Sena Bakamboni ba Jehova Balazumina Kusilikwa?

Inzya, Bakamboni ba Jehova balazumina kusilikwa. Nokuba kuti tulailanganya mibili yesu akupona ibuumi buli kabotu, zimwi ziindi ‘tuyandika musilisi.’ (Luka 5:31) Mubwini, Bakamboni ba Jehova bamwi mbasilisi mbubwenya mbwaakabede Luka, Munakristo wamumwaanda wamyaka wakusaanguna.—Bakolose 4:14.

Nokuba boobo, busilisi bumwi tabweendelani anjiisyo zyamu Bbaibbele, aboobo tulabukaka. Mucikozyanyo, tulakaka kubikkwa bulowa nkaambo Ibbaibbele lilakasya kubikkwa bulowa mumubili kutegwa mubili ube abulowa bunji. (Milimo 15:20) Alimwi Ibbaibbele lilakasya busilisi bujatikizya kukomba mizimo.—Galatiya 5:19-21.

Nokuba boobo, busilisi bunji tabukazyanyi anjiisyo zyamu Bbaibbele. Aboobo, tweelede kulisalila cakucita. Kamboni umwi ulakonzya kuuzumina musamu naa busilisi bumwi kakuli umwi ulakonzya kubukaka busilisi oobo.—Bagalatiya 6:5.