Busilisi Bubotu Kapati—Ino Buli Buti?
“Mulwazi uuli oonse waandulwa kakunyina kubelesya bulowa nguutambula busilisi bubotu kapati oobo bukonzyeka.” Mbwaakaamba oobu Dr. Michael Rose, mupati wacibbadela alimwi uuli nguupa musamu wakulesya kucisa nobaandula. Ino ninzila nzi zyabusilisi zitabelesyi bulowa zyeelede kubikkilizigwa “mukwaandula kwakutabelesya bulowa”? Mweelede kuziba, kutegwa musale kweelana aluzibo lujatikizya busilisi alimwi akwaandula. Amwiiyebele vidiyo ya No Blood—Medicine Meets the Challenge. Mwamanizya, amulange-lange mibuzyo eeyi iitobela kutegwa mubone naa mwaamvwisya makani.—Malailile: Akaambo kakuti vidiyo ilatondezya azibeela zifwaafwi zyakwaandula, bazyali beelede kubelesya bupampu mukweebelela vidiyo eeyi abana basyoonto.
(1) Nkaambo nzi kapati Bakamboni ba Jehova ncobakakila kubikkwa bulowa? (2) Kumakani aabusilisi, ninzila nzi Bakamboni ba Jehova nzyobalombozya? (3) Ino ninguzu nzi balwazi nzyobajisi? (4) Ino nkaambo nzi ncociyandika alimwi ncouli mukuli kusala nzila zyabusilisi zitabelesyi bulowa? (5) Ciindi bulowa nobwazwa kapati mumubili, ninzila nzi zyobile zyakubindaana nzyobabelesya bamadokotela? (6) Ino ninjiisyo nzi zyone zyanzila zyabusilisi zitabelesyi bulowa? (7) Ino mbuti bamadokotela mbobanga (a) bacesya kunyonyooka kapati kwabulowa, (b) baakwabilila maseelo aapanga bulowa, (c) bapa kuti bulowa butalike kupangwa mumubili, alimwi (d) bagwasya kuti bulowa buvwule alimwi? (8) Amuzipandulule nzila ziitwa kuti (a) hemodilution alimwi (b) cell salvage. (9) Ino ncinzi ncomuyandika kuzibisyigwa kujatikizya nzila zimwi zyabusilisi zitabelesyi bulowa? (10) Sena kwaandulwa kupati alimwi kukatazya kulakonzya kucitwa kakunyina kubikkwa bulowa? (11) Ino nkuyaambele kuli buti kugwasya kuli mukucitika mubusilisi?
Kuzumina busilisi bumwi butondezyedwe muvidiyo makani aakulisalila kweelana amanjezeezya aayiisidwe Bbaibbele aamuntu aumwi. Sena mwakasala nzila zyabusilisi zitabelesyi bulowa nzyomuyoozumina nywebo alimwi abana banu? Mweelede kubazibya abalo bamumukwasyi batali Bakamboni kujatikizya kusala kwanu alimwi atwaambo ncomwasalila boobo.—Amubone Mulimo Wesu wa Bwami wa December 2002 alimwi a December 2003, mapeeji 3-4.