BAKUBUSI BALABUZYA

Ino Inga Ndacita Buti Kuti Bazyali Bangu Kabayanda Kulekana?

Bukkale bumwi butyompya kapati kubakubusi nkubona bazyali babo kabalekana. Ino inga mwacita buti kutegwa muliyumye mubukkale oobu?

Mucibalo eeci tulalanga-langa makani aatobela:

Zintu zyotatwe nzyomweelede kweeleba

1. Kulipa mulandu

“Aciindi cimwi bamaama bakandaambilide kuti mapenzi oonse aakali akati kabo abataata akatalika ciindi nondakazyalwa, aboobo ndakatalika kuyeeya kuti ndime ndakapa kuti cikwati cabo cimane.”—Diana.

Amuyeeye kaambo aaka: Bazyali banu tabalekani akaambo kandinywe. Balalekana akaambo kakuti bajisi mapenzi mucikwati cabo. Tamulindinywe mwakapa kuti babe aamapenzi mucikwati cabo alimwi tamukonzyi kwaamana. Mukuli wabo wakwaamana mapenzi ngobajisi.

“Umwi aumwi weelede kunyamuna mukuli wakwe uumugeme.”—Bagalatiya 6:5.

2. Kubikkilila

“Cilindiciside kapati akaambo kakutasyomeka kwabataata kuli bamaama. Ciyoondiyumina ikuti ndikatalike kubasyoma alimwi.”—Rianna

Amuyeeye kaambo aaka: Ambweni mulinyemede akaambo kacintu cilimukucitika kubazyali banu, alimwi mulijisi kaambo kabotu kakucitila boobo. Pele tacili cibotu kuzumanana kubabikkilila. Kulakonzya kumuletela penzi kumubili alimwi amumizeezo. Nkakaambo kaako kwaambwa kuti kubikkilila kuli mbuli kunywa musamu uujaya mpoonya akulindila kuti muntu uumbi aciswe.a

“Koleka kunyema abukali.”—Int. 37:8.

3. Kudooneka ikuti naa muyooba acikwati cili kabotu

“Ndiliyoowede kapati kuti ambweni ndiyoocita cintu ncobakacita bataata. Alimwi ndiliyoowede ikuti ndaakukwatwa mpoonya akuba abana, inga ndaakucita cintu cakapa bazyali bangu kulekana.”—Jessica.

Amuyeeye kaambo aaka: Akaambo buyo kakuti cikwati cabazyali banu tiicakazwidilila, eeci tacaambi kuti cikwati canu tacikazwidilili pe. Alimwi buya, mulakonzya kwiiya ciiyo ciyandika kapati kucintu cakacitikila bazyali banu. Mucikozyanyo, mulakonzya kubikkila maano kulanga-langa bube mbomuyanda kumuntu ngomuyanda kuyookwatana limwi. Kutazwidilila kwacikwati cabazyali banu kulakonzya kumukulwaizya kuba abube bwalo buyoomugwasya kuba mulumi naa mukaintu uuli kabotu.

“Umwi aumwi alingule nzyacita lwakwe mwini.”—Bagalatiya 6:4.

Mukubusi uubikkidwe pulasita kukuulu, ulikkede acuuno kumwi kabelesya laputopu yakwe. — Kubuzyibila bukkale bwakulekana kwabazyali banu cili mbuli kupona kucifwuwa cakatyokede. Cintu cicisa lino cilakonzya kupona mukuya kwaciindi.

Zintu zyotatwe nzyomukonzya kucita

1. Kubandika. Bantu balisisa kujatikizya mizeezo mibyaabi iibakatazya kanji-kanji balijana mubukkale butali kabotu, mbuli kuciindizya kunywa bukoko naa kubelesya misamu iikola. Muciindi cakucita zintu eezyi, amusole nzila zitobela:

Amubandike abazyali banu. Ikuti bazyali banu basola kumunjizya mumakani aabo, cakulibombya pele alimwi cabusicamba amubaambile makani aayo mbwaamujatikizya. Ikuti kacimukatazya kubandika abalo mulomompande, mulakonzya kubalembela lugwalo.

Amubandike amulongwe ngomusyoma. Kuba aamuntu uukonzya kumuswiilila kuyoomugwasya kapati. Bbaibbele lyaamba kuti “mulongwe mwini-mwini ulatondezya luyando ciindi coonse alimwi ngomunyoko wakazyalilwa kuti akugwasye muziindi zyamapenzi.”—Tusimpi 17:17.

Amubandike a Mulengi wanu. Jehova Leza, ‘sikuswiilila mipailo’ lyoonse ulilibambilide kumuswiilila. (Intembauzyo 65:2) Bbaibbele lyaamba kuti “kamuwaala makatazyo aanu oonse kulinguwe, nkaambo ulamubikkila maano.”—1 Petro 5:7.

Ino muzyali uuli ngomukonzya kubandika anguwe munzila yakulibombya alimwi cakulicesya?
Ino mulongwe uuli buti uusyomeka (mukubusi naa mupati) ngomukonzya kupanga tiimu walo uukonzya kumugwasya kuliyumya?
Ino makani nzi aagaminide ngomukonzya kupailila?

2. Kucinca kweelana abukkale

Kulekana kwabazyali banu kulakonzya kupa kuti mulongele kuŋanda mpya, cikolo cipya, naa kucinca kwamweelwe wamali ngomwali kubelesya mwezi amwezi alimwi buya akujana balongwe bapya. Cakutadooneka, eeci cilakonzya kumupa kulimvwa bubi akutalika kulibilika kapati, alimwi mulakonzya kutalika kumvwa mbuli kuti nyika yamena meja. Ino ncinzi cikonzya kupa kuti kucinca ooku kuubaube kulindinywe? Amusole kubikkila maano kuli mbomukonzya kubuzyila bukkale bupya.

Ino nkucinca nzi kupati nkomwakacita akaambo kakulekana kwabazyali banu?
Ino ncinzi ncomukonzya kucita calo cikonzya kumugwasya kukuzyibila kucinca ooko?

“Ndakaiya kukkutila anzyondijisi kufwumbwa mubukkale mondibede.”—Bafilipi 4:11.

3. Amubuzyibe bube bubotu mbomujisi

Nokuba kuti kulekana kwabazyali banu kulakonzya kumupa kulibilika kapati, pele alimwi kulakonzya kumuyiisya kulumba kubube bubotu mbomujisi. Alimwi buya, kulakonzya kumugwasya kuba abube bumbi bupya. Jeremy uujisi bazyali ibakalekana naakajisi myaka iili 13 waamba kuti: “Kulekana kwabazyali bangu kwakapa kuti nditalike kulanganya mikuli iimwi. Mbwaanga ndendime ndakali mwana mupati, ndakeelede kugwasyilizya bamaama alimwi amusyoonto wangu musankwa.”

Mukubusi musimbi ugwasya musyoonto wakwe kulemba homuweki ciindi banyina nobabamba zyakulya kuncikini. — Kulekana kwabazyali banu kulakonzya kupa kuti mutalike kulanganya zintu zimwi zyaaŋanda.

Akaambo kabukkale bwabazyali banu, ino mbube nzi mbomwaba aambubo bupya?
Ino tumpenda nzi ntomuyanda kulwana?

“Magwalo oonse akasololelwa a Leza alimwi alagwasya . . . mukululamika zintu.”—2 Timoteyo 3:16.

a Kutegwa mwiiye zinji, amubone cibalo cakuti “Ino Mbuti Mbondikonzya Kulilesya Kunyema?”