Sena Cili Kabotu Kucita Zintu Zinji Aciindi Comwe?

• Sena cilakonzyeka kucita zintu zinji aciindi comwe?

• Muzeezo uutaluzi kujatikizya kucita zintu zinji aciindi comwe

• Nzila iili kabotu yakucita zintu

• Nzyobaamba beenzinyoko

Sena cilakonzyeka kucita zintu zinji aciindi comwe?

Sena cilakonzyeka kucita zintu zinji aciindi comwe? Bantu banji baamba kuti aabo ibakazyalilwa muciindi camakkompyuta, balakonzya kucita zintu zinji aciindi comwe kwiinda baabo bakazyalwa kaatanapangwa makkompyuta. Pele sena aayo masimpe?

MASIMPE naa NKUBEJA?

• Kucita zintu zinji aciindi comwe kupa kutasowa ciindi.

• Ikuti naa mwazyibila, inga kamucikonzya kunoocita zintu zinji aciindi comwe.

• Bakubusi inga bacikonzya kucita zintu zinji aciindi comwe kwiinda bapati.

Naa mwaingula kuti “Masimpe” kutwaambo tuli atala aawa, nkokuti mujisi muzeezo uutaluzi kujatikizya kucita zintu zinji aciindi comwe.

Muzeezo uutaluzi kujatikizya kucita zintu zinji aciindi comwe

Sena muyeeya kuti inga cakonzyeka kucita zintu zyobilo aciindi comwe? Ambweni inga mwacikonzya kucita zintu zyobilo aciindi comwe ikuti cimwi kacitayandiki kapati. Mucikozyanyo, mulakonzya kusalazya muŋanda kumwi kamuswiilila nyimbo.

Pele tamukonzyi kucita oobo kuti zyoonse zyobilo ziyandika kubikkilwa maano. Nkekaambo kaako mukubusi umwi wazina lyakuti Katherine wakaamba boobu: “Ikuti uyanda kwaalilwa, kocita zintu zinji aciindi comwe.”

“Ndakali kwiizya amweenzuma, mpoonya ndakatambula kameseji afooni. Ndakasola kucita zyoonse zyobilo. Eeci cakapa kuti ndileke kumvwa nzyaakali kwaamba mweenzuma mpoonya alimwi cakandaalila kukalemba kabotu kameseji.”—Caleb.

Ba Sherry Turkle basyaazibwene mumakani aatekkinoloji ambobaibelesya bantu, bakalemba kuti: “Ciindi notucita zintu zinji aciindi comwe, . . . tulaleka kubikkila maano kucintu cimwi acimwi ncotucita. Kucita zintu zinji aciindi comwe, kutupa kuyeeya mbuli kuti zintu zyoonse zyeenda buyo kabotu anu kuti mubwini tabusyi pe.”a

“Zimwi ziindi nondibandika amuntu kumwi kandilemba kameseji afooni, inga ndijana kuti ndalemba mubandi ngotubandika mulomo mpande, muciindi cakulemba mubandi uulaafooni!”—Tamara.

Bantu bacita zintu zinji aciindi comwe baliyumizyila buyo buumi. Mucikozyanyo, cibatolela ciindi cinji kuti bamanizye kucita homuweki. Naa tabailembi kabotu aboobo cibapa kwiilembulula alimwi. Kufwumbwa mbocikonzya kuba, bantu bacita boobo inga tabajisi aciindi cakulikwaya kucita zintu zimwi nzyobali kuyanda!

Ikuti bongo twabweezyanisya kukakkabbineti kamabbuku aabikkidwe kabotu, nkokuti mubongo bwamuntu uuciindizya kucita zintu zinji aciindi comwe, inga twaamba kuti mizeezo taikkede kabotu.

“Ikuti kamucita milimo minji aciindi comwe, tamunoobikkili maano kuzintu zimwi ziyandika. Kumamanino kujanika kuti, mwaile kulivwuzizya mulimo akulisowela ciindi.”—Teresa.

Nzila iili kabotu yakucita zintu

• Amuliyiisye kucita cintu comwe aciindi. Eeci cilakonzya kumukatazya kwaambisya ikuti naa mwakazyibila kucita zintu zinji aciindi comwe mbuli kubala kumwi kamulemba tumeseji. Bbaibbele litwaambila ‘kusinizya zintu ziyandika kapati.’ (Bafilipi 1:10) Tazili zyoonse nzyotucita ziyandika kapati. Aboobo amusale ciyandika kapati akubikkila maano kulincico kusikila camana.

  “Mizeezo iitakkalikene inga yakozyanisyigwa kumwana musyoonto uuyanda kucita kufwumbwa ncayanda, nokuba kuti ncuubauba kwiilekela kuyeeya zili zyoonse, kuyandika kuyuma kwiilulamika.”—Maria.

• Mutanyonganizyigwi. Sena mulasunkwa kulanga fooni yanu ciindi nomubala? Amwiibikke muluumu iimbi. Kamwiizima TV, alimwi mutanikuyeeyi zyakuunka a social media! Bbaibbele lyaamba kuti: “Kamucibelesya kabotu ciindi coonse ncomujisi.”—Bakolose 4:5.

  “Ndakajana kuti cilagwasya kapati kubikkila maano kucintu comwe buyo aciindi. Kucita boobo, kundiletela lukkomano nkaambo ndilaicita cakumaninina milimo yangu akutalika iimbi. Eeci cindipa kulimvwa kukkutila kapati.”—Onya.

• Kamubikkila maano ciindi nomubandika amuntu uumwi. Kulanga fooni yanu kumwi kamubandika amuntu uumbi kunyonganya mubandi alimwi buya takutondezyi bulemu. Bbaibbele litwaambila kucitila bamwi zintu nzyotuyanda kuti abalo batucitile.—Matayo 7:12.

  “Zimwi ziindi ndanikwaambaula amucizyi wangu, inga ulemba tumeseji naa kulanga zintu zimwi buyo afooni yakwe. Eeco cilandinyemya kapati! Pesi kwaamba masimpe, andime mbondicita ziindi zimwi!”—David.