Ncinzi Cipa Kuti Bantu Kabafwa?

Bwiinguzi bwamu Bbaibbele

Tacigambyi kuyanda kuzyiba cipa kuti bantu kabafwa kwaambisya ciindi notwafwidwa mulongwe wesu. Bbaibbele lyaamba kuti: “Ikuluma kuletela lufwu ncibi.”​—1 Bakolinto 15:56.

Ncinzi cipa kuti bantu boonse kababisya alimwi akufwa?

Bantu bakusaanguna, ba Adamu a Eva bakafwa akaambo kakuti bakabisyila Leza. (Matalikilo 3:​17-19) Lufwu ncecintu cakatobela akaambo kakuti bakazangila Leza, nkaambo muli Leza mokabede “kasensa kabuumi.”​ —Intembauzyo 36:9; Matalikilo 2:17.

Cibi ncaakacita Adamu cakapa kuti bantu boonse kababisya. Bbaibbele lyaamba kuti: ‘Cibi cakanjila munyika kwiinda mumuntu omwe alufwu kwiinda mucibi, eelyo lufwu lwakasikila bantu boonse nkaambo boonse bakabisya.’ (Baloma 5:12) Bantu boonse balafwa akaambo kakuti boonse balabisya.​—Baloma 3:23.

Mboluyoogwisyigwa Lufwu

Leza utusyomezya kuti ciyoosika ciindi ‘lufu nayoolumena mane kukabe kutamani’. (Isaya 25:8) Kutegwa alugwisye lufwu, weelede kusaanguna kugwisya cibi, nkaambo cibi ncecileta lufwu. Leza uyoocita oobo kwiinda muli Jesu Kristo, walo “uugusya zibi zyanyika.”​—Johane 1:29; 1 Johane 1:7.