Sena Mulasumpya?
Ino nkusumpya nzi? Nkusumpya kulemba kkaadi ya DPA (yaamba uupedwe nguzu zyakwiiminina mulwazi kucibbadela) iipegwa Bakamboni babbapatizidwe. Mbwaanga “tamucizi ciyooba junza,” cilayandika kapati kuti musalile limwi akulembela limwi busilisi anzila zyabusilisi nzyomunga mwazumina ikuti naa mwaciswa kapati. (Jak. 4:14; Inc. 15:28, 29) Ikutegwa mugwasyigwe, kuli vidiyo yakabambwa yamutwe wakuti, Transfusion-Alternative Health Care—Meeting Patient Needs and Rights. Amuyeebelele, mpoonya amwiinduluke cakusitikila akwaabikka mumupailo makani ngomwaiya kwiinda mukubelesya mibuzyo iitobela.—Malailile: Akaambo kakuti vidiyo ilatondezya azibeela zifwaafwi zyakwaandula kwini, ibazyali beelede kusala naa bayooebelela vidiyo eeyi abana babo basyoonto.
(1) Nkaambo nzi bamwi akati kamadokotela abasilisi bambi ncobayeeya kuti kubikkwa bulowa takuli kabotu? (2) Amwaambe zikozyanyo zyotatwe zyakwaandula kukatazya kwakacitwa kakunyina kubikkwa bulowa. (3) Bali bongaye basilisi abasikwaandula nyika yoonse ibatondezya kuti balilisungwide kusilika balwazi kakunyina kubelesya bulowa? Nkaambo nzi ncobalisungwide kucita boobo? (4) Ncinzi ncozitondezya zyakacitika muzibbadela lino-lino kujatikizya kubelesya bulowa? (5) Mapenzi nzi aaboola akaambo kakubikkwa bulowa? (6) Baakosola buti makani basyaazibwene mubusilisi kujatikizya bubotu bwakubelesya misamu anzila zyabusilisi zitajatikizyi kubelesya bulowa? (7) Ncinzi cipa kuceya bulowa mumubili? Ino muntu uujisi bulwazi oobu ulangilwa kupona ciindi cilamfwu buti? Ncinzi cinga cacitwa kutegwa mugwasye muntu uujisi bulwazi bwakuceya bulowa mumubili? (8) Ino maseelo aapanga bulowa aaitwa kuti red blood cells inga ayungizigwa buti mumulwazi? (9) Ninzila nzi zigwasya kucesya kuzwa bulowa muntu naandulwa? (10) Sena busilisi anzila zitajatikizyi kubikkwa bulowa zilabeleka kubana baniini naa bantu bajisi malwazi aayandika kulanganya cakufwambaana? (11) Ninzila nzi imwi yabonwa kuti njiiyandika kapati mukusilika kabotu? (12) Nkaambo nzi ncociyandika kapati kuti Banakristo basalile limwi nzila nzyobayanda zyabusilisi zitajatikizyi kubikkwa bulowa kakutanacitika ntenda? Mbuti mbotunga twasalila limwi?
Ikuzumina busilisi bumwi butondezedwe muvidiyo nkusala nkwaelede kucita umwi aumwi ikweelana amanjezeezya aakwe aayiisidwe njiisyo zyamu Bbaibbele. Sena mwakasala busilisi anzila zyabusilisi nzyomuyanda kuti kamubelesya abana banu, kumane akulemba kkaadi ya DPA? Ikutegwa mujane twaambo tuzwide, amubale cakubikkila maano cibalo 7 cabbuku lya “Muluyando lwa Leza” amabbuku aamwi aatondezyedwe. Alimwi amubone pepa lyamukati lijisi mutwe wakuti “Ino Mbuti Mbondikonzya Kusala Kujatikizya Tubeela Twabulowa Alimwi Abusilisi Bujatikizya Kubelesya Bulowa Bwangu Kundigama?” mu Mulimo Wesu wa Bwami wamu November 2006. Mwamana mweelede kulemba kabotu-kabotu zyakusala zyenu akkaadi ya DPA. Mbomulembede kumwiiminina akkaadi alimwi abanamukwasyi bali boonse batali Bakamboni beelede kupanduludwa kujatikizya kusala kwanu.
[Kabbokesi kali apeeji 3]
• Sena mwasala kale busilisi anzila zyabusilisi nzyomuyanda nywebo abana benu?
• Sena mulaakwiibwezyelezya kkaadi ya DPA kutegwa imugwasye ikuti naa mwaciswa kapati?