Ncobuyoocita Bwami bwa Leza Kujatikizya Busilisi

“Kuumuna-umuna kwa COVID-19 takwaambi kuti bulwazi oobu bwamanina limwi. . . Tweelede kulangila kubbuka kwabulwazi bumwi buli mbuli COVID-19 kumbele, alimwi tweelede kuti katulibambilide.”​—Ba Dr. Tedros Adhanom Ghebreyesus, ba director-general of the World Health Organization, May 22, 2023.

Bantu banji bazumanana kupenga kumubili amumizeezo akaambo kabulwazi bwa COVID-19. Sena mfwulumende ambunga zilanganya makani aanseba zililibambilide kujatikizya malwazi aambi aakonzya kubbuka? Sena zilacikonzya kutugwasya kupona kumalwazi ngotuli mukuciswa lino?

Bbaibbele lilatwaambila kujatikizya mfwulumende iiyootupa busilisi mbotuyandika. Lyaamba kuti “Leza wakujulu uyoobikka bwami,” naa mfwulumende. (Daniele 2:44) Mumfwulumende eeyi, “taakwe muntu naba omwe uukkala munyika uuyakwaamba kuti: ‘Ndaciswa.’” (Isaya 33:24) Boonse banooli kabotu alimwi banoojisi nguzu mbuli mbobakabede kubukubusi.​—Jobu 33:25.