Ino Mwakali Kuli Mazuba Oonse?

KAKUTANAINDA ciindi kuzwa nondakabbapatizyigwa baalu bakandibuzya naa inga ndayanda kuyungizya mulimo wangu. Mu May 4, 1992, ndakajanika kumuswaangano waalubazu iwakali kucitilwa baabo ibakalibambilide kuunka kuyoobelekela kubusena kubulide. Buzuba bwakatobela, mebo amweenzuma ngotwakali kuunka limwi, twakaunka kucito ca Batumi mucooko ca Ajaria.

Ciindi cakusaanguna nondakakambaukila mu Batumi, ndakaliyoowede kapati. Ndakalibuzya kuti, ‘Ino ndilatalika buti kubakambaukila bantu?’ Ndakagambwa mbwaakacita mukaintu ngondakasaanguna kubandika limwi, walo iwakaamba kuti: “Ino mwakali kuli mazuba oonse?” Wakaliyandide kapati kuzyiba zinji kujatikizya Bakamboni cakuti wakatalika kwiiya Bbaibbele andiswe buzuba bwakatobela!

Katutanazwa ku Batumi, twakatambula mulongo wamakkeyala aabantu bajisi luyandisisyo. Mbwaanga tiitwakalilizyi kabotu dolopo eeli, twakasola kubuzya bantu mumugwagwa kutegwa batulailile kujanika bantu aaba. Banji tiibakacikonzya kutugwasya nkaambo tiikwakaningainda ciindi cilamfwu kuzwa ciindi migwagwa minji noyakacincwa mazina, nokuba boobo bantu aaba mbabonya bakatondezya luyandisisyo kumulumbe wesu. Tiilyakalampa, twakatalika kweendelezya ziiyo zya Bbaibbele mutubunga twabantu basika ku 10 naa 15.

Nokwakainda buyo myezi yone kuzwa notwakasika, bantu bainda ku 40 bakali kujanika lyoonse kumiswaangano yesu. Aboobo twakalibuzya kuti, ‘Ino nguni uunoobalanganya bantu aaba bapya?’ Mpoonya akaambo kakuzwangana ikwakaliko akati kampi yabasikalumamba bamucisi ca Georgia alimwi abasikuzanduka baku Abkhazia, boonse bantu ibakali mumbungano mondakabede kaindi bakalongela ku Batumi. Aboobo mbungano mpya iijisi baalu abapainiya bacibwene yakapangwa mubuzuba bomwe buyo!