Kulumwensyi: Guwo litegwa Ian, ku Florida, USA, September 2022 (Sean Rayford/Getty Images); akati: Muzyali amwanaakwe balimukutija ku Donetsk, Ukraine, July 2022 (Alex Chan Tsz Yuk/SOPA Images/LightRocket via Getty Images); kululyo: Bantu banji balimukupimwa bulwazi bwa ku Beijing, China, April 2022 (Kevin Frayer/Getty Images)
AMULANGILE!
2022: Mwaka Walupyopyongano—Ino Bbaibbele Lyaamba Nzi?
Mumwaka wa 2022, makani aajatikizya nkondo, kubula mali, antenda zilicitikila ngamakani aakadumide anyuuzi. Bbaibbele lilikke ndelikonzya kupandulula cini ncozyaamba zintu eezyi.
Cini ncozyaamba zintu zyakacitika mu 2022
Zintu zyakacitika mwaka wamana ziyungizya buyo abumboni bwakuti tupona muciindi Bbaibbele ncoliita kuti “mazuba aamamanino.” (2 Timoteyo 3:1) Ciindi eeci cakatalika mumwaka wa 1914. Amubone zintu zyali kucitika caino-ino mbozyeendelana ancolyakaamba Bbaibbele kujatikizya ciindi ncotupona:
“Nkondo.”—Matayo 24:6.
“Mwaka wa 2022 Wakali Mwaka Ciindi Europe Noyakapenga Kapati Alimwi Akaambo Kankondo.”a
Amubone cibalo cakuti “Cisi ca Russia Calwana Ukraine.”
“Nzala.”—Matayo 24:7.
“Mwaka wa 2022 Wakali Mwaka Wanzala Iitaambiki.”b
Amubone cibalo cakuti “Nkondo Iili ku Ukraine Yapa Kuti Kube Penzi Lyakubula Cakulya Nyika Yoonse.”
“Zilwazi.”—Luka 21:11.
“Bulwazi bwa polio bwakatalika alimwi, bulwazi bwa monkeypox bwaba penzi lipati kapati, kumane bulwazi bwa COVID-19 bwazumanana kunyonyoona zintu alimwi abantu. Bukkale oobu bwatondezya kuti malwazi aayambukila mabi kapati alimwi bantu balapenga kapati.”c
Amubone cibalo cakuti “Bantu Bali 6 Miliyoni Bafwa Akaambo Kabulwazi bwa COVID.”
‘Kubona zintu ziyoosya.’—Luka 21:11.
“Kupya kwiindilide, ciyumayuma, mulilo wamusyokwe alimwi azambangulwe. Lyacilimo mu 2022, tatukalubi kupya kwiindilide kwakaliko kwalo kwakanyonyoona zintu, kujaya bantu banji kapati, akupa kuti mamiliyoni aabantu asweekelwe maanda aakukkala munyika yoonse.”d
Amubone cibalo cakuti “Kupya Kwiindilide Nyika Yoonse.”
“Manyongwe.”—Luka 21:9.
“Akaambo kakuti bantu bakalinyemede kapati kujatikizya penzi lyamali, kwaambisya kudula kwazintu, kwakali manyongwe mu 2022. Bantu bakali kubukila mfwulumende.”e
Amubone cibalo cakuti “Myuulo Yazintu Iyaabwiindila Kutanta Nyika Yoonse.”
Ino nzintu nzi ziyoocitika mu 2023?
Kunyina uuzyi ciyoocitika mu 2023. Pele ncotuzyi ncakuti ino-ino, Bwami bwa Leza, naa mfwulumende yakujulu iyooleta kucinca kupati munyika. (Daniele 2:44) Mfwulumende eeyi iyakwaagwisya mapenzi aabantu akupa kuti kuyanda kwa Leza kucitwe anyika.—Matayo 6:9, 10.
Tumukulwaizya kutobela lulayo lwa Jesu Kristo alimwi ‘akulangila’ kutegwa mubone zintu zicitika munyika mbozili mukuzuzikizya businsimi. (Marko 13:37) Amubandike andiswe kutegwa mwiiye zinji kujatikizya Bbaibbele mbolikonzya kumugwasya lino alimwi ambolikonzya kumupa bulangizi bwakumbele bwini-bwini, nywebo abamukwasyi wanu.
a AP News, “2022 Was Year the Horror of War Returned to Europe,” by Jill Lawless, December 8, 2022.
b World Food Programme, “A Global Food Crises.”
c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” by Lawrence O. Gostin, JD, September 22, 2022.
d Earth.Org, “What’s Behind the Record-Breaking Extreme Weather Events of Summer 2022?” by Martina Igini, October 24, 2022.
e Carnegie Endowment for International Peace, “Economic Anger Dominated Global Protests in 2022,” by Thomas Carothers and Benjamin Feldman, December 8, 2022.