‘Amuzumanane Alukamantano Lwamuuya’
MWAAPOSTOLO Paulo wakakulwaizya Banakristo baku Efeso kuzumanana ‘kweengelelana caluyando alimwi akusoleka camoyo woonse kuzumanana alukamantano lwamuuya mucaanzyo caluumuno.’—Ef. 4:2, 3.
‘Lukamantano’ ndotujisi lulaboola akaambo kamuuya uusalala wa Leza. Nokuba boobo, mbubwenya mwaapostolo Paulo mbwaakatondezya, kuyandika kubeleka canguzu kutegwa lukamantano oolu luzumanane. Pele ino nguni weelede kubeleka canguzu? Munakristo umwi aumwi weelede kucita lubazu lwakwe kutegwa ‘lukamantano lwamuuya’ luzumanane.
Amweezeezye kuti muntu umwi wamupa moota. Nguni weelede kuulanganya kutegwa kaulibonya kabotu? Bwiinguzi mbwakuti ndinywe. Tamukonzyi kumupa mulandu muntu iwakamupa moota ikuti wanyonyooka akaambo kakuti mwaalilwa kuulanganya.
Mbubwenya buyo, lukamantano ndotujisi ncipego kuzwa kuli Jehova. Pele umwi aumwi weelede kucita lubazu lwakwe ikupa kuti lukamantano oolu luzumanane. Ikuti katutamvwani amukombima, tweelede kulibuzya kuti, ‘Sena ndili mukucita lubazu lwangu kubambilila lukamantano lwamuuya oolu?’
“KAMUSOLEKA CAMOYO WOONSE” KUZUMANANA KUBAMBILILA LUKAMANTANO
Kweelana ancaakalemba Paulo, tulakonzya kubona kuti talili lyoonse nocikonzya kuba cuubauba kuba muluumuno abakwesu abacizyi ikwaambisya ikuti umwi watunyemya. Pele sena lyoonse tweelede kumusikila iwakatulubizyila kutegwa tubandike anguwe? Peepe. Amulibuzye kuti, ‘Sena kubandika amuntu ooyu kujatikizya makani aaya inga kwasumpula luumuno naa inga kwapa kuti zintu ziindile kubija?’ Zimwi ziindi ncamaano kwiile kumulekelela buyo muntu ooyo naa kwaaluba buyo makani aayo.—Tus. 19:11; Mk. 11:25.
Amulibuzye kuti, ‘Sena kubandika amuntu ooyu kujatikizya makani aaya inga kwasumpula luumuno naa inga kwapa kuti zintu ziindile kubija?’
Mbubwenya mbwaakalemba Paulo, atuzumanane ‘kweengelelana caluyando.’ (Ef. 4:2) Bbuku limwi lyakaamba kuti ibbala eeli lilakonzya kwaamba “kuzumina muntu mbubonya mbwabede.” Eeci caamba kuti tweelede kuzumina kuti bakwesu abacizyi tabalondokede mbubwenya mbuli ndiswe. Mubwini toonse buyo tusola kusama “buntu bupya.” (Ef. 4:23, 24) Nokuba boobo, kunyina akati kesu uukonzya kucita boobo cakulondoka. (Rom. 3:23) Ikuti twakazumina kaambo aaka, ciyootuubila kweengelelana, kuba bantu balekelela alimwi ‘akuzumanana alukamantano lwamuuya.’
Tuyooba ‘acaanzyo caluumuno’ mumbungano ikuti katulekelelana akuluba zintu zibi nzyobatucitila bamwi. Bbala lya Chigiriki ilyakasandululwa kuti ‘caanzyo caluumuno’ kulugwalo lwa Baefeso 4:3, lisanduludwe kuti ‘milambi’ kulugwalo lwa Bakolose 2:19. Milambi ipa kuti zifwuwa zijatane. Mbubwenya buyo, luumuno alimwi aluyando ndotujisi kubakwesu abacizyi luyootugwasya kuzumanana kumvwana ambabo nokuba kuti bacita cintu icatunyemya.
Aboobo ikuti mukombima watunyemya, tweelede kusola kumumvwisya muciindi cakumujanina kampenda. (Kol. 3:12) Akaambo kakuti toonse tatulondokede, kweelede kuti andinywe aciindi cimwi mwakanyemya kale muntu. Kuyeeya kaambo aaka, kuyootugwasya “kuzumanana alukamantano lwamuuya.”