.” Mbubwenya muntu mbwanyamuna maji aatajikidwe cakubikkila maano kutegwa atapwaiki, Jehova caluzyalo wali kutugwasyilizya mumulimo umwi aumwi ngotwakali kupegwa. Lyoonse twakalijisi zintu nzyotwakali kuyandika mane buya aziinda waawo. Nzila imwi mbotwalibonena kuti Jehova ulatuyanda akutugwasya, nkwiinda muluzyalo ndobatutondezya bakwesu bamu Kabunga Keendelezya.

Ba Ann-Catrin: Kuli cakuluula ncondiyanda kwaamba citondezya Jehova mbwaakatugwasya. Bumwi buzuba, ndakatuminwa fooni kundizyibya kuti bataata ku Sweden bakalicisidwe kapati mucibbadela. Aciindi eeci balumi bangu ba Mats tiibakajisi nguzu akaambo kakuti bakazwide akupona kubulwazi bwa malaria. Alimwi tiitwakali kucikonzya kuula tiketi kutegwa tutante ndeke kuunka kuŋanda. Aboobo twakasala kuti twiisambale buyo moota yesu. Pele bantu bobilo bakatutumina fooni. Bamwi bakali banabukwetene ibakamvwa kujatikizya penzi lyesu, aboobo bakali kuyanda kutuulila tiketi yomwe. Mpoonya umwi wakali mucizyi iwakacembeede iwakali kuyobola mali mukabbokesi ikakalembedwe kuti “Mali aakugwasya muntu uuyandika lugwasyo.” Muciindi buyo cisyoonto, twakalibonena Jehova mbwaakatugwasya.—Heb. 13:6.

Ncinzi ncomwaiya mumyaka yoonse iili 50 yakuba mumulimo waciindi coonse?

Ba Ann-Catrin: Ndaiya kuti tulakonzya kuba anguzu kufwumbwa buyo kuti ‘twabatama akuba alusyomo.’ Ikuti katusyoma muli Jehova, ulakonzya kutulwanina nkondo yesu. (Is. 30:15; 2Mak. 20:​15, 17) Kwiinda mukubelekela Jehova kusikila mpotugolela mumulimo uuli woonse ngotwakali kupegwa, twajana zilongezyo zinji nzyotwatali kukonzya kujana ikuti notwatali kubelekela Jehova.

Ba Mats: Ciiyo cipati ncondaiya ncakuti ndeelede kusyoma muli Jehova mubukkale buli boonse akubona mbwakonzya kundigwasya. (Int. 37:5) Lyoonse wali kundigwasya kweelana ambwaakasyomezya. Alimwi Jehova ucizumanana kutugwasya mumulimo wesu waku Beteli ku Myanmar.

Tulijisi lusyomo lwakuti bakubusi boonse ibayanda kuyungizya mulimo wabo bayoolubona luyando lwa Jehova lutamani ndwaakatondezya kulindiswe. Balakonzya kucita oobo kwiinda mukuzumizya Jehova kubagwasya kuzyibila kucinca mumulimo uuli woonse ngobakonzya kupegwa.