Luumuno Anyika​—Ino Luyooboola Buti?

Bwiinguzi bwamu Bbaibbele

Luumuno luyooboola anyika, kutali kwiinda mukusoleka kwabantu, pele kwiinda mu Bwami bwa Leza, mfwulumende yakujulu iyeendelezyegwa a Kristo Jesu. Amubone Bbaibbele mbolituyiisya kujatikizya bulangizi oobu bubotu kapati.

1. Leza ‘uyoolesya inkondo mane kusikila kumamanino aanyika,’ uyoozuzikizya cisyomezyo cakwe cakuti ‘kube luumuno kubantu mbakkomanina.’​—Intembauzyo 46:9; Luka 2:14.

2. Bwami bwa Leza buyoolela nyika yoonse kuzwa kujulu. (Daniele 7:14) Mbwiili mfwulumende yanyika yoonse, iyoogwisya kusalana kucitwa akaambo kacisi nkwazwa muntu, kusalana ooku nkokuleta kuzwangana bunji bwaziindi.

3. Jesu, Muleli wa Bwami bwa Leza, wiitwa kuti “Mwami waluumuno,” alimwi uyoosinizya kuti ‘alwalo luumuno talukamani.’​—Isaya 9:6, 7.

4. Bantu bazumanana kulwana tabakazumizyigwi kupona ansi abweendelezi bwa Bwami, nkaambo “moyo wa Leza ulisulide basikufumpa.”​—Intembauzyo 11:5; Tusimpi 2:22.

5. Leza ulabayiisya balelwa bakwe mbokukkalwa muluumuno. Ibbaibbele lilapandulula cicitika akaambo kakuyiisyigwa ooku noliti: “Lino bayoofula mapanga aabo abe maamba aakulimya, amasumo aabo abe zizibyo zyamisamu. Cisi tacikooyoobweza ipanga lyakulwisya cisinyina. Tabakooyooiya inkondo limbi pe.”​—Isaya 2:3, 4.

Mamiliyoni aa Bakamboni ba Jehova kuzunguluka nyika yoonse bakatalika kale kuyiisyigwa a Leza mbabakonzya kukkala muluumuno. (Matayo 5:9) Nokuba kuti tuzwa kumisyobo iindene-indene minji alimwi tukkala muzisi ziindene-indene iziinda ku 230, tulakaka kunyamuna zilwanyo zyankondo kutegwa tulwane bantuma.