Kufwambaana Kuyaka Maanda aa Bwami

EELO kaka cilakkomanisya kubona kuti Jehova wapa kuti bukombi bwakasimpe bufwambaane kukomena nyika yoonse mboizulwa! (Is. 60:22) Aboobo kuciyandika Maanda aa Bwami aambi manji. Munyika yoonse, Maanda aa Bwami aayinda ku 13,000 ayandika kuyakwa naa kubambululwa.

Kutegwa mulimo ooyu ufwambaane kucitwa kakunyina kusowa mali manji kapati, Kabunga Keendelezya kasala kuti kube kucinca mumadipatimenti aaindene-indene aalanganya mulimo wakuyaka. Dipatimenti iyakapangwa lino-lino aawa iilanganya mayake munyika yoonse iitegwa Worldwide Design/Construction Department (WDC), yalo iili kumaofesi mapati ku Brooklyn, New York, yalikubeleka canguzu kubona mayake aayandika kuyakwa naa kubambululwa cakufwambaana munyika yoonse. Madipatimenti aalanganya mayake muzyooko zyaandene-andeene zyanyika aategwa Regional Design/Construction Departments (RDC) mumitabi yaku Australasia, Central Europe, South Africa alimwi a United States alikulanganya mayake muzyooko zyanjiyo, kaabikkila maano kapati mukuyaka Maanda aa Bwami cakufwambaana alimwi cakutasowa mali manji. Kunze lyaboobo, madipatimenti aa RDC ayiisya bakumitabi yamuzyooko zyangawo kubambulula maanda aacitilwa milimo ya Leza mucilawo camutabi umwi aumwi. Mpoonya kumutabi umwi aumwi, dipatimenti iilanganya mayake mucisi iitegwa Local Design/Construction Department (LDC) njiiyendelezya mulimo wakuyaka akubambulula Maanda aa Bwami alimwi a Maanda Aamiswaangano Mipati.

Mu January 2015, baalu boonse mu United States bakajanika kumuswaangano uukomanisya; muswaangano ooyu wakacitwa kwiinda mukukwabana muvidiyo alimwi wakali kupandulula bubambe bupya bwakupanga mapulani aamayake, ikuyaka, alimwi akubamba Maanda aa Bwami. Nzyeezi nzyobakaiya:

• Kuyaka: Mapulani alimwi azibelesyo zyakuyasya zinakwiindana-indana kweelana abusena kuyakilwa mayake alimwi amalailile aazwa ku Kkomiti Iilanganya Zimwaigwa ya Kabunga Keendelezya. Maanda aayakwa anooli mayumu, anoolibonya kabotu, alimwi taanooyandiki kubelesya maali manji kwaabamba.

• Kubamba: Basikulisungula mumbungano imwi aimwi banooyiisyigwa mbobakonzya kubamba masena eesu aakukombela alimwi akupa kuti kaakkala kwaciindi cilamfwu.

Masimpe, mulimo wakuyaka akubamba masena eesu aakukombela mupati kapati. Nokuba boobo, lukamantano lwabantu ba Leza mukucita mulimo ooyu, bulapa kuti mulimo ufwambaane kucitwa kwiinda mukwaabelesya kabotu mali aasangwa.