Ncotwiiya Kumazuba Aali 40 Aamamanino Aabuumi bwa Jesu Bwaanyika

1-2. Ncinzi cakacitika ciindi basikwiiya ba Jesu nobakali kuunka ku Emau?

MWAKALI mu Nisani 16, 33 C.E. Basikwiiya ba Jesu bakaluuside kapati alimwi lyakalibalekede. Basikwiiya bobilo bakazwa ku Jerusalemu akuunka ku Emau munzi uulampa makilomita aali 11 kuzwa ku Jerusalemu. Baalumi aaba bakalityompedwe akaambo kakuti Jesu, imwaalumi ngobakali kutobela wakazwide akujaigwa. Bakali kulangila kuti Mesiya wakali kuyoobacitila zintu zibotu ba Juda, pele lino wakalifwide. Mpoonya kwakacitika cintu cimwi cigambya.

² Muntu ngobatakazyi wakasika mpobakabede akutalika kweenda ambabo. Basikwiiya bakatalika kumwaambila zintu zyuusisya izyakacitikila Jesu. Mpoonya mwaalumi ooyu ngobatakazyi wakatalika kubaambila zintu nzyobatakali kuyooluba. Wakabapandulwida kaambo Mesiya ncaakeelede kupenga alimwi akufwa kwiinda mukubelesya Magwalo alimwi abusinsimi. Ciindi baalumi aaba nobakasika ku Emau, bakazyiba kuti mwaalumi ooyu ngobakali limwi wakali Jesu walo Leza ngwaakabusya kuzwa kubafwu! Tulakonzya kweezeezya mbobakakkomana kapati kuzyiba kuti Mesiya wakali muumi!—Lk. 24:​13-35.

3-4. (a) Ino Jesu wakabagwasya buti basikwiiya bakwe, alimwi ncinzi cakacitika? (b) Ncinzi ncotutiilange-lange mucibalo eeci? (Milimo 1:3)

³ Jesu wakali kulibonya kwaziindi zili mbozibede kuli basikwiiya bakwe kwamazuba aaya aali 40 aamamanino aabuumi bwakwe bwaanyika.a (Amubale Milimo 1:3.) Wakabakulwaizya basikwiiya bakwe ibakauside alimwi akutyompwa. Bakakkomana kapati akuba basicamba ciindi nobakali kukambauka alimwi akuyiisya makani mabotu aa Bwami.

⁴ Tulakonzya kugwasyigwa kapati kwiinda mukwiiya ncaakacita Jesu aciindi eeco. Mucibalo eeci, tulalanga-langa Jesu mbwaakacibelesya ciindi eeci (1) kukulwaizya basikwiiya bakwe, (2) kubagwasya kumvwisya Magwalo alimwi (3) kubayiisya kulanganya mikuli mipati. Mubukkale bumwi abumwi, tulabona mbotukonzya kwiiya cikozyanyo ca Jesu.

AMUBAKULWAIZYE BAMWI

5. Nkaambo nzi basikwiiya ba Jesu ncobakali kuyandika kukulwaizyigwa?

⁵ Basikwiiya ba Jesu bakali kuyandika kukulwaizyigwa. Nkaambo nzi? Nkaambo kakuti bamwi bakasiya maanda aabo, mikwasyi alimwi amakwebo kutegwa batobele Jesu. (Mt. 19:27) Bamwi bakali kweendelezyegwa cakutalulama akaambo kakuti bakaba basikwiiya bakwe. (Joh. 9:22) Bakalyaaba kucita zintu zyoonse eezyi akaambo kakuti bakali kusyoma kuti Jesu ngonguwe wakali Mesiya wakasyomezyedwe. (Mt. 16:16) Pele ciindi Jesu naakajaigwa, bakausa kapati alimwi bakatyompwa nkaambo bakayeeya kuti ncobakali kulangila tiicakali kuyoocitika.

6. Ncinzi Jesu ncaakacita naakabusyigwa?

⁶ Jesu wakali kumvwisya kuti tiicakalubide kuli basikwiiya bakwe kuusa ciindi naakafwa. Kunze lyaboobo, wakalizyi kuti kuusa kwabo tiikwakali kwaamba kuti bakanyina lusyomo. Aboobo mubuzuba mbubwenya mbwaakabusyigwa, wakatalika kubakulwaizya balongwe bakwe. Mucikozyanyo, wakalibonya kuli Mariya Magadalene ciindi naakali kulila acuumbwe cakwe. (Joh. 20:​11, 16) Kuzwa waawo, wakalibonya kuli basikwiiya bobilo mbotwaambide kumatalikilo aacibalo eeci. Alimwi wakalibonya akumwaapostolo Petro. (Lk. 24:34) Ncinzi ncotukonzya kwiiya kucikozyanyo ca Jesu? Lino amuleke tubone cakacitika ciindi naakalibonya kuli Mariya Magadalene.

7. Kweelana alugwalo lwa Johane 20:​11-16, ncinzi Jesu ncaakabona calo ncaakali kucita Mariya mafwumofwumo aamu Nisani 16? Ino eeci cakamupa kucita nzi Jesu? (Amubone acifwanikiso.)

⁷ Amubale Johane 20:​11-16. Mafwumofwumo aamu Nisani 16, bamakaintu bamwi bakaunka kucuumbwe nkwaakazikkilidwe Jesu. (Lk. 24:​1, 10) Amuleke tubikkile maano kucintu cakacitikila mukaintu omwe, Mariya Magadalene. Ciindi naakasika acuumbwe, wakajana kunyika cakaliko. Wakaunka kuyakwaambila Petro a Johane. Mpoonya bamaalumi aaba bakabalika kuunka kucuumbwe alimwi awalo Mariya wakabatobela. Ciindi nobakajana kuti taakwe ciliko mucuumbwe, bamaalumi aaba bakajoka kuŋanda. Pele Mariya walo wakasyaala kumwi kalila. Kakunyina ancaakabwene, Jesu walo wakali kumulangilila. Jesu wakaibona misozi yamukaintu ooyu iwakali kusyomeka alimwi wakali kuyanda kumuumbulizya. Wakalibonya kuli Mariya alimwi akucita cintu cimwi catakali kukatazya calo icakamukulwaizya kapati. Wakaambaula anguwe akumupa mulimo uuyandika kapati wakwaambila ibanabokwabo kujatikizya bubuke bwa Jesu.—Joh. 20:​17, 18.

8. Mbuti mbotukonzya kumwiiya Jesu?

⁸ Mbuti mbotukonzya kumwiiya Jesu? Tulakonzya kumwiiya kwiinda mukukulwaizya bakwesu alimwi abacizyi kuzumanana kubelekela Jehova. Mbubwenya mbuli Jesu, tweelede kubikkila maano kumapenzi ngobajana bamwi, kusolekesya kumvwisya mbobalimvwa alimwi akubaumbulizya. Amumvwe cakuluula camucizyi wazina lya Jocelyn, iwakafwidwa mwanookwabo musimbi muntenda. Wakaamba kuti: “Kwamyezi minji ndakali kuusa kapati.” Nokuba boobo, banabukwetene bamwi bakamutamba kuŋanda yabo akumuswiilila cakubikkila maano ciindi naakali kwaamba mbwaakali kulimvwa. Bakamweendelezya caluzyalo alimwi akumwaambila kuti Jehova ulamubikkila maano kapati. Mucizyi Jocelyn wakaamba kuti: “Ndakalimvwa mbuli kuti ndanyikila mulwizi. Pele Jehova wakabelesya banabukwetene aaba kundivwuna. Bakandigwasya kubukulusya makanze aangu aakuzumanana kubelekela Jehova.” Andiswe tulakonzya kubakulwaizya bamwi ikuti katubikkila maano kujatikizya mbobalimvwa alimwi akuswiilila cakubikkila maano ciindi nobaambaula. Kuti twacita oobo, tulakonzya kubaumbulizya alimwi akubagwasya kuzumanana kubelekela Jehova.—Rom. 12:15.

AMUBAGWASYE BAMWI KUMVWISYA JWI LYA LEZA

9. Mbuyumuyumu nzi basikwiiya ba Jesu mbobakajana? Ino mbuti Jesu mbwaakabagwasya?

⁹ Basikwiiya ba Jesu bakalizumina Jwi lya Leza akusolekesya kusikila mpobagolela kulibelesya mubuumi bwabo. (Joh. 17:6) Pele kunyina nobakamvwisya kaambo Jesu ncaakafwida mbuli cigwebenga. Jesu wakazyiba kuti basikwiiya bakwe bakalijisi lusyomo alimwi bakali kumuyanda Jehova, pele wakabona kuti bakali kuyandika kwaamvwisya kabotu Magwalo. (Lk. 9:​44, 45; Joh. 20:9) Aboobo wakabagwasya kumvwisya ncozyakali kwaamba nzyobakali kubala mu Magwalo. Amubone ncaakacita kuli basikwiiya bakwe bobilo nobakali munzila kuya ku Emau.

10. Mbuti Jesu mbwaakagwasya basikwiya bakwe kumvwisya kuti wakali Mesiya? (Luka 24:​18-27)

¹⁰ Amubale Luka 24:​18-27. Amubone kuti Jesu tanaakafwambaana kuliyubununa kulimbabo. Muciindi caboobo, wakababuzya mibuzyo. Nkaambo nzi ncaakacitila boobo? Ambweni wakali kuyanda kuti bamwaambile ncobakali kuyeeya alimwi buya bakamwaambila. Bakamwaambila kuti bakali kulangila Jesu kuti abavwune bana Israyeli kuzwa kukudyaamininwa abweendelezi bwabana Roma. Jesu wakabalekela kuti baambe mbobakali kulimvwa. Mpoonya wakabelesya Magwalo, kubagwasya kumvwisya kuti businsimi bunji bwakazuzikizyigwa.b Mangolezya ngoonya aayo, Jesu wakaswaangana abasikwiiya bambi akubapandulwida ncobwakali kwaamba businsimi oobu. (Lk. 24:​33-48) Ncinzi ncotukonzya kwiiya kucibalo eeci?

11-12. (a) Ncinzi ncotukonzya kwiiya kunzila Jesu mbwaakali kuyiisya kasimpe kamu Bbaibbele? (Amubone azifwanikiso.) (b) Mbuti mukwesu Nortey mbwaakagwasyigwa amukwesu iwakali kumuyiisya Bbaibbele?

¹¹ Mbuti mbotukonzya kumwiiya Jesu? Cakusaanguna, ciindi nomusololela ziiyo zya Bbaibbele, amubuzye mibuzyo iiyandika yalo iikonzya kugwasya basikwiiya kutegwa baambe mbobalimvwa. (Tus. 20:5) Mwamana kuzyiba mbobalimvwa, amubagwasye kujana tupango twamu Bbaibbele tukonzya kubagwasya mubukkale mobabede. Mpoonya mutabaambili cakucita. Muciindi caboobo, amubabuzye mibuzyo kujatikizya tupango twamu Bbaibbele. Amubakulwaizye kuzinzibala kuyeeya nzyobabala alimwi ambobakonzya kuzibelesya. Amumvwe cakuluula camukwesu Nortey waku Ghana.

¹² Ciindi mukwesu Nortey naakajisi myaka iili 16, wakatalika kwiiya Bbaibbele. Aboobo kalitanalampa, banamukwasyi bakatalika kumukazya. Ncinzi cakamugwasya kuzumanana kwiiya Bbaibbele? Mukwesu iwakali kumuyiisya Bbaibbele wakabelesya lugwalo lwa Matayo caandaano 10 kumupandulwida kuti Banakristo bakasimpe bayoopenzyegwa. Mukwesu Nortey wakaamba kuti: “Ciindi kupenzyegwa nokwakatalika, ndakasinizya kuti ndakakajana kasimpe.” Mukwesu iwakali kumuyiisya Bbaibbele alimwi wakamutondezya lugwalo lwa Matayo 10:16 ilwaamba kuti tweelede kuba bantu bacenjede. Mpoonya bakabandika mbwakonzya kubelesya kapango aaka kupandulwida banamukwasyi kujatikizya nzyasyoma cabulemu. Naakamana kubbapatizyigwa, mukwesu Nortey wakali kuyanda kutalika bupainiya, pele bausyi bakali kulangila kuti aunke kuyunivesiti. Muciindi cakumwaambila ncaakeelede kucita mukwesu Nortey, mukwesu iwakali kumuyiisya Bbaibbele wakamubuzya mibuzyo kumugwasya kumvwisya tupango twamu Bbaibbele alimwi akusala ciluzi. Ino ncinzi cakazwa mpawo? Mukwesu Nortey wakasala kutalika bupainiya bwaciindi coonse. Akaambo kaceeci, bausyi bakamutanda aŋanda. Ino mukwesu Nortey ulimvwa buti kujatikizya ceeci cakamucitikila? Wakaamba kuti: “Ndilisinizyide kuti ndakasala ciluzi.” Aboobo ciindi notugwasya bamwi kuzinzibala kuyeeya ncaamba Magwalo, tupa kuti lusyomo lwabo luyume alimwi tulabagwasya kuzumanana kubelekela Jehova.—Ef. 3:​16-19.

AMUBAGWASYE BAKWESU KWEELELA KUBA “ZIPEGO MUBANTU”

13. Ncinzi Jesu ncaakacita kutegwa abe masimpe kuti mulimo wakukambauka wakali kuyoozumanana noliba leelyo naakali kuyoopiluka kujulu? (Baefeso 4:8)

¹³ Naakali anyika, Jesu wakacita zyoonse nzyobakamwaambila kucita Bausyi. (Joh. 17:4) Pele Jesu wakalizyi kuti tanaakali nguwe alikke iwakali kukonzya kucita kuyanda kwa Jehova. Naakali kucita mulimo wakwe aano anyika kwamyaka yotatwe acisela, wakayiisya abamwi. Jesu wakali kubasyoma basikwiiya bakwe. Wakabapa mukuli wakukambauka makani mabotu alimwi akulanganya bantu ba Jehova bayandika kapati. Basikwiiya bamwi ibakali kusololela mumulimo kulangilwa kuti bakajisi myaka iitasiki ku 30. (Amubale Baefeso 4:8.) Bamaalumi aaba bakabeleka canguzu a Jesu alimwi bakali kusyomeka kulinguwe. Pele katanapiluka kujulu, wakabayiisya zinji kutegwa beelele kuba “zipego mubantu.”

14. Ncinzi Jesu ncaakayiisya basikwiiya bakwe mumazuba aali 40 aamamanino aabuumi bwakwe bwaanyika? (Amubone acifwanikiso.)

¹⁴ Jesu wakabapa lulayo lwakutainda mumbali basikwiiya bakwe pele munzila yaluyando. Mucikozyanyo, wakabona kuti basikwiiya bakwe bamwi bakajisi cilengwa cakudooneka, aboobo wakabapa lulayo. (Lk. 24:​25-27; Joh. 20:27) Alimwi wakabaambila kuti bakeelede kubikkila maano kumulimo wakulanganya bantu ba Jehova muciindi camakwebo aabo. (Joh. 21:15) Kunze lyaboobo, wakabayeezya kutalyeezyanisya abamwi caboola kuzintu nzyobacita mumulimo wa Jehova. (Joh. 21:​20-22) Wakalulamika mizeezo iitaluzi njobakajisi kujatikizya Bwami akubagwasya kubikkila maano kumulimo wakukambauka makani mabotu. (Mil. 1:​6-8) Ino ncinzi baalu ncobakonzya kwiiya kuli Jesu?

15-16. (a) Muunzila nzi baalu mobakonzya kumwiiya Jesu? (b) Mbuti mukwesu Patrick mbwaakagwasyigwa alulayo?

¹⁵ Ncinzi baalu ncobakonzya kwiiya kuli Jesu? Beelede kuyiisya alimwi akugwasya bamaalumi, nobaba baabo ibacili bana kutegwa beelele kupegwa mikuli mipati.c Baalu balamvwisya kuti bakwesu aaba bayandika kwiiya zintu zinji. Beelede kuyiisya bakwesu aaba bacili bana munzila yaluyando, kutegwa baiye kuba bantu balicesya, basyomwa alimwi ibalyaabide kugwasya bamwi.—1Tim. 3:1; 2Tim. 2:2; 1Pet. 5:5.

¹⁶ Atubone mukwesu wazina lya Patrick mbwaakagwasyigwa akaambo kakupegwa lulayo. Naakacili mwana, wakajisi cilengwa cakuhalamuka alimwi akutabeendelezya kabotu bamwi, nobaba bacizyi. Mwaalu umwi wakabona kuti mukwesu Patrick wakali kuyandika kucinca, aboobo wakamupa lulayo lwakutainda mumbali pele munzila yaluzyalo. Mukwesu Patrick wakaamba kuti: “Ndilalumba kapati akaambo kakuti wakandipa lulayo. Ndakali kutyompwa ciindi nondakali kubona bakwesu bamwi kabapegwa mikuli njondakali kuyanda. Pele lulayo ndwaakandipa mwaalu, lwakandigwasya kubona mbociyandika kubikkila maano kubelekela bakwesu abacizyi muciindi cakubikkila maano kukupegwa mikuli mumbungano.” Akaambo kaceeci mukwesu Patrick wakasalwa kuba mwaalu naakajisi myaka yakuzyalwa iili 23.—Tus. 27:9.

17. Mbuti Jesu mbwaakatondezya kuti wakali kubasyoma basikwiiya bakwe?

¹⁷ Jesu tanaakabapa buyo mukuli wakukambauka basikwiiya bakwe pele alimwi wakabapa amukuli wakuyiisya. Basikwiiya ambweni bakalimvwa kuti tiibakali kweelela kupegwa mukuli ooyu. Cakutadooneka, Jesu wakalizyi kuti bakali kuyoocikonzya kuucita mulimo ooyu alimwi wakabaambila oobo. Kaamba kujatikizya lusyomo ndwaakajisi mulimbabo, wakaamba kuti: “Mbubonya Taata mbwaakandituma, andime ndilamutuma.”—Joh. 20:21.

18. Mbuti baalu mbobakonzya kumwiiya Jesu?

¹⁸ Mbuti baalu mbobakonzya kumwiiya Jesu? Baalu basongo balabapa bamwi mikuli. (Flp. 2:​19-22) Mucikozyanyo, baalu balakonzya kubikkilizya bana mumulimo wakulanganya Ŋanda ya Bwami alimwi akusalazya. Baalu balakonzya kubapa mulimo wakucita bakwesu, kubayiisya mbobakonzya kuucita alimwi akubasyoma kuti inga baucita. Mwaalu wakasalwa caino-ino wazina lya Matthew wakaamba kuti ulabalumba kapati baalu ibakamuyiisya cakulomya kuzuzikizya mukuli umwi mpoonya akumusyoma kuti ulakonzya kuuzuzikizya alikke. Wakati, “Ndakagwasyigwa kapati nobakali kubona kulubizya kwangu kuti cakali cibeela cakwiiya kumane bakali kundigwasya kuyaambele.”d

19. Ino ncinzi ncotweelede kukanza kucita?

¹⁹ Jesu wakabelesya mazuba aali 40 aamamanino abuumi bwakwe aano anyika kukulwaizya akuyiisya bamwi. Andiswe atube amakanze aakutobela cikozyanyo cakwe cakulomya. (1Pet. 2:21) Tuli masimpe kuti uyootugwasya kucita boobo. Amana buya, wakasyomezya kuti: “Ndilaandinywe mazuba oonse mane kusikila kumamanino aabweende bwazintu.”—Mt. 28:20.