Kupya Kwiindilide Nyika Yoonse mu 2023​—Ino Bbaibbele Lyaamba Nzi?

Bantu munyika yoonse balaliyumya kukupya kwiindilide kutanacitikide alimwi akuntenda zimwi ziboola akaambo kakupya ooku. Amubone malipooti aatobela:

• “Mwezi wa June wali kupya citaambiki. Eeci cali ciindi cakusaanguna mumyaka iili 174 kupya boobu munyika yoonse, nkokuti kuzwa ciindi bantu nobakatalika kupima bweende bwamuwo.”​—National Oceanic and Atmospheric Administration, U.S. Department of Commerce, July 13, 2023.

• “Kuzisi zya Italy, Spain, France, Germany alimwi a Poland kulipide citaambiki alimwi kulangilwa kuti kupya ooku kulasika a 48°C ansumbu ya Sicily alimwi a Sardinia. Ooku kunooli kupya kutanacitikide mu Europe.”​—European Space Agency, July 13, 2023.

• “Nyika mboiyaabukasaala, kulangilwa kuti kunooli mvwula iitaambiki, calo ciyoopa kuti kube kupaya kwamaanzi.”​—Ba Stefan Uhlenbrook, director of hydrology, water and cryosphere at the World Meteorological Organization, July 17, 2023.

Sena kuyungizyika kwamalipooti aajatikizya kunyongana kwamuwo kulamujatikizya? Amubone Bbaibbele ncolyaamba kujatikizya makani aaya aayandika kapati.

Sena kunyongana kwamuwo kuzuzikizya businsimi bwamu Bbaibbele?

Inzya. Kupya kwiindilide ikulimukucitika munyika alimwi akunyongana kwamuwo kutondezya buyo zintu zyakasinsimwa kuti ziyoocitika muciindi cesu. Mucikozyanyo, Jesu wakasinsima kuti ‘tuyoobona zintu ziyoosya.’ (Luka 21:11) Akaambo kakupya kutaambiki nyika yoonse, ibanji balalibilika kuti nyika ilanyonyooka cakuti taicinookkalwi abantu.

Sena kumbele kunoocinyina bantu anyika?

Peepe. Leza wakalenga nyika kuti kauli munzi wesu mane kukabe kutamani; takazumizyi bantu kwiinyonyoona. (Intembauzyo 115:16; Mukambausi 1:4) Alimwi buya, usyomezya ‘kuyoonyonyoona baabo banyonyoona nyika.’​—Ciyubunuzyo 11:18.

Bbaibbele litondezya kuti Leza ulakonzya alimwi akuti uyakwiikwabilila nyika kukunyonyoonwa.

• “[Leza] ulabatamika guwo pati; mayuwe aamulwizi alaumuna wi.” (Intembauzyo 107:29) Leza ulijisi nguzu zyakweendelezya zilengwaleza mbuli kunyongana kwamuwo zyalo zyapa kuti bantu kabapenga.

• “Yebo ulailanganya nyika, wiipa kuti izyale micelo minji kapati alimwi akuti ibote kapati.” (Intembauzyo 65:9) Kwiinda mukulongezyegwa a Leza, nyika iyooba paradaiso.

Kutegwa mwiiye zinji kujatikizya cisyomezyo camu Bbaibbele cakuti nyika iyoobambululwa, amubone cibalo cakuti “Ino Nguni Uyakwiifwutula Nyika?”