Basimapolitikisi Baamba Kuti Amagedoni Iyoocitika Ino-ino​—Ino Bbaibbele Lyaamba Nzi?

Mu October 10 mafwumofwumo, basikalumamba baku Russia bakafwusa mabbomba aakanyonyoona madolopo aazingulukide cisi ca Ukraine, ikujolela kuli cakacitika mazuba obilo aakaindide, calo cakapa kuti bbiliji iisyomwa kapati iyakali kuswaanganya cisi ca Crimea alimwi a Russia inyonyoonwe. Zintu eezyi zyakacitika kakwiindide ciindi cisyoonto buyo kuzwa basimapolitikisi bamwi nobakali kwaamba kuti Amagedoni ilakonzya kucitika ino-ino.

• “Tatunaswenede boobu ku Amagedoni kuzwa ciindi Baleli bacisi ca U.S ba John F. Kennedy nobakali kweendelezya alimwi anokwakali penzi lyazilwanyo ku Cuba. . . . Ndisyoma kuti kubelesya zilwanyo zyanyukkiliya inga kwapa kuti kube Amagedoni.”​—Baleli bacisi ca U.S. ba Joe Biden, October 6, 2022.

• “Ndilazumina kuti ino-ino Amagedoni ilakonzya kucitika alimwi nintenda munyika yoonse.”​—Baleli bacisi ca Ukraine ba Volodymyr Zelensky, nobakabuzyigwa kujatikizya bubi bwakubelesya zilwanyo zyanyukkiliya, BBC News, October 8, 2022.

Sena kubelesya zilwanyo zyanyukkiliya kuyoosololela ku Amagedoni? Ino Bbaibbele lyaamba nzi?

Sena zilwanyo zyanyukkiliya ziyoopa kuti Amagedoni icitike?

Peepe. Ibbala lyakuti “Amagedoni” ijanwa buyo ciindi comwe mu Bbaibbele ku Ciyubunuzyo 16:16. Talyaambi nkondo zicitika akati kazisi, pele muciindi caboobo, ninkondo iili akati ka Leza alimwi ‘abami bamunyika yoonse.’ (Ciyubunuzyo 16:14) Leza uyoobelesya nkondo ya Amagedoni kumana bweendelezi bwabantu.​—Daniele 2:44.

Kutegwa mwiiye zinji kujatikizya ciyoocitikila nyika lya Amagedoni, amubale cibalo cakuti Ino Nkondo ya Amagedoni Ninzi?

Sena nyika alimwi abantu bali mumo bayoonyonyoonwa ankondo yanyukkiliya?

Peepe. Nokuba kuti beendelezi bazisi balangilwa kuyoobelesya zilwanyo zyanyukkiliya kumbele, Leza takazumizyi kuti nyika inyonyoonwe. Bbaibbele lyaamba kuti:

• “Nyika inooliko lyoonse mane kukabe kutamani.”​—Mukambausi 1:4.

• “Balulami bayookona nyika, alimwi bayookkala alinjiyo lyoonse mane kukabe kutamani.”​—Intembauzyo 37:29.

Nokuba boobo, businsimi bwamu Bbaibbele alimwi azintu zicitika zitondezya kuti ino-ino kuyooba kucinca kupati anyika. (Matayo 24:3-7; 2 Timoteyo 3:1-5) Amuzyibe Bbaibbele ncolyaamba kujatikizya kumbele kwiinda mukuba aciiyo ca Bbaibbele citabbadelelwi.