Sena Bbaibbele Inga Lyandigwasya Ciindi Nondaba Amizeezo Yakuyanda Kulijaya?
Bwiinguzi bwamu Bbaibbele
Inzya! Bbaibbele lyakazwa kuli “Leza, ooyo wuumbulizya baabo batyompedwe.” (2 Bakorinto 7:6) Nokuba kuti Bbaibbele talili bbuku lyaamba zyamalwazi aamumizeezo, lyabagwasya bantu banji kumana mizeezo yakuyanda kulijaya. Lulayo ndolipa lulakonzya kumugwasya andinywe.
Sena Bbaibbele lilatwaambila kujatikizya bantu bakali kulombozya kufwa?
Ino ntupango nzi twamu Bbaibbele tukonzya kumugwasya kumana mizeezo yakuyanda kulijaya?
Ino mbuti kuti mweenzinyoko wamwaambila kuti: “Ndilombozya kufwa”?
Ino ndulayo nzi lugwasya Bbaibbele ndolipa?
● Amwaambe mbomulimvwa.
Ncolyaamba Bbaibbele: “Mulongwe mwini-mwini ulatondezya luyando ciindi coonse, alimwi ngomunyoko wakazyalilwa kuti akugwasye muziindi zyamapenzi.”—Tusimpi 17:17.
Bupanduluzi: Tuyandika lugwasyo lwabamwi ciindi notukatazyidwe mumizeezo.
Kuti tiimwabaambila bamwi mbomulimvwa, ipenzi inga lyaindila buya. Pele kuti mwabaambila, ipenzi inga lyaceya alimwi inga mwatalika kuzibona munzila iili kabotu zintu.
Amusole nzila eeyi: Amwaambile umwi mbomulimvwa, ambweni munamukwasyi naa mulongwe ngomusyoma.a Alimwi mulakonzya kulemba mbomulimvwa.
● Amuunke kucibbadela.
Ncolyaamba Bbaibbele: “Bantu bataciswi tabayandiki musilisi, pele aabo baciswa mbabayandika musilisi.”—Matayo 9:12.
Bupanduluzi: Kuti twaciswa tweelede kunka kucibbadela.
Kuti muntu watalika kuba aamizeezo yakuyanda kulijaya nkokuti uciswa bulwazi bwakutyompwa naa bwamumizeezo. Bulwazi oobu buli mbuli malwazi aambi oonse, aboobo tamweelede kufwa nsoni. Bulwazi bwakutyompwa alimwi abwamumizeezo bulakonzya kusilikwa.
Amusole nzila eeyi: Cakufwambaana amubonane adokota uucibwene.
● Amuzyibe kuti Leza ulamubikkila maano.
Ncolyaamba Bbaibbele: “Sena tutiiti tosanwe tatusambalwi makkobili obilo aajisi mpindu nsyoonto? Nokuba boobo, kunyina nokaba komwe kalubidwe kuli Leza. . . . Mutayoowi pe; nywebo mulayandika kwiinda tutiiti.”—Luka 12:6, 7.
Bupanduluzi: Mulayandika kapati kuli Leza.
Mulakonzya kulimvwa kuti kunyina uumubikkila maano, pele Leza ulibubwene bukkale bwanu. Ulamubikkila maano—nokuba kuti mulimvwa kuti tamuciyandi kupona. Lugwalo lwa Intembauzyo 51:17 lwaamba kuti: “Moyo uuside alimwi uutyompedwe, O Leza, tokaukaki pe.” Leza uyanda kuti kamupona nkaambo ulamuyanda.
Amusole nzila eeyi: Amujane twaambo tugaminide mu Bbaibbele tutondezya kuti Leza ulamuyanda. Mucikozyanyo, amubone cibalo 24 mubbuku lyakuti Amubaa Acilongwe A Jehova.
● Amupaile kuli Leza.
Ncolyaamba Bbaibbele: ‘Kamuwaala makatazyo aanu oonse kuli Leza, nkaambo ulamubikkila maano.’—1 Petro 5:7.
Bupanduluzi: Leza ulamutamba kuti mumwaambile zintu zyoonse zimupa kukatazyigwa mumizeezo.
Leza ulakonzya kumupa luumuno lwamumizeezo alimwi akumugwasya kutegwa muliyumye mubukkale bwanu. (Bafilipi 4:6, 7, 13) Munzila eeyi, ulabanganya boonse bamukwiilila camoyo woonse.—Intembauzyo 55:22.
Amusole nzila eeyi: Amupaile kuli Leza sunu. Amubelesye zina lyakwe lyakuti Jehova akumwaambila mbomulimvwa. (Intembauzyo 83:18) Amumulombe kutegwa amugwasye kuliyumya.
● Amuzinzibale kuyeeya kujatikizya bulangizi bwakumbele.
Ncolyaamba Bbaibbele: “Oobu bulangizi tulibujisi mbuli ngobyo yiimika bwato yabuumi bwesu, ibusinizyide alimwi ibuyumu nta.”—Bahebrayo 6:19.
Bupanduluzi: Mbomulimvwa cilakonzya kukatazya zimwi ziindi mbubwenya mbuli mayuwe aakonzya kunyonganya bwato, pele bulangizi ibuyeeme a Bbaibbele bulakonzya kumuyumya.
Bulangizi oobu tacili ciloto buyo, pele ncisyomezyo ca Leza cisinizyide cakuti uyookumanizya kucisa koonse.—Ciyubunuzyo 21:4.
Amusole nzila eeyi: Amwiiye zinji kujatikizya zisyomezyo zyamu Bbaibbele kwiinda mukubala cibalo cakuti “Bulangizi Bwini-bwini Bwabuumi Bubotu Kumbele”.
● Amucite cintu cimukkomanisya.
Ncolyaamba Bbaibbele: “Moyo uukkomene musamu mubotu.”—Tusimpi 17:22.
Bupanduluzi: Notucita zintu zitukkomanisya tulakonzya kukatalukwa mumizeezo.
Amusole nzila eeyi: Amucite cintu ncomukkomanina kapati. Mucikozyanyo, amuswiilile nyimbo zikondelezya, amubale makani aamwi aakulwaizya, naa cintu cimwi cikkomanisya. Mulakonzya kuyungizya lukkomano lwanu kuti mwagwasya bamwi, nokuba kubacitila tuntu tusyoonto-syoonto.—Milimo 20:35.
● Amububikkile maano buponi bwanu.
Ncolyaamba Bbaibbele: ‘Nkaambo kunyanyaasya mubili kulagwasya.’—1 Timoteyo 4:8.
Bupanduluzi: Tulagwasyigwa ciindi notunyanyaasya mubili, koona mawoola ayeelede, alimwi akulya zyakulya zilaabusani bubotu.
Amusole nzila eeyi: Amunyanyaasye mubili kwiinda mukweenda cakufwambaana, ambweni kwamaminiti aali 15.
● Amuzyibe kuti mbomulimvwa alimwi azintu zimwi mubuumi zilakonzya kucinca.
Ncolyaamba Bbaibbele: “Tamuzyi mbobunoobede buumi bwanu juunza.”—Jakobo 4:14.
Bupanduluzi: Penzi ndyomukonzya kubona kuti ndipati cakuti tamukonzyi kulimana—talinooliko lyoonse.
Nokuba kuti penzi ndyomujisi inga lyalibonya kuti ndipati, lilakonzya kucinca. Aboobo, amujane nzila mbomukonzya kuliyumya kupenzi eelyo. (2 Bakorinto 4:8) Penzi ndyomujisi lilakonzya kumana kufwumbwa ciindi, pele kuti naa mwalijaya tacikwe jokolo-jokolo.
Amusole nzila eeyi: Amubale zibalo zyamu Bbaibbele zyaamba bantu bakatyompedwe cakuti bakali kuyanda kulijaya, alimwi akubona buumi bwabo mbobwakacinca akubota cakutayeeyela. Amubone zikozyanyo zimwi.
Sena Bbaibbele lilatwaambila kujatikizya bantu bakali kulombozya kufwa?
Inzya. Bbaibbele lilatwaambila kujatikizya bantu ibakali kulombozya kufwa. Leza kunyina naakabanyemena, muciindi caboobo, wakabagwasya. Andinywe ulakonzya kumugwasya.
Elija
● Ino Elija wakali ni? Wakali musinsimi sicamba. Pele awalo wakali kutyompwa zimwi ziindi. Lugwalo lwa Jakobo 5:17 lwaamba kuti: “Elija wakali muntu iwakali kulimvwa mbubonya mbotulimvwa aswebo.”
● Ino nkaambo nzi ncaakali kulombozya kuti afwe buyo? Aciindi cimwi Elija wakalilendeledwe, kuyoowa alimwi akulimvwa kubula mpindu. Aboobo wakakombelezya Jehova kuti: “Jehova, kondijaya buyo.”—1 Bami 19:4.
● Ino ncinzi cakamugwasya? Wakamwaambila Leza zyoonse zyakali kumukatazya. Ino Leza wakamuumbulizya buti? Wakatondezya kuti ulamubikkila maano kwiinda mukumutondezya mbozili zinji nguzu zyakwe. Alimwi wakamusyomezya kuti wakacili kuyandika kulinguwe alimwi wakamupa lugwasyo lweelede.
▸ Amubale kujatikizya Elija ku: 1 Bami 19:2-18.
Jobu
● Ino Jobu wakali ni? Wakali muvwubi, wakajisi mukwasyi mupati alimwi wakali mukombi wa Leza wakasimpe.
● Ino nkaambo nzi ncaakali kulombozya kuti afwe buyo? Cakutayeeyela, Jobu wakacitikilwa zintu zibyaabi kapati. Wakasweekelwa lubono lwakwe loonse. Bana bakwe boonse bakafwa muntenda. Walo wakaciswa bulwazi bucisa kapati alimwi busesemya. Mpoonya, wakaambwa kuti kuli ncaakacita cakapa kuti apenge boobu. Wakati: “Buumi bwangu bwandicima; tandiyandi kuzumanana kupona.”—Jobu 7:16.
● Ino ncinzi cakamugwasya? Wakapaila kuli Leza alimwi akubaambila bamwi mapenzi ngaakajisi. (Jobu 10:1-3) Wakakulwaizyigwa kapati a Elihu mulongwe wakwe iwakali kubikkila maano, alimwi iwakamugwasya kubulanga munzila yeelede bukkale mwaakabede. Kwiinda zyoonse, Jobu wakalutambula lulayo alugwasyo ndwaakamupa Leza.
▸ Amubale kujatikizya Jobu ku: Jobu 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Musa
● Ino Musa wakali ni? Wakali musololi wabana Israyeli bansiku alimwi wakali musinsimi uusyomeka.
● Ino nkaambo nzi ncaakali kulombozya kuti afwe buyo? Wakajisi mukuli mupati, wakali kunyansyigwa alimwi wakali kulimvwa kukatala kapati. Aboobo, wakaambila Leza kuti: “Kondijaya buyo ndilyonya lino.”—Myeelwe 11:11, 15.
● Ino ncinzi cakamugwasya? Wakaambila Leza mbwaakali kulimvwa. Mpoonya wakamulemununa mikuli njaakajisi.
▸ Amubale kujatikizya Musa ku: Myeelwe 11:4-6, 10-17.
a Kuti naa mizeezo yakuyanda kulijaya yatalika, mpoonya kwajanika kuti kunyina ngomukonzya kwaambila, amutumine mbunga iilanganya makani aaya.