Mutalubi Kupailila Bamwi

1. Ino tuzyi buti kuti mipailo yesu ilayandika kapati kuli Jehova?

MUPAILO ncipego cilibedelede. Amuciyeeyele buyo: Jehova wakapa bangelo milimo imwi. (Int. 91:11) Alimwi wakapa Jesu mikuli iiyandika kapati. (Mt. 28:18) Pele mbuti kujatikizya kuswiilila mipailo? Kunyina ngwaakapa kuti kacita oobo. Jehova lwakwe kumugama ‘ngusikuswiilila mipailo yesu.’—Int. 65:2.

2. Ncikozyanyo nzi mwaapostolo Paulo ncaakatusiila kujatikizya kupailila bamwi?

² Nokuba kuti tulakonzya kwaanguluka kwaambila Jehova mapenzi eesu, tatweelede kuluba kupailila bamwi. Oobo mbwaakacita mwaapostolo Paulo. Mucikozyanyo, wakalembela mbungano yaku Efeso kuti: “Lyoonse ndilamubandauka mumipailo yangu.” (Ef. 1:16) Kunze lyaboobo, Paulo wakali kumupailila muntu umwi aumwi kumugama. Mucikozyanyo, wakaambila Timoteyo kuti: “Ndamulumba Leza, . . . kunyina nondileka kukwiibaluka mumipailo yangu yakukombelezya, syikati amasiku.” (2Tim. 1:3) Masimpe kuti Paulo wakalijisi mapenzi ngaakeelede kupailila. (2Kor. 11:23; 12:​7, 8) Nokuba boobo, wakali kujana ciindi cakupailila bamwi.

3. Nkaambo nzi zimwi ziindi ncotukonzya kuluba kupailila bamwi?

³ Zimwi ziindi tulakonzya kuluba kupailila bamwi. Nkaambo nzi? Mucizyi wazina lya Sabrinaa wakaamba kaambo kamwi. Wakaamba kuti: “Mubweende bwazintu obuno tujisi bubi kapati. Tulakonzya kunyonganizyigwa amapenzi eesu cakuti twatalika buyo kupailila zintu nzyotuyanda.” Sena eeci kuli nocakamucitikila kale? Ikuti naa mboobo, cibalo eeci cilamugwasya. Cilabandika (1) kaambo ncociyandika kupailila bamwi alimwi (2) nzila zikonzya kutugwasya kutegwa tucite oobo.

NKAAMBO NZI NCOTWEELEDE KUPAILILA BAMWI?

4-5. Mbuti mipailo njotupailila bamwi ‘mboibeleka canguzu kapati’? (Jakobo 5:16)

⁴ Mipailo yakupailila bamwi ‘ilabeleka canguzu kapati.’ (Amubale Jakobo 5:16.) Sena kupailila bamwi kulakonzya kupa kuti bukkale bucince? Inzya. Amubone zikozyanyo eezyi. Akaambo kakuti Jesu wakalizyi kuti mwaapostolo Petro wakali kuyoomukaka, wakamwaambila kuti: “Ndakukombelezyela mumupailo kuti lusyomo lwako lutamani.” (Lk. 22:32) Paulo awalo wakalizyi kuti mupailo ulakonzya kupa kuti bukkale bucince. Ciindi naakaangidwe ku Roma nokuba kuti wakanyina mulandu, wakalembela Filimoni kuti: “Ndilaalusyomo lwakuti kwiinda mumipailo yanu ndiyakupilusyigwa kulindinywe.” (Flm. 22) Alimwi buya eeci ncicakacitika. Paulo wakaangununwa akuzumanana amulimo wakwe wakukambauka.

⁵ Masimpe kuti ciindi notupailila bamwi, tacaambi kuti tusinikizya Jehova kuti acite cintu cimwi. Nkaambo walo ulabona babelesi bakwe mbobabikkila kapati maano kuzintu nzyobalomba alimwi zimwi ziindi ulacita kweelana akulomba kwabo. Kuzyiba kaambo aaka kulatugwasya kupaila kuzwa ansi aamoyo kuli Jehova, katusinizyide kuti ulazilanganya bweelede zintu.—Int. 37:5; amubone a 2 Bakorinto 1:11.

6. Ino kupailila bamwi inga kwatujatikizya buti? (1 Petro 3:8)

⁶ Kupailila bamwi kulakonzya kutugwasya kuba “amoyo mutete walubomba.” (Amubale 1 Petro 3:8.) Muntu silubomba ulabona muntu uupengede alimwi ulacita cintu cimwi kutegwa amugwasye. (Mk. 1:​40, 41) Mwaalu wazina lya Michael wakaamba kuti: “Ciindi nondipailila bamwi kujatikizya nzyobayandika, cindipa kwaazyiba kabotu mapenzi ngobajisi alimwi akubayanda. Kunze lyaboobo, ndilimvwa kuswena kapati kulimbabo nokuba kuti balo inga kabatazyi.” Mwaalu wazina lya Richard wakaamba bubotu abumbi buboola akaambo kakupailila bamwi. Wakaamba kuti: “Ciindi nopailila muntu umwi, cipa kuti ube aluyandisisyo lwakuyanda kucita cintu cimwi kutegwa umugwasye.” Wakayungizya kwaamba kuti: “Ciindi notugwasya muntu ngotupailila cacigaminina, cili mbuli kuti tugwasyilizya kwiingulwa kwamipailo yesu.”

7. Mbuti kupailila bamwi mbokukonzya kutugwasya kwaabona munzila yeelede mapenzi eesu? (Bafilipi 2:​3, 4) (Amubone azifwanikiso.)

⁷ Kupailila bamwi kulakonzya kutugwasya kwaabona munzila yeelede mapenzi eesu. (Amubale Bafilipi 2:​3, 4.) Toonse tulijisi mapenzi akaambo kakuba munyika eeyi yeendelezyegwa a Diabolosi. (1Joh. 5:19; Ciy. 12:12) Ikuti twaba acilengwa cakupailila bamwi, lyoonse tunooyeeya kuti “ciinga coonse cabakwesu munyika bainda mumapenzi ngoonya aaya.” (1Pet. 5:9) Mupainiya wazina lya Katherine wakaamba kuti: “Kupailila bamwi kwandigwasya kuyeeya kuti abamwi balijisi mapenzi. Kuyeeya kaambo aaka kwapa kuti kanditabikkili buyo maano kumapenzi aangu.”

MIPAILO YESU ILAYANDIKA KAPATI KULI BAMWI

8. Amupe zikozyanyo zyabantu mbotukonzya kubikkilizya mumipailo yesu.

⁸ Mbaani mbotukonzya kubikkilizya mumipailo yesu? Tulakonzya kupailila bantu baindene-indene. Mucikozyanyo, tulakonzya kupailila baabo bajisi penzi lyakuciswa, bakubusi ibapenzyegwa akuyungwa kucikolo naa aabo ibajisi buyumuyumu akaambo kakucembaala. Bunji bwabasyomima balaliyumya kukukazyigwa abanamukwasyi naa amfwulumende. (Mt. 10:​18, 36; Mil. 12:5) Bakwesu alimwi abacizyi bamwi basala kusiya maanda aabo akaambo kamanyongwe mpoonya bamwi balajatikizyigwa antenda zilicitikila. Masimpe kuti inga katutabazyi cacigaminina bakwesu abacizyi aaba. Pele ciindi notubapailila, tutondezya kuti tulautobela mulawo wa Jesu ‘wakuyandana umwi amweenzinyina.’—Joh. 13:34.

9. Nkaambo nzi ncotweelede kubapailila aabo basololela mumbunga ya Jehova alimwi abamakaintu babo?

⁹ Tulakonzya kubapailila aabo basololela mumbunga ya Jehova. Aaba babikkilizya bamu Kabunga Keendelezya abasikubagwasyilizya, bamuma Kkomiti aa Mitabi, balangizi bamumadipatimenti asiyene-siyene amutabi, balangizi bamabazu, baalu bambungano alimwi abakutausi. Bunji bwabakwesu aaba, balijisi mapenzi aabageme nokuba kuti balabeleka canguzu kutegwa batugwasye. (2Kor. 12:15) Mucikozyanyo, mulangizi wabbazu wazina lya Mark wakaamba kuti: “Penzi limwi lipati ndyondijisi, nkubelekela kulamfwu abazyali bangu bacembeede. Boonse bobilo balaciswa. Nokuba kuti balalanganizyigwa amucizyi wangu amulumaakwe, cilandicisa kapati akaambo kakuti tandicikonzyi kubagwasya kweelana ambondiyanda.” Tacikwe makani tulaazyi mapenzi aabo naa pe, tweelede kubapailila bakwesu aaba ibabeleka canguzu. (1Tes. 5:​12, 13) Alimwi tulakonzya kubapailila bamakaintu babo, nkaambo kubagwasyilizya nkobacita cakusyomeka kupa kuti bazumanane kwiilanganya mikuli yabo.

10-11. Sena Jehova ulaikkomanina mipailo njotupailila bakwesu abacizyi nokuba kuti tiitwabaamba cacigaminina? Amupandulule.

¹⁰ Kweelana ambotwaamba kale, kanji-kanji tulabapailila bakwesu abacizyi nokuba kuti tiitwabaamba cacigaminina. Mucikozyanyo, nokuba kuti kunyina mukwesu naa mucizyi ngotujisi mumizeezo, tulakonzya kulomba Jehova kuti abagwasye aabo baangidwe naa kuumbulizya baabo bakafwidwa bayandwa babo. Mwaalu wazina lya Donald wakaamba kuti, “Kuli bakwesu abacizyi banji ibajisi mapenzi cakuti zimwi ziindi tupailila buyo kuti Jehova abagwasye boonse ibajisi mapenzi.”

¹¹ Sena mipailo iili boobu ilamukkomanisya Jehova? Inzya. Amana buya tatukonzyi kwaazyiba cacigaminina mapenzi oonse ngobajisi bakwesu abacizyi. Aboobo, cileelela kupaila mipailo iili boobu. (Joh. 17:20; Ef. 6:18) Mipailo eeyi itondezya kuti ‘tulijisi luyando kuciinga coonse cabakwesu.’—1Pet. 2:17.

KUPAILILA BAMWI CACIGAMININA

12. Mbuti kubikkila maano kubukkale bwabamwi mbokukonzya kutugwasya kubapailila cacigaminina?

¹² Amubikkile maano kubukkale bwabamwi. Kunze aakupailila nkamu yabakwesu abacizyi, cilayandika kupailila bamwi cacigaminina. Sena mumbungano yanu kuli mukwesu naa mucizyi uuciswa bulwazi butaponi? Sena kuli mukubusi uutyompedwe akaambo kamasunko ngajana kucikolo? Sena kuli muzyali uuli alikke uujisi buyumuyumu bwakukomezya mwana “mululayo alwiiyo lwa Jehova”? (Ef. 6:4) Kwiinda mukubikkila maano kubukkale bwabamwi, muyoobayanda alimwi akubeetelela calo ciyoomukulwaizya kubapailila.b—Rom. 12:15.

13. Mbuti mbotukonzya kupailila baabo mbotutazyi?

¹³ Amupailile bamwi kwiinda mukubaamba mazina. Tulakonzya kucita oobo nokuba kumuntu ngotutazyibene limwi. Mucikozyanyo, amuyeeye kujatikizya bakwesu abacizyi baangidwe muzisi mbuli Crimea, Eritrea, Russia alimwi a Singapore. Awebbusaiti yesu ya jw.org, mulakonzya kujana mazina aabakwesu abacizyi baangidwe.c Mulangizi wabbazu wazina lya Brian wakaamba kuti: “Ndajana kuti kulemba zina lyamusyomima umwi waangidwe alimwi akulyaamba cakupozya, cilandigwasya kumuyeeya alimwi akumubikkilizya mumipailo yangu.”

14-15. Mbuti mbotukonzya kupailila bamwi cacigaminina?

¹⁴ Amupailile bamwi cacigaminina. Mukwesu Michael iwaambwa kale wakaamba kuti: “Ciindi nondibala zibalo a jw.org zyabakwesu abacizyi baangidwe, ndilasola kweezyeezya mbondikonzya kulimvwa ikuti nondali mubukkale bwabo. Ndilizyi kuti inga kandilibilika kujatikizya bakaintu bangu alimwi akuyanda kuti kabalanganizyigwa kabotu. Eeci cindipa kuti kandibapailila cacigaminina bakwesu baangidwe ibakwete.”—Heb. 13:​3, bupanduluzi buyungizyidwe.

¹⁵ Ciindi notusola kweezeezya buumi bwabakwesu abacizyi bali muntolongo, cilakonzya kutupa kuyeeya zintu zimbi nzyotukonzya kubikkilizya ciindi notubapailila. Mucikozyanyo, tulakonzya kupailila kuti balindizi bantolongo kababeendelezya caluzyalo bakwesu abacizyi baangidwe akuti aabo ibali muzyuuno zyabweendelezi babape lwaanguluko lwakukomba. (1Tim. 2:​1, 2) Kuyungizya waawo, tulakonzya kupailila kuti bakwesu abacizyi bayumizyigwe acikozyanyo cibotu cabaabo bali muntolongo, akuti aabo batali Bakamboni babone cikozyanyo cibotu cabakwesu abacizyi baangidwe akuyanda kuuswiilila mulumbe wesu. (1Pet. 2:12) Alimwi tulakonzya kucita mbubwenya oobo ciindi notupailila bakwesu abacizyi bali mumasunko. Kwiinda mukubikkila maano kubukkale bwabamwi, kubapailila kwiinda mukubaamba mazina alimwi akupaila cacigaminina, tuyootondezya kuti ‘tuyungizya luyando ndotujisi kuli umwi amweenzinyina.’—1Tes. 3:12.

MBOTUKONZYA KWIIBONA MUNZILA YEELEDE MIPAILO YESU

16. Mbuti mbotukonzya kwiibona munzila yeelede mipailo yesu? (Matayo 6:8)

¹⁶ Kweelana ambotwabona, mipailo yesu ilakonzya kupa kuti bukkale bwabaabo mbotupailila bucince. Nokuba boobo, tweelede kwiibona munzila yeelede. Ciindi notupaila tweelede kuyeeya kuti tatwaambili Jehova kujatikizya cintu ncatazyi naa kumwaambila cakucita, nkaambo Jehova ulizyi zintu nzyobayandika babelesi bakwe kabatanazyiba balo. (Amubale Matayo 6:8.) Aboobo, nkaambo nzi ncotweelede kupailila bamwi? Kunze aatwaambo twaambwa kale mucibalo eeci, kupailila bamwi kutondezya kuti tulabikkilana maano. Alimwi buya luyando ndolutukulwaizya kucita boobo. Kuyungizya waawo ciindi notupailila bamwi, Jehova ulakkomana akaambo kakuti twiiya luyando lwakwe.

17-18. Ino kupailila basyomima inga twakukozyanisya kunzi?

¹⁷ Nokuba kuti mipailo yesu yakupailila bamwi ilakonzya kulibonya kuti taikonzyi kupa kuti bukkale bucince, itondezya luyando ndotujisi kubakwesu abacizyi. Alimwi ciindi notucita boobo, Jehova ulabona. Eeci tulakonzya kucikozyanisya kubukkale oobu: Amweezeezye mukwasyi uujisi bana bobilo, kasankwa akasimbi. Kasankwa kalicisidwe. Kumane kasimbi kakombelezya bausyi kuti: “Bataata, amucite cintu cimwi kutegwa mwanookwesu apone nkaambo ulicisidwe kapati.” Bausyi balizyi kale cakucita kutegwa mwanaabo apone akaambo kakuti balamuyanda alimwi akumubikkila maano. Nokuba boobo, bausyi balakonzya kukkomana kapati ciindi nobabona kana kabo kasimbi kakamubikkila maano mwanookwabo alimwi akubakombelezya kuti bamugwasye.

¹⁸ Mbubwenya buyo, Jehova utukulwaizya kubikkilana maano alimwi akupaililana. Ciindi notucita oobo, tutondezya kuti tatulibikkili buyo maano pe, pele tulabayanda bakwesu abacizyi alimwi Jehova ulabona. (2Tes. 1:3; Heb. 6:10) Kweelana ambotwabona kale, zimwi ziindi mipailo njotupailila bamwi ilakonzya kupa kuti bukkale bucince. Aboobo, atucite kufwumbwa ncotukonzya kutegwa katupailila bamwi.