Ibanamukwasyi Mbubabelekela Antoomwe Ikutegwa Batole Lubazu Lupati—Kumiswaangano Yambungano
1 Imikwasyi ya Banakristo yeelede kutobela malailile aakuswaangana antoomwe kumiswaangano yambungano. (Heb. 10:24, 25) Ikuti kababelekela antoomwe boonse mumukwasyi balakonzya kuzwidilila mukulibambila miswaangano, ikujanika alimwi akutola lubazu. Ibukkale bwamukwasyi bulaandeene-andeene pele kuli zintu zimwi mwaalumi Munakristo, imukaintu musyomi naa muzyali uuli alikke nzyakonzya kucita kutegwa akamantanye mukwasyi muzintu zyakumuuya kakwiina makani amweelwe wabana ngwajisi muŋanda alimwi aziimo zyabo.—Tus. 1:8.
2 Amulibambile Kabotu: Ibanamukwasyi babelekela antoomwe ikubona kuti umwi aumwi walibambila kabotu mumiswaangano yambungano. Ibanji balibambilila antoomwe Ciiyo ca Ngazi Yamulindizi ciyiigwa nsondo ansondo. Bamwi balibambilila antoomwe mumukwasyi Ciiyo Cabbuku Cambungano naa kubala Bbaibbele kwansondo ansondo. Imakanze ngakuti batuzibile limwi twaambo tupati-pati kabatanaunka kumiswaangano. Ikwiinda mukucita boobo, boonse inga bagwasigwa kapati azintu nzyobamvwa alimwi banoolibambilide ikutola lubazu cajanika coolwe.—1 Tim. 4:15.
3 Amulibambile Kutola Lubazu: Umwi aumwi mumukwasyi weelede kukanza kwaambilizya lusyomo lwakwe kuli bamwi kwiinda mukwiingula mibuzyo kumiswaangano. (Heb. 10:23) Sena kuli munamukwasyi uuyandika kugwasya naa kukulwaizigwa mumakani aya? Ndugwasyo nzi ndwayandika umwi aumwi mukulibambila makani aamu Cikolo Camulimo Wateokrasi? Bamakaintu balalumba ciindi balumi babo nobatondezya luyandisisyo ambweni akupa muzeezo umwi kujatikizya cikozyanyo ceelede naa ibukkale bugwasya. Ibazyali tabeelede kulimvwa kuti bayandika kubabambila makani bana babo basyoonto. Ikuti bacita boobu bakonzya kusinkilila kuliyeeyela kwabana. Pele bazyali balakonzya kugwasya bana babo basyoonto akuswiilila nobaindulula-indulula cakupozya.—Ef. 6:4.
4 Amulibambile Kujanika: Ibana balakonzya kuyiisigwa kuzwa kubwana kuti kabasama akulibambila kweenda kuya kumiswaangano aciindi cibikkidwe. Ibanamukwasyi beelede kubelekela antoomwe ikulanganya milimo yaaŋanda kutegwa kwataba kumuka kuli koonse.—Amubone twaambo itulembedwe mubbuku lya Lukkomano Mumukwasyi, peeji 112 alimwi alya Young People Ask, mapeeji 316-17.
5 Ibazyali antoomwe abana balakonzya kuyeeya majwi aa Joshua wansiku walo wakati: “Mebo abasiŋanda bangu tulabelekela Jehova.” Aboobo amukanze kubelekela antoomwe kutegwa mutole lubazu lupati kumiswaangano yambungano.—Jos. 24:15.