Sena Mulilibambilide Cakucita Kuti naa Mwaciswa Kapati?
Kuciswa naa ntenda ilakonzya kucitika kufwumbwa ciindi alimwi cakutayeeyelwa. (Jak. 4:14) Aboobo muntu uucenjede ulibambilila limwi. (Tus. 22:3) Sena mwakasalila limwi akulemba busilisi mbomunga mwazumina ikuti naa mwaciswa kapati? Ikumugwasya mumakani aaya, cibeela cabili ciijisi mutwe wakuti Transfusion-Alternative Health Care—Meeting Patient Needs and Rights cabikkilizigwa mu DVD iijisi mutwe wakuti, Transfusion-Alternatives—Documentary Series. Nomweebelela, amubone naa inga mwacikonzya kwiingula mibuzyo iitobela. Akaambo kakuti vidiyo eeyi kuli zibeela moitondezya mubufwaafwi ibantu baandulwa, bazyali beelede kusala naa vidiyo eeyi bayakuyeebelela antoomwe abana babo bacili baniini.
(1) Nkaambo nzi bamwi akati kabamadokota abamanesi ncobayaabucinca mizeezo yabo kujatikizya kubikkwa bulowa? (2) Amwaambe zikozyanyo zyotatwe zyakwaandula kukatazya kwakacitwa kakunyina kubikkwa bulowa. (3) Nkaambo nzi basilisi abasikwaandula banji nyika yoonse ncobalisungula kusilika balwazi kakunyina kubelesya bulowa? (4) Ncinzi ncokutondezya kuvwuntauzya kwakacitwa muzibbadela lino-lino kujatikizya kubelesya bulowa mubusilisi? (5) Nintenda nzi ziboola akaambo kakubikkwa bulowa? (6) Ncinzi basyaazibwene mubusilisi ncobajana kujatikizya bubotu bwakubelesya nzila zyabusilisi zitabikkilizyi kubelesya bulowa? (7) Ncinzi cipa kuciswa bulwazi bwakuceya bulowa mumubili, alimwi ncinzi cinga cacitwa kutegwa mugwasye muntu uujisi bulwazi bwakuceya bulowa mumubili? (8) Ino maseelo aaitwa kuti red blood cells inga ayungizigwa buti mumubili wamulwazi? (9) Ninzila nzi zigwasya kucesya kusweekelwa bulowa ciindi muntu naandulwa? (10) Sena busilisi butabikkilizyi kubikkwa bulowa bulabeleka kubana baniini naa bantu bajisi malwazi aayandika kulanganya cakufwambaana? (11) Ncinzi ciyandika kubikkila maano mubusilisi buli kabotu?
Akaambo kakuti muntu weelede kulisalila busilisi bumwi butondezyedwe muvidiyo kweelana amanjezeezya aakwe, tamweelede kulindila kusikila mane mwaciswa kapati kutegwa musale busilisi mbomuyanda. Cibalo 7 cabbuku lya “Luyando lwa Leza” amabbuku aamwi aatondezyedwe alimwi apepa lyamukati mu Mulimo Wesu wa Bwami wamu November 2006 ziyoomugwasya kusala kabotu. Mwamana, ikuti kamubbapatizyidwe, amulembe kabotu-kabotu zyakusala zyanu akkaadi ya DPA, alimwi mweelede kuti kamwiijisi ciindi coonse.
[Majwi aakwelelezya sikubala aali apeeji 3]
Sena mwakasala kale busilisi mbomuyanda alimwi akubulemba?