Sena Mulizizyi Nzila Nzyomukonzya Kusala?
Kwaandulwa kakunyina kubelesya bulowa kwazyibwa kapati muzibbadela zinji nyika yoonse. Sena mulizizyi kabotu-kabotu nzila zyabusilisi zyakusala zyalo zibelesyegwa mukusilika kakunyina kubelesya bulowa? Mweelede kuzizyiba kutegwa mucikonzye kusala kabotu kujatikizya busilisi alimwi akwaandulwa. Amuyeebelele vidiyo yakuti No Blood—Medicine Meets the Challenge. Mwamana, amwaalange-lange cakusitikila akwaabikka mumupailo makani ngomwasala alimwi akwiiya kwiinda mukubelesya mibuzyo eeyi iitobela.—Malailile: Akaambo kakuti vidiyo ilatondezya azibeela zifwaafwi zyakwaandula, bazyali beelede kusala naa vidiyo eeyi bayooyeebelela antoomwe abana babo basyoonto.
(1) Nkaambo nzi kapati Bakamboni ba Jehova ncobakakila kubikkwa bulowa? (2) Kujatikizya makani aabusilisi, ino ninzila nzi Bakamboni ba Jehova nzyobayanda? (3) Ino ninguzu nzi balwazi nzyobajisi? (4) Ino nkaambo nzi kusala nzila zyabusilisi zitabelesyi bulowa ncocili cintu cabusongo? (5) Ikuti naa kwazwa bulowa bunji kapati mumubili, ino nzyintu nzi zyobile bamadokotela nzyobeelede kufwambaana kucita? (6) Ino ninjiisyo nzi zyone zyanzila zyabusilisi zitabelesyi bulowa? (7) Ino mbuti bamadokotela mbobanga (a) bacesya kunyonyooka kapati kwabulowa, (b) baakwabilila maseelo aapanga bulowa kuti atanyonyooki, (c) bapa kuti bulowa butalike kupangwa mumubili, alimwi (d) bagwasya kuti bulowa buvwule alimwi? (8) Amuzipandulule nzila ziitwa kuti (a) hemodilution alimwi a (b) cell salvage. (9) Ino ncinzi ncomuyandika kuzyibisyigwa kujatikizya nzila zimwi zyabusilisi zitabelesyi bulowa? (10) Sena kwaandulwa kupati alimwi kukatazya kulakonzya kucitwa kakunyina kubikkwa bulowa? (11) Ino nkuyaambele kuli buti kugwasya kuli mukucitika mubusilisi?
Ikuzumina busilisi bumwi butondezyedwe muvidiyo ncintu ncayelede kucita umwi aumwi ikweelana amanjezeezya aakwe aayiisidwe njiisyo zyamu Bbaibbele. Sena mwakasala busilisi alimwi anzila zyabusilisi nzyomuyanda kuti kamubelesya abana banu alimwi akulemba kkaadi ya DPA? Ikutegwa mujane twaambo tumbi kujatikizya makani aaya, amubone “Mibuzyo Yabasikubala” mu Ngazi Yamulindizi ya June 15, 2004 yamu Chichewa alimwi aya November 1, 2000. Mpoonya amubelesye mapepa aagwasya kumvwisya aali mupepa lyamukati lya Mulimo Wesu wa Bwami wa November 2006 lijisi mutwe wakuti “Ino Mbuti Mbondikonzya Kusala Kujatikizya Tubeela Twabulowa Alimwi Abusilisi Bujatikizya Kubelesya Bulowa Bwangu Kundigama?” ikutegwa mulisalile nzila njomunga mwazumina naa kukaka. Mwamana kucita oobo, amuzilembe nzyomwasala akkaadi yanu ya DPA. Aabo mbomulembede akkaadi kuti bamwiiminine alimwi abamumukwasyi bali boonse batali Bakamboni beelede kupandulwidwa kabotu-kabotu zyoonse zijatikizya kusala nkomwacita.