BAKUBUSI BALABUZYA
Kweebana—Cibeela 3: Sena Tweelede Kucimana Cisyabo?
Mwali kweebana amuntu uumwi kwaciindi cili mbocibede, pele mwatalika kumudooneka. Sena mweelede kuzumanana acisyabo naa kucimana? Cibalo eeci cilamugwasya kuzyiba ncomukonzya kucita.
Mucibalo eeci tulalanga-langa makani aatobela:
Ncomukonzya kucita ikuti mwatalika kudooneka
Nobeebana kwaciindi cili mbocibede, musankwa amusimbi balakonzya kubona kuti tabeendelani kweelana ambobakali kuyeeyela kumatalikilo. Mucikozyanyo:
Uumbi ukkomanina kuunka kunkomwe yalwizi; pele uumwi ukkomanina kukkwela malundu.
Uumbi ukkomanina kuseka-seka abantu; pele uumwi muumuzi.
Uumbi tasyomeki; pele uumwi lyoonse ulasyomeka.
Amuzyibe kuti bukkale bumwi abumwi ibuli atali aawa buliindene. Bwakusaanguna bujatikizya kwiindana nzyomukkomanina; bwabili bujatikizya kwiindana bube; bwatatu bujatikizya kwiindana mbomulilemeka.
Ncomweelede kuyeeya: Akati kazintu eezyi zyotatwe, ncili ncomubona kuti inga camukatazya ikuti mwakwatana amuntu ooyo? Ncili akati kazyeezyi ncomukonzya kubambulula?
Mulumi amukaintu balakonzya kuti kabaindene zintu nzyobakkomanina naa bube, pele kabakkomene mucikwati cabo. Amana buya, kweendelana tacaambi kuti mulikozyenye. Mubukkale bumwi, banabukwetene balakonzya kutalika kukkomanina zintu nzyakkomanina muntu ngobakwetene limwi naa buya akugwasyigwa abube mbwajisi mweenzinyina.a
Kulubazu lumwi, cilayandika kuti muntu ngomukwetene limwi kazitobela zintu nzyomulemeka nkokuti, nzyomusyoma kujatikizya bukombi, kulilemeka, alimwi amukusala ciluzi acitaluzi. Ikuti naa taciti oobo, ambweni mweelede kucimana cisyabo.
Mucikozyanyo, amuciyeeyele buyo ikuti kamwiindene nzyomusyoma. Bbuku litegwa Fighting for Your Marriage lyaamba kuti: “Cakwiinduluka-induluka bumvwuntazi butondezya kuti, ikuti mulumi amukaintu kabaindene bukombi balalangilwa kulekana.”
Njiisyo yamu Bbaibbele: “Mutanjili mujoko lyomwe abantu batasyomi, nkaambo ino bululami buswaangene buti abubi?”—2 Bakorinto 6:14.
Kupanga cakusala
Bbaibbele lyaamba kuti aabo ibakwatana “banoojisi mapenzi.” (1 Bakorinto 7:28) Aboobo tamweelede kugambwa ikuti kamwaajisi lino, nomusyabene.
Kutamvwana mutuntu tusyoonto tacaambi kuti cisyabo inga tiicazwidilila. Aboobo mubuzyo ngwakuti, Sena inga mwakumana munzila yaluumuno? Nyoonse muyooyandika kucita zintu munzila eeyi mwaakukwatana.
Njiisyo yamu Bbaibbele: “Amufwidilane luzyalo, mube amoyo mutete walubomba, akulekelelana camoyo woonse.”—Baefeso 4:32.
Kulubazu lumwi, ikuti lyoonse kamukazyanya cilakonzya kutondezya kuti tamweelelani pe. Ikuti naa mbocibede oobo, cili kabotu kuzyibila limwi lino muciindi cakuyoozyiba kumbele!
Ikuti lyoonse kamukazyanya cilakonzya kutondezya kuti tamweelelani pe
Masimpe ngakuti: Ikuti mulamudooneka muntu ngomusyabene limwi, nokuba kuti mulilibambilide kukwatana amuntu ooyo, mutakuunduluzi kudooneka ooko!
Njiisyo yamu Bbaibbele: “Muntu uucenjede abona mapenzi ulayuba, pele aabo batakwe maano balaunka nkukonya ooko, aboobo balapenga.”—Tusimpi 22:3.
Ikuti mwasala kuti cisyabo cimane
Ikuti cisyabo camana cilakonzya kumucisa kapati. Nokuba boobo, ikuti nyoonse nyobilo mwazumanana kucidooneka cisyabo canu, inga cainda kubota kucimana buyo.
Ino inga mwacita buti oobo? Ccita kuti kakuli kaambo kamvwika, cisyabo taceelede kumanina afooni naa kulemba meseji. Muciindi caboobo, amujane ciindi ceelede alimwi abusena kutegwa mwaabandike makani aaya antoomwe.
Njiisyo yamu Bbaibbele: “Amwaambilane zyamasimpe umwi amweenzinyina.”—Zekariya 8:16.
Sena kumana kwacisyabo caamba kuti mwaalilwa? Peepe. Kamuyeeyede kuti, cisyabo ceelede kumugwasya kusala kubona naa muyookwatana amuntu ooyo naa pe. Nokuba kuti cisyabo camana, kuli ziiyo nzyomukonzya kwiiya kuliceeco cakamucitikila.
Amulibuzye kuti: ‘Ncinzi ncondaiya kujatikizya ndime mucisyabo eeci? Sena cakandicitikila cakandiyiisya kuti kuli zintu zimwi nzyondeelede kucita kanditanakwata naa kukwatwa? Ino inga ndacita buti zintu munzila iindene ikuti ndasala kuti ndisyabe naa kusyabwa alimwi?’
a Kutegwa mumvwisye kabotu-kabotu mapenzi aaya mbwaakonzya kumujatikizya mulumi amukaintu, amubone cibalo cakuti: “Lugwasyo Kumukwasyi—Kulanganya Penzi Lyakwiimpana” alimwi acakuti “Lugwasyo Kumukwasyi—Kutulanga Munzila Iili Kabotu Tumpenda Twajisi Ngomukwetene Limwi.”