Bantu Bacileka Kubasyoma Basimapolitikisi​—Ino Bbaibbele Lyaamba Nzi?

Mumwaka wa 2024, muzisi zinji bantu banoosala muleli mupya. Eeci ncintu citanacitikide kuti mumwaka omwe kakuli zisi zinji kapati zivwoota. Nokuba boobo, bantu banji bacileka kubasyoma basimapolitikisi.

• Bunji bwabantu bakkala ku America ibakabuzyigwa bakaamba kuti “basimapolitikisi banji inga bayanda buyo kulida bantu masuku atala aamutwe,” muciindi cakuyanda kubagwasya.a​—Pew Research Center, September 19, 2023.

Abalo bakubusi banji bacileka kubasyoma basimapolitikisi.

• “Mazuba aano bakubusi bayandaula nzila mbobakonzya kumana mapenzi aasiyene-siyene, pele baamba kuti basimapolitikisi baalilwa kwaamana mapenzi aayo.”​—The New York Times, January 29, 2024.

• “Kweelana abuvwuntauzi bwakacitwa, kwakajanika kuti bakubusi banji basyoma social media muciindi cakusyoma basimapolitikisi.”​—The Korea Times, January 22, 2024.

Sena tweelede kusyoma basimapolitikisi kuti balakonzya kucinca zintu? Nguni ngotweelede kusyoma?

Amubacenjelele bantu mbomusyoma

Bantu beelede kubacenjelela aabo mbobasyoma. Bbaibbele lyaamba kuti “muntu mufwubafwuba ulaasyoma makani oonse, pele ooyo uucenjede ulakkala ansi kuyeeya ntaamu zyakwe.”​—Tusimpi 14:15.

• Kutegwa muzyibe mbomukonzya kusala twaambo ntomweelede kusyoma antomuteelede kusyoma, amubale cibalo cakuti “Amulikwabilile Kumakani Aakubeja.”

Kuyungizya waawo, nobaba basimapolitikisi ibalibonya kuti balasyomeka kapati alimwi bajisi makanze mabotu, tabakonzyi kucita zyoonse nzyobasyomezya. Nkakaambo kaako Bbaibbele ncolicenjezya kuti:

• “Mutasyomi bami pe, naba mwanaamuntu uutakonzyi kuleta lufwutuko.”​—Intembauzyo 146:3.

Mweendelezi ngomukonzya kusyoma

Bbaibbele lipandulula kuti Leza wakasala mweendelezi weelela alimwi uusyomeka: Jesu Kristo. (Luka 1:32, 33) Jesu Mwami wa Bwami bwa Leza, mfwulumende iilela kujulu.​—Matayo 6:10.

• Amubone kaambo ncomukonzya kumusyoma Jesu alimwi ancayoocita kumana mapenzi aaliko. Amubale cibalo cakuti “Ino Nguni Mwami wa Bwami bwa Leza?” alimwi acakuti “Ino Ncinzi Ncobuyoocita Bwami bwa Leza?”