Kulumwensyi atala: Marek M. Berezowski/Anadolu Agency via Getty Images; Ansi kulumwensyi: Halfpoint Images/Moment via Getty Images; center: Zhai Yujia/China News Service/VCG via Getty Images; kululyo atala: Ismail Sen/Anadolu Agency via Getty Images; kululyo ansi: E+/taseffski/via Getty Images
AMULANGILE!
2023: Mwaka Wakapa Bantu Kulibilika—Ino Bbaibbele Lyaamba Nzi?
Mumwaka wa 2023, zintu izyakali kucitika munyika yoonse zyakapa bumboni butazumbauzigwi bwakuti tupona muciindi Bbaibbele ncolyaamba kuti “mazuba aamamanino.” (2 Timoteyo 3:1) Amubone zintu zicitika lino mbozyeendelana ancolyakasinsima Bbaibbele kuti zinoocitika mumazuba eesu.
Bbaibbele alimwi azintu zicitika munyika
“Nkondo mumasena aalaafwaafwi alimwi amasena aali kule.”—Matayo 24:6.
“Nkondo ziyaabuvwula mumasena manji aamunyika.”a
Amubone cibalo cakuti “Nguni Utiibafwutule Bantu-bantu Buyo?” acakuti “Mfwulumende Zyamunyika Yoonse Zibelesya Mali Aayinda ku $2 Tililiyoni Kuli Basikalumamba Babo.”
“Mizuzumo yanyika mumasena aaindene-indene.”—Marko 13:8.
“Kuzwa kumatalikilo aamwaka wa 2023, lino kwacitika mizuzumo yanyika iisika ku 13 yakali anguzu ziinda ku 7 magnitude munyika yoonse, ooyu ngomweelwe mupati kuzwa ciindi notwakatalika kulemba malipooti.”b
Amubone cibalo cakuti “Muzuzumo Wanyika ku Turkey aku Syria.”
“Zintu ziyoosya.”—Luka 21:11.
“Mazuba aano kupya kwaindila buya anyika.”—Ba António Guterres, ba UN secretary-general.c
Amubone cibalo cakuti “Kupya Kwiindilide Nyika Yoonse mu 2023.”
“Kuyooba nzala.”—Matayo 24:7.
“Mwaka wa 2023 wakali kulibilisya kuli baabo bajisi buyumuyumu bwakujanina zyakulya mikwasyi yabo.”d
Amubone cibalo cakuti “Kubula Kwazyakulya Munyika Yoonse Kwavwula Akaambo ka Nkondo Alimwi Akucinca Kwambowuunga Muwo.”
“Ziindi zikatazya ncobeni.”—2 Timoteyo 3:1.
“Muntu omwe akati kabantu bali 8 uciswa bulwazi bwamumizeezo.”e
Amubone cibalo camu Cikuwa cakuti “Disturbing Decline in Teen Mental Health.”
Ncinzi ncotukonzya kulangila mumwaka wa 2024?
Kunyina uuzyi cini ciyoocitika mumwaka wa 2024. Pele zintu zicitika munyika zitondezya kuti ino-ino Bwami bwa Leza, naa mfwulumende yakujulu, iyoonjila mubusena bwamfwulumende zyabantu alimwi akumanizya zintu zyoonse zipa bantu kupenga akulibilika.—Daniele 2:44; Ciyubunuzyo 21:4.
Calino, ciindi notwalimvwa kulibilika, tulakonzya kulangila kuli Leza kuti atugwasye. Bbaibbele lyaamba kuti:
“Ciindi nendiyoowede, ndisyoma nduwe.”—Intembauzyo 56:3.
Mbuti mbotukonzya kutondezya kuti tulamusyoma Leza? Tumutamba kuti mwiiye zinji kujatikizya zisyomezyo zyamu Bbaibbele zyaamba buumi bwakumbele bunyina mapenzi. Amulombe ciiyo ca Bbaibbele citabbadelelwi kutegwa mubone mbomukonzya kugwasyigwa azisyomezyo zyamu Bbaibbele nywebo amukwasyi wanu.
a Bbuku litegwa Foreign Affairs, “A World at War: What Is Behind the Global Explosion of Violent Conflict?,” lyakalembwa a Emma Beals alimwi a Peter Salisbury, mu October 30, 2023.
b Earthquake News, “Year 2023: Number of Major Earthquakes on Course for Record,” May, 2023.
c United Nations, “Secretary-General’s Opening Remarks at Press Conference on Climate,” July 27, 2023.
d World Food Programme, “A Global Food Crisis.”
e World Health Organization, “World Mental Health Day 2023,” October 10, 2023.