Ino Nguni Ngomukonzya Kusyoma?​—Ino Bbaibbele Lyaamba Nzi?

Bantu balimvwa kutyompwa ciindi ibantu mbobasyoma nobataciti nzyobabasyomezya. Ibanji bacileka kusyoma . . .

• basololi bamapolitikisi ibacita nzyobayanda balo muciindi cakugwasya baabo mbobaiminina.

• basimubweza twaambo bawida kulubazu lomwe alimwi ibataambi twaambo tuluzi.

• basayaansi ibatabacitili zintu zibotu bantu.

• basololi bazikombelo ibali kumbele mutwaambo twacisi muciindi cakwiiminina Leza.

Tacilubide pe kubantu kubadooneka basololi. Bbaibbele licenjezya kuti:

• “Mutasyomi bami pe naba mwanaamuntu uutakonzyi kuleta lufwutuko.”​—Intembauzyo 146:3.

Ngomukonzya kusyoma

Bbaibbele lilamwaamba ngomukonzya kusyoma: Jesu Kristo. Tanaakali buyo mwaalumi uuli kabotu iwakapona mumazuba aakaindi. Leza wakasala Jesu kuti kali “Mwami . . . , alimwi Bwami bwakwe tabukamani.” (Luka 1:32, 33) Jesu Mwami wa Bwami bwa Leza, imfwulumende iilela kujulu lino.​—Matayo 6:10.

• Kutegwa mwiiye kaambo ncomweelede kumusyoma Jesu, amubale cibalo cakuti “Ino Nguni Mwami wa Bwami bwa Leza?” acakuti “Ino Ncinzi Ncobuyoocita Bwami bwa Leza?”