Ino Mbuti Kuti Kanditaciyandi Kuzumanana Kupona?

“Myaka misyoonto yainda, kulibilika kwangu kwakaindilila cakuti ndakali kulimvwa mbuli kuti mumubili wangu kwakali mulilo ngondatakali kukonzya kuzima. Aciindi eeco, ndakali kuyeeya buyo kulijaya. Pele mubwini tiindakali kuyanda kufwa. Ndakali kuyanda buyo kuti mapenzi amane.”—Jonathan, 17.

Kweelana abuvwuntauzi bwakacitwa, bana bacikolo bamwi bali 14,000, omwe akati kabana bali 5 wakajisi muzeezo wakuyanda kulijaya mumyezi iili 12 yainda.a Ikuti mulimvwa kuti tamuciyandi kuzumanana kupona, ino ncinzi ncomukonzya kucita?

• Amulindile. Amulisyomezye kuti tamukafwambaani kucita kufwumbwa cintu ncomwayanda. Nokuba kuti mapenzi aanu inga alibonya mbuli kuti tamukonzyi kwamana, pele kuli nzila ziliko zikonzya kumugwasya kwaalwana.

Mulakonzya kulimvwa kuti kunyina nzila iikonzya kumugwasya kumapenzi aanu. Pele kulimvwa kuli boobu takwaambi kuti mbozibede zintu. Kuli nzila ziliko zikonzya kumugwasya kulwana bukkale bwanu; ikuti naa zintu zyeenda kabotu, lugwasyo lulakonzya kuboola munzila njomwatali kuyeeyela.

• Njiisyo yamu Bbaibbele: “Tulasyanikizyigwa munzila iili yoonse, pele tatumanikidwe cakutakonzya kuputauka pe; tulizyingidwe, pele kutali cakubulila limwi aakupolela pe.”—2 Bakorinto 4:8.

  Muzeezo: Ikuti mizeezo yakuyanda kulijaya yazumanana, amujane lugwasyo luyandika ambweni kutumina mbunga iilanganya makani aaya naa bakucibbadela. Bantu babelekela mumbunga eeyi naa bakucibbadela baliyiisyidwe kugwasya bantu balimvwa boobo alimwi baliyandide kugwasya.

• Amwaambile muntu uumwi. Kuli bantu bamubikkila maano alimwi ibayanda kumugwasya. Bantu aaba balakonzya kuba balongwe banu naa banamukwasyi balo batazyi penzi ndyomujisi ccita kuti mwabaambila buya.

Bantu bamwi bayandika magilazi kutegwa abagwasyilizye kubona kabotu. Mbubwenya buyo, mulongwe ulakonzya kumugwasya kwaabona munzila yeelede mapenzi aanu, aboobo mulakonzya kutalika kukukkomanina kupona alimwi.

• Njiisyo yamu Bbaibbele: “Mulongwe mwini-mwini . . . wakazyalilwa kuti akugwasye muziindi zyamapenzi.”—Tusimpi 17:17.

  Muzeezo: Kutegwa mutalisye mubandi mulakonzya kwaamba kuti: “Ndajisi mizeezo iitali kabotu mazuba aainda. Sena inga ndamwaambila?” Naa mulakonzya kwaamba kuti: “Kuli mapenzi aamwi ngondijisi aandikatazya kwaamana endikke. Sena inga mwandigwasya?”

• Amubone musilisi. Kuciswa bulwazi bwakulibilika naa kutyompwa kulakonzya kupa bantu kutaciyanda kuzumanana kupona. Cikkomanisya ncakuti malwazi aali boobu alakonzya kusilikwa.

Mbubwenya mbuli syini mboipa muntu kutayanda kulya, akwalo kutyompwa kulakonzya kupa muntu kutaciyanda kuzumanana kupona. Nokuba boobo, malwazi oonse aaya alakonzya kusilikwa.

• Njiisyo yamu Bbaibbele: “Bantu bataciswi tabayandiki musilisi, pele aabo baciswa mbabayandika musilisi.”—Matayo 9:12.

  Muzeezo: Amube aciindi cinji cakoona, kunyanyaasya mubili alimwi akulya zyakulya zijisi busani. Buumi bwanu bulakonzya kwiijatikizya mizeezo yanu.

• Amumwaambile mbomulimvwa Leza mumupailo. Bbaibbele lyaamba kuti Mulengi wesu “mupati kwiinda myoyo yesu alimwi ulizyi zintu zyoonse.” (1 Johane 3:20) Amujane ciindi cakupaila. Amubelesye zina lyakwe lyakuti Jehova, alimwi akumwaambila zyoonse zili kumoyo wanu.

Mapenzi aamwi alakatazya kwaalwana nyolikke. Mulengi wanu, Jehova, ulilibambilide kumugwasya.

• Njiisyo yamu Bbaibbele: “Amumuzyibye Leza nzyomulomba; eelyo luumuno lwa Leza oolo lwiinda maano oonse luyookwabilila myoyo yanu amizeezo yanu.”—Bafilipi 4:6, 7.

  Muzeezo: Kunze buyo lyakwaambila Jehova kujatikizya mapenzi aanu, amuyeeye cintu nociba comwe ncomukonzya kumulumbila sunu. (Bakolose 3:15) Ikuti kamulumba eeci ciyoomugwasya kubikkila maano kuzintu zibotu mubuumi bwanu.

Ikuti naa tamucikukkomanini kuzumanana kupona, amulombe lugwasyo. Eeci ncencico Jonathan, waambwa kale kumatalikilo, ncaakacita. Wakaamba kuti: “Ndakeelede kubaambila zintu zinji bazyali bangu alimwi akulomba lugwasyo kutegwa ndisilikwe. Pele lino ndiyaabulimvwa kabotu. Nokuba kuti ndicijisi mapenzi aamwi, tandicijisi mizeezo yakuyanda kulijaya.”