‘Muli Bantu Bayandwa Kapati’!

1-2. Ncinzi cikonzya kutugwasya kusinizya kuti tulayandwa kapati a Jehova?

AKATI kabantu ba Jehova kuli bamwi balimvwa kuti banyina mpindu. Cili boobo ambweni akaambo kakuti bamwi bakabeendelezya munzila iitali kabotu. Sena cintu cili boobu cakamucitikila kale? Ikuti kacili boobu, ncinzi cikonzya kumugwasya kusinizya kuti mulayandwa kapati a Jehova?

² Cintu cimwi cikonzya kumugwasya, nkubala zibalo zyamu Bbaibbele zyalo zitondezya Jehova mbwayanda kuti kabeendelezyegwa bantu. Mwanaakwe Jesu wakali kubalemeka bantu akubeendelezya caluzyalo. Kwiinda mukucita boobo, wakatondezya kuti walo alimwi a Bausyi balababikkila maano bantu balimvwa kuti banyina mpindu. (Joh. 5:19; Heb. 1:3) Mucibalo eeci, tulanga-langa: (1) Jesu mbwaakabagwasya bantu kuzyiba kuti balayandwa kapati a Jehova alimwi (2) mbotukonzya kusinizya kuti tulayandwa kapati a Jehova.—Hag. 2:7.

JESU MBWAAKABAGWASYA BANTU KUZYIBA KUTI BALAYANDWA KAPATI A JEHOVA

3. Ino Jesu wakabeendelezya buti bana Galilaya ibakaboola kulinguwe kutegwa abagwasye?

³ Ciindi Jesu naakali kukambauka ku Galilaya, bantu banji bakaboola kulinguwe kutegwa bamuswiilile alimwi akuponesyegwa kumalwazi aabo. Jesu wakabona kuti “bakali kupenzyegwa alimwi bakalimwaikide mbuli mbelele zitakwe mweembezi.” (Mt. 9:36) Basololi babo bazikombelo bakali kubasampaula mane buya akubaamba kuti “mbantu basinganizyidwe.” (Joh. 7:​47-49) Pele Jesu wakali kubeendelezya cabulemu alimwi acaluzyalo kwiinda mukujana ciindi cakubayiisya alimwi akubaponya kumalwazi aabo. (Mt. 9:35) Kunze lyaboobo, kutegwa acikonzye kugwasya bantu banji, wakayiisya baapostolo bakwe kutola lubazu mumulimo wakukambauka alimwi akubapa nguzu zyakuponya malwazi aayindene-indene.—Mt. 10:​5-8.

4. Ncinzi ncotwiiya kuli Jesu kujatikizya mbwaakabeendelezya aabo ibakali kulimvwa kuti banyina mpindu?

⁴ Kwiinda mukubeendelezya cabulemu alimwi acaluzyalo baswiilizi bakwe, Jesu wakatondezya kuti walo alimwi a Bausyi bababona kuti balayandika kapati aabo babonwa kuti banyina mpindu abamwi. Ikuti kamubelekela Jehova pele kamulimvwa kuti munyina mpindu, amuyeeye Jesu mbwaakabeendelezya bantu bali boobo balo ibakali kuyanda kuyiisyigwa anguwe. Kucita boobo kulakonzya kumugwasya kuzyiba kuti mulayandwa kapati a Jehova.

5. Ncinzi ncotuzyi kujatikizya mukaintu ngwaakayaanya Jesu ku Galilaya?

⁵ Jesu tanaakali kuyiisya buyo makamu aabantu pele wakali kumubikkila maano muntu umwi aumwi kumugama. Mucikozyanyo, ciindi naakali kukambauka ku Galilaya, wakayaanya mukaintu iwakali kuciswa kalobola kwamyaka iili 12. (Mk. 5:25) Kweelana a Mulawo, bulwazi bwakwe bwakali kumupa kusofwaala alimwi kufwumbwa iwakali kumujata wakali kusofwaala. Aboobo kuboneka kuti bunji bwaziindi mukaintu ooyu wakali kujanika buyo alikke. Kunze lyaboobo, tanaakali kukonzya kukomba Jehova kucikombelo alimwi tanaakali kukonzya kujanika kumapobwe. (Lev. 15:​19, 25) Tacidoonekwi kuti kunze buyo lyakuciswa, mukaintu ooyu wakali kulimvwa kuti unyina mpindu.—Mk. 5:26.

6. Ncinzi ncaakacita mukaintu iwakali kuciswa kalobola kutegwa aponesyegwe?

⁶ Mukaintu ooyu iwakali kupenga kapati wakaliyandide kuti Jesu amuponye. Pele tanaakali kukonzya kumusikila akumulomba. Nkaambo nzi? Ambweni wakali kufwa nsoni akaambo kabulwazi bwakwe. Naa ambweni wakali kuyoowa kuti Jesu ulakaka kumuponya akaambo kakuti wakanjila munkamu yabantu nokuba kuti wakalisofweede. Aboobo, wakajata buyo cisani cakwe caatala kajisi lusyomo lwakuti kucita boobo kwakali kuyoopa kuti abe kabotu. (Mk. 5:​27, 28) Alimwi wakaliluzi kuba alusyomo oolo nkaambo bulwazi bwakwe bwakapona ciindi naakajata cisani cakwe caatala. Pele Jesu wakabuzya kujatikizya wakamujata. Aboobo mukaintu ooyu wakaboola akulyaambilila kujatikizya ncaakacita. Ino Jesu wakamweendelezya buti mukaintu ooyu?

7 Ino Jesu wakamweendelezya buti mukaintu ooyu iwakapengede kapati? (Marko 5:34)

⁷ Jesu wakamweendelezya cabulemu alimwi acaluzyalo mukaintu ooyu iwakapengede kapati. Wakacita oobo nkaambo wakabona kuti mukaintu ooyu ‘wakaliyoowede alimwi wakali kukankama.’ (Mk. 5:33) Aboobo wakamuumbulizya. Mane buya wakamwiita kuti “mwanaangu.” Kwiinda mukubelesya bbala eeli, Jesu tanaakatondezya buyo kuti wakali kubikkila maano pele alimwi wakatondezya kuti wakajisi luzyalo aluyando. (Amubale Marko 5:34.) Eeci nceciindi cilikke mu Bbaibbele Jesu naakaita mukaintu kuti ‘mwanaangu.’ Kweelede kuti wakalibelesya bbala eeli mubukkale oobu akaambo kakuti wakabona kuti mukaintu ooyu ‘wakaliyoowede’ kapati. Amweezeezye buyo mukaintu ooyu mbwaakalimvwa! Kwiinda muzintu Jesu nzyaakaamba, wakamugwasya mukaintu ooyu kutalipa mulandu akaambo kakujata cisani cakwe alimwi akuba munkamu yabantu. Masimpe Jesu wakaliyandide kucita zinji kunze buyo lyakumuponya mukaintu ooyu. Wakali kuyanda kuti azyibe kuti wakali kuyandwa a Usyi wakwe wakujulu siluyando.

8. Mbuyumuyumu nzi mucizyi umwi waku Brazil mbwaakajisi?

⁸ Mazuba aano, nobaba babelesi ba Jehova bamwi balijisi malwazi aabapa kutyompwa akulimvwa kubula mpindu. Mucikozyanyo, mucizyi Mariaa mupainiya waciindi coonse waku Brazil wakazyalwa katajisi maulu alimwi ajanza lyakulumwensyi. Wakaamba kuti: “Lyoonse kucikolo bakali kundisampaula akaambo kabulema bwangu mane buya akundipa tuzina twakundinonga. Zimwi ziindi, nobaba banamukwasyi bakali kundeendelezya munzila iyakali kundipa kulimvwa kubula mpindu.”

9. Ncinzi cakagwasya mucizyi Maria kuzyiba kuti ulayandika kuli Jehova?

⁹ Ncinzi cakamugwasya mucizyi Maria? Ciindi naakaba umwi wa Bakamboni ba Jehova, bakombinyina bakamuumbulizya akumugwasya kulibona mbubwenya Jehova mbwamubona. Wakaamba kuti: “Bakwesu abacizyi ibakandigwasya mbanji cakuti ikuti ndatalika kubabandauka mazina, mane inga lyabbila! Ndilamulumba kapati Jehova kuzwa ansi aamoyo akaambo kakundipa mukwasyi ooyu mubotu wakumuuya.” Bakwesu abacizyi aabo bakamugwasya mucizyi Maria kuzyiba kuti ulayandika kapati mumeso aa Jehova.

10. Ndipenzi nzi lipati ndyaakajisi Mariya Magadalene? Ino lyakali kumupa kulimvwa buti? (Amubone azifwanikiso.)

¹⁰ Amubone muntu umwi Jesu ngwaakagwasya nkokuti Mariya Magadalene. Wakanjidwe madaimona aali ciloba. (Lk. 8:2) Kweelede kuti madaimona aaya akali kumupa kucita zintu munzila yakali kugambya bantu calo icakali kupa kuti kabamutantamuka. Wakapenga kapati alimwi kweelede kuti wakali kuyoowa akulimvwa kuti kunyina wakali kukonzya kumuyanda naa kumugwasya. Pele Jesu wakaatanda madaimona aakali kumupenzya alimwi wakaba sikumutobela. Nokuba boobo, ino muunzila nzi azimbi Jesu mwaakamugwasya Mariya Magadalene kuzyiba kuti wakali kuyandwa kapati a Jehova?

11. Ino Jesu wakamutondezya buti Mariya Magadalene kuti wakali kuyandwa kapati a Leza?(Amubone azifwanikiso.)

¹¹ Jesu wakatamba Mariya Magadalene kuti amusangane ciindi naakali kucita mulimo wakwe wakukambauka.b Akaambo kaceeci, wakazumanana kugwasyigwa amakani Jesu ngaakali kuyiisya bamwi. Alimwi Jesu wakalibonya kulinguwe buzuba naakabusyigwa. Ngonguwe ngwaakasaanguna kubandika limwi akati kabasikwiiya bakwe buzuba oobo. Kunze lyaboobo, Jesu wakamupa mulimo wakuti akaambile basikwiiya bakwe kuti wabusyigwa. Eelo kaka eezyi zyakali zitondezyo izyakali kumugwasya Mariya Magadalene kuzyiba kuti wakali kuyandwa a Jehova!—Joh. 20:​11-18.

12. Ncinzi cakapa mucizyi Lidia kulimvwa kuti wakanyina mpindu?

¹² Mbubwenya mbocakabede kuli Mariya Magadalene, ibanji mazuba aano balapenga akaambo kakulimvwa kuti banyina mpindu. Mucizyi Lidia waku Spain wakaamba kuti, katanazyalwa banyina bakali kuyanda kuligusya da. Nociba ciindi naakali kukomena tiibakali kumubikkila maano alimwi bakali kumwaambila zintu zibyaabi. Wakaamba kuti: “Akaambo kakuti bamaama tiibakali kunditondezya luyando, lyoonse ndakali kulombozya kuyandwa abamwi alimwi akuba mulongwe wabo. Nokuba boobo, ndakali kulibilika kuti kunyina wakali kukonzya kundiyanda tacikwe makani ancondakali kukonzya kucita akaambo kakuti bamaama bakali kundaambila kuti ndakali muntu mubyaabi.”

13. Ncinzi cakagwasya mucizyi Lidia kuzyiba kuti ulayandwa kapati a Jehova?

¹³ Ciindi mucizyi Lidia naakatalika kwiiya Bbaibbele, zintu zyakacinca. Kupaila kuli Jehova, kubala Bbaibbele, majwi aaluzyalo alimwi azintu nzyobakali kumucitila bakombinyina zyakamugwasya kuzyiba kuti wakali kuyandwa kapati a Jehova. Wakaamba kuti: “Balumi bangu kanji-kanji balandaambila mbobandiyanda kapati. Ziindi zinji balandiyeezya kujatikizya bube bwangu bubotu. Alimwi buya bakwesu abacizyi bamwi balacita mbubwenya oobo.” Mbubwenya mbuli mucizyi Lidia, kuli bamwi mumbungano ibayandika kugwasyigwa kuzyiba kuti balayandwa kapati a Jehova. Alimwi mulakonzya kubatondezya mbomubayanda kwiinda mumajwi aanu aaluzyalo alimwi azintu nzyomubacitila.

MBOTUKONZYA KULIBONA MBULI MBWATUBONA JEHOVA

14. Mbuti lugwalo lwa 1 Samuele 16:7 mbolutugwasya kulibona mbuli mbwatubona Jehova? (Amubone akabbokesi kakuti “Nkaambo nzi Jehova Ncababikkila Kapati Maano Bantu Bakwe?”)

¹⁴ Kamuyeeya kuti Jehova tamuboni mboimubona nyika. (Amubale 1 Samuele 16:7.) Bantu banji munyika babona muntu umwi kuti ulayandika akaambo kambwalibonya, mali ngajisi naa lwiiyo ndwaakatambula. Pele oobo tabusyi Jehova mbwamubona. (Is. 55:​8, 9) Aboobo, amusole kulibona mbwamubona Jehova ikutali mboimubona nyika. Mulakonzya kubala zibalo zyamu Bbaibbele zitondezya Jehova mbwaakali kubabona aabo ibakali kulimvwa kubula mpindu mbuli Elija, Naomi alimwi a Hana. Kunze lyaboobo, mulakonzya kulemba zintu izyakamucitikila mubuumi zyalo zitondezya kuti Jehova ulamuyanda alimwi akumubikkila maano. Kuyungizya waawo, mulakonzya kubala makani aajatikizya kulimvwa kubula mpindu aajanika mumabbuku eesu.c

15. Nkaambo nzi Jehova ncaakabona Daniele kuti ‘wakali muntu uuyandwa kapati’? (Daniele 9:23)

¹⁵ Kamuyeeya kuti kusyomeka kwanu kuli Jehova kupa kuti kamuli muntu uuyandwa kapati. Aciindi cimwi ambweni naakajisi myaka yakuma 90, musinsimi Daniele wakalimvwa ‘kukatala kapati’ alimwi akutyompwa. (Dan. 9:​20, 21) Pele mbuti Jehova mbwaakamukulwaizya? Wakatuma mungelo Gabriyeli kuti akamukulwaizye akumwaambila kuti ‘wakali muntu uuyandwa kapati’ akuti mipailo yakwe yakamvwugwa. (Amubale Daniele 9:23.) Ncinzi cakapa kuti Daniele kali muntu uuyandwa kapati a Leza? Wakali kuyandwa akaambo kakuti wakali mululami alimwi wakali kusyomeka. (Ezk. 14:14) Jehova wakapa kuti cibalo eeci cilembwe mu Jwi lyakwe kutegwa kacituumbulizya. (Rom. 15:4) Mbubwenya buyo, Jehova ulaiswiilila mipailo yanu akaambo kakuti mulayandika kulinguwe alimwi mulamubelekela cakusyomeka.—Mik. 6:8; Heb. 6:10.

16. Ncinzi cikonzya kumugwasya kubona Jehova kuba Taateesu siluyando?

¹⁶ Amubone Jehova kuba Taateesu siluyando. Uyanda kumugwasya ikutali kuyanda kumujanina milandu. (Int. 130:3; Mt. 7:11; Lk. 12:​6, 7) Kuyeeya kaambo aaka kwabagwasya bamwi ibalimvwa kubula mpindu. Mucikozyanyo, mucizyi Michelle waku Spain walo ulaakulimvwa kubula mpindu akaambo kakuti balumi bakwe balaakwaamba zintu zibi kujatikizya nguwe wakaamba kuti, “Kufwumbwa ndalimvwa kuti ndinyina mpindu, ndilasola kweezeezya Jehova kandinyamwide mumaanza aakwe akaambo kakuti ulandiyanda alimwi uyanda kundikwabilila.” (Int. 28:9) Mucizyi Lauren uukkala ku South Africa ulaakuliyeezya kuti, “Ikuti naa Jehova wakandikwela kulinguwe azyaanzyo zyaluyando, wali kundigwasya kwamyaka yoonse eeyi njondamubelekela cakusyomeka alimwi akundibelesya kuyiisya bamwi, nkokuti ndili masimpe kuti ndilayandika kapati kulinguwe.”—Hos. 11:4.

17. Ncinzi cikonzya kumugwasya kusyoma kuti Jehova ulamukkomanina? (Intembauzyo 5:12) (Amubone acifwanikiso.)

¹⁷ Amusyome kuti Jehova ulamukkomanina. (Amubale Intembauzyo 5:12.) Davida wakakozyanisya kukkomaninwa a Jehova ‘kuntobo mpati’ yalo iikwabilila bantu bakwe balulami. Kuzyiba kuti Jehova ulamukkomanina alimwi akumugwasya, kulakonzya kumupa kuleka kulimvwa kubula mpindu. Pele mbuti mbomukonzya kuzyiba kuti Jehova ulamukkomanina? Mbubwenya mbotwabona kale, kwiinda mu Jwi lyakwe ulatwaambila mbwalimvwa kujatikizya ndiswe. Kunze lyaboobo, ubelesya baalu, balongwe abamwi kutuyeezya kuti tulayandika kapati mumeso aakwe. Aboobo, ino mweelede kulimvwa buti ciindi bamwi nobamulumbaizya?

18. Nkaambo nzi ncomweelede kuzumina kulumbaizyigwa abamwi?

¹⁸ Tamweelede kukaka kulumbaizyigwa abamwi kwaambisya aabo bamuzyi alimwi ibamuyanda. Kamuyeeya kuti Jehova ulakonzya kubabelesya kumutondezya kuti ulamukkomanina. Mucizyi Michelle iwaambwa kale wakaamba kuti: “Asyoonto-syoonto, ndakaiya kwaasyoma majwi aaluzyalo ngobandaambila bamwi. Masimpe nciyumu kusyoma zintu zibotu nzyobaamba kujatikizya ndime pele ndazyiba kuti Jehova uyanda kuti kandizumina kulumbaizyigwa.” Mucizyi Michelle wagwasyigwa amajwi aaluzyalo ngobamwaambila baalu kubona kuti Jehova ulamukkomanina. Lino ulabeleka kali mupainiya waciindi coonse alimwi akugwasyilizya milimo yaa Beteli kabelekela kuŋanda.

19. Nkaambo nzi ncomukonzya kusyoma kuti mulayandwa kapati a Leza?

¹⁹ Jesu wakatuyeezya kuti tulayandika kapati mumeso aa Taateesu wakujulu. (Lk. 12:24) Aboobo tulakonzya kuba masimpe kuti tulayandwa kapati anguwe. Tatweelede kukaluba kaambo aaka pe. Kunze lyaboobo, atucite cili coonse ncotukonzya kugwasya bamwi kuzyiba kuti abalo balayandwa kapati a Leza.