Bantu Bali 6 Miliyoni Bafwa Akaambo Kabulwazi bwa COVID​—Ino Bbaibbele Lyaamba Nzi?

Kweelana aba World Health Organization (WHO), kusikila mu May 3, 2022, bantu bali 6.27 miliyoni bakafwa akaambo kabulwazi bwa COVID-19. Nokuba boobo, anyuuzi yakamwaigwa mu May 5, 2022, ba WHO bakaamba kuti mweelwe wabantu bakafwa munji kapati. Bakayungizya kwaamba kuti mu 2020 alimwi a 2021, “mweelwe wabantu bakafwa cacigaminina a COVID-19 naa amalwazi aayendelana anjiyo, . . . Ubalilwa ku 14.9 miliyoni.” Sena Bbaibbele kuli ncolyaamba kujatikizya zintu eezyi zibyaabi?

Bbaibbele Lyakasinsima Kujatikizya Zilwazi Zijaya

•  Jesu wakasinsima kuti kuyooba “zilwazi” “kumazuba aamamanino.”​—Luka 21:11; 2 Timoteyo 3:1.

Businsimi bwa Jesu buli mukuzuzikizigwa mazuba aano. Kutegwa mwiiye zinji, amubale cibalo cakuti “Ino Citondezyo ‘Camazuba Aamamanino,’ naa ‘Kuciindi Cakumamanino’ Ninzi”?

Bbaibbele lilapa luumbulizyo

•  ‘Leza siluumbulizyo loonse ulatuumbulizya mumapenzi eesu oonse.’​—2 Bakorinto 1:3, 4.

Bantu banji ibakafwidwa bayandwa babo bajana luumbulizyo mumulumbe wamu Bbaibbele. Amwiiye zinji mucibalo cakuti “Mbomukonzya Kuliyumya Ikuti Mwafwidwa​—Ncomukonzya Kucita” alimwi acakuti “Lugwasyo Lwini-lwini Kuli Baabo Ibali Mubuumba.”

Bbaibbele lilayubununa ciyoomana mapenzi aabantu cakumaninina

•  “Abuboole Bwami bwako. Akucitwe kuyanda kwako ansi aano mbubonya mbuli kujulu.”​—Matayo 6:10.

Ino-ino, “Bwami bwa Leza” buyoosinizya kuti “taakwe muntu naba omwe uu[noo]kkala munyika uuyakwaamba kuti: ‘Ndaciswa.’” (Marko 1:14, 15; Isaya 33:24) Amweebelele kavidiyo kakuti Ino Bwami bwa Leza Ninzi? kutegwa muzyibe zinji kujatikizya mfwulumende yakujulu eeyi alimwi ancoiyoocita.

Twamutamba kuti mwiiye zinji kujatikizya ncolyaamba Bbaibbele, kutegwa nywebo amukwasyi wanu mugwasyigwe alulayo lwabusongo luli mulinjiyo alimwi azisyomezyo zikkomanisya.