Ncinzi Cikonzya Kumugwasya Kumvwisya Ncolyaamba Bbaibbele?

Bwiinguzi bwamu Bbaibbele

Bbaibbele lilaamba zyintu zinji zikonzya kutugwasya kulimvwisya. Tacikwe makani abukkale bwanu, mulumbe uuli mu Bbaibbele “tuuyoosyi pe, alimwi tuuli kule.”​—Deuteronomo 30:11.

Cikonzya kumugwasya kumvwisya Bbaibbele

1. Amube amizeezo mibotu. Amuzumine kuti Bbaibbele ndi Jwi lya Leza. Amulicesye, nkaambo Leza ulabakazya ibalisumpula. (1 Batesalonika 2:13; Jakobo 4:6) Nokuba boobo, mutanoozisyomi buyo zyintu nzyomubala kakunyina kuzyiba masimpe​—Leza uyanda kuti ‘kamubelesya maano.’​—Baloma 12:​1, 2.

2. Amupailile busongo. Lugwalo lwa Tusimpi 3:5 lwaamba kuti: “Utalifunkizyi kumaanu aako omwini.” Muciindi caboobo, ‘amuzumanane kumulomba Leza’ kuti amupe busongo kutegwa mulimvwisye Bbaibbele.​—Jakobo 1:5.

3. Amulibale lyoonse. Muyoogwasyigwa kapati aciiyo canu ca Bbaibbele kuti kamulibala kweelana abubambe mbomwakabikka ikutali kulibala buyo kufwumbwa mpomwayeeyela.​—Joshua 1:8.

4. Amulibale kwiinda mukusala zibalo. Kubala Bbaibbele kwiinda mukusala cibalo akulanga-langa ncolyaamba kujatikizya cibalo ncomwasala, ninzila mbotu iikonzya kumugwasya kumvwisya ncaamba Magwalo. Amutalikile ‘anjiisyo zyantalisyo akuya kumbele mane musime.’ (Bahebulayo 6:​1, 2) Muyoojana kuti mulakonzya kweezyanisya magwalo akubona kuti zibeela ziindene-indene zyamu Bbaibbele zilapandululana, noziba zibeela ‘zikatazya kumvwisya.’​—2 Petulo 3:16.

5. Amulombe kugwasyigwa. Bbaibbele litukulwaizya kutambula lugwasyo kuzwa kubantu ibalimvwisya. (Milimo 8:​30, 31) Bakamboni ba Jehova balijisi bubambe bwakusololela ziiyo zya Bbaibbele zitabbadelelwi. Mbubwenya mbuli Banakristo bakusaanguna mbobakali kucita, balabelesya zilembedwe mumagwalo kugwasya bantu kuzyiba cini ncoliyiisya Bbaibbele.​—Milimo 17:​2, 3.

Zyintu nzyomutayandiki

1. Lwiiyo lwaatala. Basikwiiya ba Jesu bali 12 bakali kwaamvwisya Magwalo akuyiisya bamwi nokuba kuti bantu bamwi bakali kubabona kuti ‘tiibakayiide kapati alimwi akuti bakali bantu buyo.’​—Milimo 4:13.

2. Mali. Mulakonzya kwiiya Bbaibbele kakunyina kubbadela. Jesu wakaambila basikwiiya bakwe kuti: “Mwakapegwa cabuyo, amupe cabuyo.”​—Matayo 10:8.