Sena Bakamboni ba Jehova Balakaka Kuyaswa Musamu Wakulikwabilila Kumalwazi Aayambukila?
Peepe. Bakamboni ba Jehova tabakaki kuyaswa musamu uuli boobu pe. Kuzumina kuyaswa naa kukaka makani aakulisalila aa Munakristo umwi aumwi. Aboobo, Bakamboni ba Jehova banji basala kuyaswa.
Tulabuyanda busilisi bubotu alimwi tulazizumina nzila zinji zipya nzyobajana basayaansi mukusola kucesya malwazi. Tulalumba kapati akaambo kakubikkila maano alimwi akulyaaba kwabaabo ibalanganya nseba, kwaambisya muziindi zikatazya.
Bakamboni ba Jehova babelekela antoomwe abaabo balanganya nseba. Mucikozyanyo, kuzwa ciindi bulwazi bwa COVID-19 nobwakabbuka, Bakamboni ba Jehova bazumanana kuyeekezya akukulwaizya bantu kutobela malailile aakulikwabilila mumyaambo minji awebbusaiti eeyi. Malailile aaya abikkilizya mbociyandika kutantamukana, kutobela mulawo wakutabungana mubuleya, kujalilwa, kusamba kumaanza, kusama ma mask alimwi akutobela malailile aambi aazwa kumfwulumende.—Baroma 13:1, 2.
Kwamyaka minji, zyakumwaya zya Bakamboni ba Jehova zikulwaizya njiisyo izitobela:
Makani aakusala busilisi ngakulisalila.—Bagalatiya 6:5.
“[Magazini eeyi] taikulwaizyi musamu uuli woonse uugaminide naa kupa mizeezo yabusilisi. Yaamba buyo twaambo twamasimpe alimwi akulekela mubali kulisalila.”—Sinsimuka!, yamu Cikuwa February 8, 1987.
“Makani aakuti nywebo alimwi abana banu muyaswe ngakulisalila.”—Sinsimuka!, yamu Cikuwa August 22, 1965.
Tulayanda kusilikwa akaambo kakuti tulabulemeka buumi.—Milimo 17:28.
“Bakamboni balaunka kubasilisi bacibwene kutegwa bakaakusilikwe. Balabuyanda buumi alimwi balacita kufwumbwa ncobakonzya kweelana amagwalo kutegwa babulampye.”—Ngazi Yamulindizi, yamu Cikuwa, July 1, 1975.
“Cakuliyandila, Bakamboni ba Jehova balatambula musamu akuzumina kusilikwa. Bayanda kuzumanana kupona kabotu alimwi akubulampya buumi. Kuyungizya waawo, mbubwenya mbuli Munakristo wamumwaanda wamyaka wakusaanguna Luka, Bakamboni ba Jehova bamwi mbasilisi. . . . Cakutadooneka, balalumba kapati kukubeleka canguzu akulyaaba kwabasilisi. Alimwi balalumba kapati ciindi bantu aabo nobabagwasya kulimvwa kabotu.”—Ngazi Yamulindizi, yamu Cikuwa February 1, 2011.