Mulakonzya Kutola Lubazu Mukuyumya Lukamantano Lwesu lwa Bunakristo—Munzila Nzi?

1. Kuzwa kumatalikilo, ino mbube nzi bwatondezyegwa mumilimo ya Leza?

JEHOVA a Jesu balikamantene kuzwa kumatalikilo zintu nozyakatalika kulengwa. Jehova wakasaanguna kulenga Jesu katanalenga zintu zimbi zyoonse. Mpoonya Jesu wakabeleka anguwe alimwi ‘wakali kumbali lyakwe kali mubelesi uucibwene.’ (Tusimpi 8:30) Babelesi ba Jehova abalo bakalikamantene mukubeleka mulimo ngobakeelede kucita. Mucikozyanyo, Nowa amukwasyi wakwe bakabelekela antoomwe kuyaka bwato. Mukuya kwaciindi, bana Israyeli bakabelekela antoomwe kuyaka tente lyakukombela, kulimwaya, alimwi akulinyamuna kuzwa kubusena bumwi kuya kubusena bumbi. Kutempele, bakali kwiimba nyimbo zibotu akulizya ziimbyo antoomwe kabatembaula Jehova. Bantu ba Jehova bakali kukonzya kucita zintu eezyi zyoonse nkaambo bakalikamantene.—Matalikilo 6:14-16, 22; Myeelwe 4:4-32; 1 Makani 25:1-8.

2. (a) Ino mbungano ya Bunakristo mumwaanda wamyaka wakusaanguna yakali libedelede munzila nzi? (b) Mibuzyo nzi njotutiilange-lange?

² Banakristo mumwaanda wamyaka wakusaanguna abalo bakalikamantene. Mwaapostolo Paulo wakapandulula kuti nokuba kuti bakali kukonzya kucita zintu ziindene-indene alimwi bakali kubeleka milimo iindene-indene, bakalikamantene. Boonse bakali kutobela Musololi wabo, Jesu Kristo. Paulo wakabeezyanisya kumubili uujisi zizo zinji izibelekela antoomwe. (Amubale 1 Bakorinto 12:4-6, 12.) Ino mbuti kujatikizya ndiswe mazuba aano? Mbuti mbotukonzya kubelekela antoomwe calukamantano mumulimo wakukambauka, mumbungano, alimwi amumukwasyi?

ATUKAMANTANE MUMULIMO WAKUKAMBAUKA

3. Ino mwaapostolo Johane wakatondezyegwa cilengaano nzi?

³ Mumwaanda wamyaka wakusaanguna, mwaapostolo Johane wakabona cilengaano cabangelo ibali ciloba ibakali kulizya myeembo. Ciindi mungelo wasanu naakalizya mweembo, Johane wakabona ‘nyenyeezi iyakalokela anyika kuzwa kujulu.’ Nyenyeezi eeyo yakabelesya kkii kujalula bulyango ibwakali kusololela kumulindi uutagoli uusiya mbi. Kusaanguna, mumulindi mwakazwa busi busiya mbi, mpoonya mubusi mwakazwa cikwikwi kaciya buuluka. Muciindi cakunyonyoona masamu, cikwikwi eeci cakalwana baabo ‘ibatakajisi ciganto ca Leza ankumo zyabo.’ (Ciyubunuzyo 9:1-4) Johane wakalizyi kuti cikwikwi cilakonzya kunyonyoona kapati; cakanyonyoona ku Egepita muciindi ca Musa. (Kulonga 10:12-15) Cikwikwi ncaakabona Johane ciiminina Banakristo bananike ibali kukambauka mulumbe wanguzu uujatikizya bukombi bwakubeja. Alimwi mamiliyoni aabantu ibalangila kuyoopona anyika babasangana. Antoomwe, balikamantene mumulimo ooyu wakukambauka. Mulimo ooyu wagwasya bantu banji kuti bazwe mubukombi bwakubeja akwaanguluka kukweendelezyegwa a Saatani.

4. Ino mulimo nzi ngobeelede kucita bantu ba Leza, alimwi ncinzi cilikke cikonzya kubapa kuzwidilila?

⁴ Tulijisi mulimo wakukambauka “makani mabotu” kubantu nyika yoonse mbwiizulwa mamanino kaatanasika. Ooyu mulimo mupati kapati! (Matayo 24:14; 28:19, 20) Tweelede kubatamba boonse aabo ‘ibafwide nyota’ kuti banywe “maanzi aabumi,” nkokuti, tweelede kubayiisya kasimpe kamu Bbaibbele boonse aabo ibayanda kukamvwisya. (Ciyubunuzyo 22:17) Pele tulakonzya kucita oobo lilikke ‘notuswaanganizyidwe kabotu-kabotu’ akukamantana mumbungano.—Baefeso 4:16.

5, 6. Mbuti mbotukamantene ciindi notukambauka makani mabotu?

⁵ Kutegwa tubasikile bantu banji, tweelede kuweendelezya kabotu mulimo wesu wakukambauka. Malailile ngotutambula kuzwa kumbungano yesu alatugwasya kucita boobu. Twamanizya muswaangano wakulibambila kuya mumulimo wakukambauka, tulaunka kuyaabubandika abantu kujatikizya makani mabotu aa Bwami. Alimwi tulabaabila mabbuku aamba makani aajatikizya Bbaibbele. Twakaabila mamiliyoni aamabbuku aaya kubantu nyika yoonse mbwiizulwa. Zimwi ziindi tulaililwa kutola lubazu mumulimo wakukambauka kwaalubazu. Ciindi nomubeleka mulimo ooyu, mulikamantene amamiliyoni aa Banakristonyoko kuzinguluka nyika yoonse ibali mukukambauka mulumbe nguwenya ngomukambauka! Alimwi mubeleka abangelo, ibali mukugwasyilizya bantu ba Leza kukambauka makani mabotu.—Ciyubunuzyo 14:6.

⁶ Eelo kaka cilakkomanisya kubala mu Bbuku Lyaamwaka makani aajatikizya bubotu bwajanika akaambo kamulimo wakukambauka uucitwa nyika yoonse mbwiizulwa! Alimwi amuyeeye mbotukamantene nyika yoonse mbwiizulwa ciindi notutamba bantu kumiswaangano yesu yacooko. Kumiswaangano eeyi toonse tuyiisyigwa zintu zikozyenye. Makani, zisobano, alimwi azitondezyo zitukulwaizya kubelekela Jehova kusikila mpotugolela. Tulikamantene alimwi abakwesu abacizyi nyika yoonse ciindi notujanika ku Ciibalusyo mwaka amwaka. (1 Bakorinto 11:23-26) Tulabungana antoomwe buzuba bomwe, mu Nisani 14, lyabbila zuba kutegwa tutondezye kuti tulalumba nzyaakatucitila Jehova akuti tutobele mulawo wa Jesu. Alimwi kakucili nsondo zili mbozibede kuti tucite Ciibalusyo, tulabelekela antoomwe kutamba bantu banji kweelana ambotukonzya kutegwa batusangane kumuswaangano ooyu uuyandika kapati.

7. Ciindi notubelekela antoomwe, ino ncinzi ncotukonzya kucita?

⁷ Cikwikwi comwe cilikke tacikonzyi kunyonyoona kapati. Andiswe tolikke tatukonzyi kubakambaukila bantu boonse. Pele akaambo kakubelekela antoomwe, tulakonzya kubakambaukila bantu banji kujatikizya Jehova akugwasya bamwi kuti bamutembaule akumulemeka.

ATUKAMANTANE MUMBUNGANO

8, 9. (a) Ino ncikozyanyo nzi ncaakabelesya Paulo kutegwa ayiisye Banakristo kuzumanana kukamantana? (b) Mbuti mbotukonzya kutondezya muuya walukamantano mumbungano?

⁸ Paulo wakabapandulwida Baefeso kujatikizya mboyeendelezyegwa mbungano, alimwi wakaamba kuti boonse mumbungano beelede ‘kukomena muzintu zyoonse.’ (Amubale Baefeso 4:15, 16.) Paulo wakabelesya cikozyanyo camubili kupandulula Munakristo umwi aumwi mbwakonzya kugwasya mbungano kuzumanana kukamantana akutobela Jesu, Musololi wambungano ya Bunakristo. Wakaamba kuti zibeela zyoonse zyamubili zibelekela antoomwe “kwiinda munswaanganino ziindene-indene zyalo zizuzikizya mulimo uuyandika.” Aboobo tacikwe makani naa tuli bana naa bapati, naa tulaciswa-ciswa naa pe, ncinzi ncayelede kucita umwi aumwi wesu?

⁹ Jesu wakabikka baalu kuti kabasololela mumbungano, alimwi uyanda kuti swebo katubalemeka akutobela busolozi mbobatupa. (Bahebrayo 13:7, 17) Kucita boobu tacili cuubauba lyoonse pe. Pele tulakonzya kulomba Jehova kuti atugwasye. Muuya wakwe uusalala ulakonzya kutugwasya kubutobela busolozi boonse mbobatupa baalu. Alimwi amuyeeye buyo mbotukonzya kwiigwasya mbungano yesu ikuti katulicesya alimwi katubelekela antoomwe abaalu. Mbungano yesu inookamantene, alimwi luyando lwesu kuli umwi aumwi luyooyuma kapati.

10. Mbuti bakutausi mbobagwasya kutegwa kube lukamantano mumbungano? (Amubone cifwanikiso icili kumatalikilo aacibalo)

¹⁰ Bakutausi abalo balagwasyilizya kuti mbungano kaikamantene. Babeleka canguzu kugwasyilizya baalu, alimwi tulabalumba akaambo kazintu zyooonse nzyobacita. Mucikozyanyo, bakutausi balabona kuti tulijisi mabbuku aakkwene aakubelesya mumulimo wakukambauka, alimwi batambula beenzu ibaboola kumiswaangano yesu. Kunze lyaboobo, balabeleka canguzu kubambulula Ŋanda ya Bwami akwiibamba kuti kaijisi bulondo. Ciindi notubelekela antoomwe abakwesu aaba, tulakamantana akubelekela Jehova munzila yeendelezyegwa kabotu.—Amweezyanisye a Milimo 6:3-6.

11. Ncinzi bakubusi ncobakonzya kucita kutegwa bagwasye mbungano kuti kaikamantene?

¹¹ Baalu bamwi balikubeleka canguzu mumbungano kwamyaka minji. Pele ambweni tabakonzyi kucita zinji mbuli mbobakali kucita kaindi nkaambo bayaabucembaala. Bakwesu bakubusi balakonzya kugwasya. Kuti naa bayiisyigwa, balakonzya kubeleka milimo minji mumbungano. Alimwi ciindi bakutausi nobabeleka canguzu, balakonzya kubeleka kabali baalu kumbele. (1 Timoteyo 3:1, 10) Baalu bamwi ibacili bakubusi bayaambele kapati. Lino balabeleka kabali mulangizi wabbazu alimwi bagwasyilizya bakwesu abacizyi mumbungano zinji. Tulakkomana kapati ciindi bakubusi nobalisungula kubelekela bakwesu abacizyi.—Amubale Intembauzyo 110:3; Mukambausi 12:1.

ATUKAMANTANE MUMUKWASYI

12, 13. Ncinzi cikonzya kubagwasya boonse mumukwasyi kuti kababelekela antoomwe calukamantano?

¹² Ino inga twabagwasya buti banamukwasyi kutegwa babelekele antoomwe calukamantano? Kukomba mumukwasyi nsondo ansondo kulakonzya kutugwasya. Ciindi baalu abana nobajana ciindi cakukkala antoomwe kutegwa baiye kujatikizya Jehovah, luyando lwabo kuli umwi amweenzinyina lulakomena. Aciindi eeci, balakonzya kwiinduluka zintu nzyobayakwaamba mumulimo, kucita boobu kulabagwasya boonse kuti babe bantu balibambilide kabotu. Alimwi ciindi nobamvwa umwi amweenzinyina kaamba kujatikizya kasimpe akubona kuti boonse mumukwasyi balamuyanda Jehova alimwi bayanda kuti bamukkomanisye, cibapa kukamantana kapati.

¹³ Mbuti mulumi amukaintu mbobakonzya kubelekela antoomwe calukamantano? (Matayo 19:6) Ciindi boonse nobamuyanda Jehova akumubelekela antoomwe, banookkomene akukamantana mucikwati cabo. Alimwi beelede kutondezya luyando kuli umwi amweenzinyina, mbubwenya mbobakacita ba Abrahamu a Sara, Izaka a Rebeka, alimwi a Elikana a Hana. (Matalikilo 26:8; 1 Samuele 1:5, 8; 1 Petro 3:5, 6) Ciindi mulumi amukaintu nobacita boobu, balakamantana akuswena afwaafwi a Jehova.—Amubale Mukambausi 4:12.

14. Kuti balumi banu naa bakaintu banu kabatabelekeli Jehova, ncinzi ncomukonzya kucita kutegwa muyumye cikwati canu?

¹⁴ Ibbaibbele lilasalazya kwaamba kuti tatweelede kukwatana amuntu uutakombi Jehova. (2 Bakorinto 6:14) Nokuba boobo, kuli bakwesu abacizyi ibakwetene amuntu uutali Kamboni wa Jehova. Bamwi bakaiya kasimpe kabakwetene kale, alimwi ngobakwetene limwi kunyina naakaba Kamboni. Bamwi ambweni bakakwatana amubelesi wa Jehova, pele mulumi wabo naa mukaintu wabo wakazwa mumbungano. Mubukkale oobu, Banakristo balacita zyoonse nzyobakonzya kuzumanana kuba acikwati ciyumu kwiinda mukutobela lulayo luli mu Bbaibbele. Kucita boobu tacili cuubauba lyoonse pe. Mucikozyanyo, ba Mary abamulumi babo, ba David, bakabelekela Jehova antoomwe. Mpoonya, ba David bakazooleka kuunka kumiswaangano. Pele ba Mary bakali kusoleka kuba mukaintu mubotu akutondezya bukkale bwa Bunakristo. Ba Mary alimwi bakayiisya bana babo ibali cisambomwe kujatikizya Jehova alimwi bakazumanana kuunka kumiswaangano yambungano akumiswaangano yacooko. Nokwakainda myaka, ciindi bana nobakakomena akuzwa aŋanda boonse, ba Mary bakazumanana kubelekela Jehova nokuba kuti cakali ciyumu kapati kulimbabo kucita boobo. Pele ba David bakatalika kubala mamagazini ngobakasiilwa aba Mary. Mukuyakwaciindi, ba David bakatalika kuunka kumiswaangano alimwi. Muzyukulu wabo iwakajisi myaka yakuzyalwa iili cisambomwe lyoonse wakali kubabambila busena bwakukkala, alimwi kuti naa ba David tiibaboola, muzyukulu wabo wakali kwaamba kuti: “Ndalimuzimbide kumuswaangano sunu basyaanene.” Ba David bakapiluka kuli Jehova nokwakainda myaka iili 25, alimwi balo abakaintu babo balikkomene kuti lino babelekela Jehova antoomwe alimwi.

15. Ino banabukwetene ibakakomena inga babagwasya buti banabukwetene ibacili bana-bana?

¹⁵ Saatani ulwana mikwasyi mazuba aano. Aaka nkakaambo kamwi mulumi amukaintu ibabelekela Jehova ncobeelede kukamantana. Tacikwe makani naa kwainda ciindi cilamfwu buti kuzwa ciindi nomwakakwatana, amuyeeye cintu ncomukonzya kwaamba naa kucita kutegwa muyumye cikwati canu. Kuti kamuli banabukwetene ibakakomena, mulakonzya kuba cikozyanyo cibotu kuli banabukwetene ibacili bana-bana. Ambweni inga mwatamba banabukwetene ibacili bana-bana kutegwa bamusangane mukukomba mumukwasyi. Bayoobona kuti tacikwe makani naa nciindi cilamfwu buti ncobakkala banabukwetene mucikwati, beelede kutondezya luyando kuli umwi amweenzinyina akukamantana.—Tito. 2:3-7.

“ATWEENDE TUTANTE CILUNDU CA JEHOVA”

16, 17. Ncinzi ncobalangila babelesi ba Jehova bakamantene?

¹⁶ Ciindi bana Israyeli nobakali kuunka kumapobwe aabo ku Jerusalemu, bakali kukamantana. Bakali kulibambila zintu zyoonse nzyobakali kuyandika mulweendo lwabo. Mpoonya, bakali kweendela antoomwe akugwasyanya. Kutempele, boonse bakali kutembaula akukomba Jehova antoomwe. (Luka 2:41-44) Mazuba aano, notulibambila kuyoopona munyika mpya, tweelede kukamantana akucita zyoonse nzyotukonzya kubelekela antoomwe. Sena kuli nzila nzyomukonzya kuyeeya mbomukonzya kuyaambele kucita boobu?

¹⁷ Bantu munyika eeyi balakazyanya nokuba kulwana buya muzintu zinji. Pele tulalumba kapati kuti Jehova watugwasya kuba aluumuno akumvwisya kasimpe! Bantu bakwe nyika yoonse mbwiizulwa balamukomba munzila njayanda. Alimwi kwaambisya mumazuba aano aamamanino, bantu ba Jehova balikamantene kwiinda kaindi. Mbubwenya mbuli Isaya a Mika mbobakasinsima, tuleenda ‘kutanta cilundu ca Jehova’ antoomwe. (Isaya 2:2-4; amubale Mika 4:2-4.) Eelo kaka tuyookkomana kumbele ciindi bantu boonse anyika ‘nobayooswaanganizyigwa kabotu-kabotu’ akukamantana kutegwa bakombe Jehova!