Sena Bbaibbele Lilakasya Kulikkomanisya Kwiinda Mukoonana?

Bwiinguzi bwamu Bbaibbele

Muciindi cakukasya kulikkomanisya kwiinda mukoonana, Bbaibbele lyaamba kuti kubanabukwetene, koonana ncipego kuzwa kuli Leza. Wakalenga bantu, nkokuti ‘mwaalumi amwanakazi’ alimwi wakabona nzyaakalenga kuti “zyabota loko.” (Matalikilo 1:27, 31) Naakababikka antoomwe bantu bobilo bakusaanguna kutegwa bakwatane, wakaamba kuti “babe nyama yomwe buyo.” (Matalikilo 2:24) Ikuba antoomwe ooku, kwakali kubikkilizya akulikkomanisya kwiinda mukoonana alimwi akuyandana kapati.

Nolipandulula lukkomano bamaalumi ndobajana mucikwati, Bbaibbele lyaamba kuti: “Sekelela amwanakazi wabulombe bwako . . . Inkolo zyakwe zikukutye ciindi coonse; luyando lwakwe lulamye moyo wako lyoonse.” (Tusimpi 5:18, 19) Alimwi Leza uyanda kuti bamakaintu kabajana lukkomano mukoonana. Bbaibbele lyaamba kuti: “Imulumi ape mukaintu wakwe zyeelede, awalo mukaintu acite mbubonya kumulumaakwe.”​—1 Bakolinto 7:3.

Tabali boonse beelede kulikkomanisya kwiinda mukoonana

Leza wakabikkila buyo banabukwetene bubambe oobu bwakoonana, mbubwenya mbokutondezyedwe mulugwalo lwa Bahebulayo 13:4 ilwaamba kuti: “Lukwatano alulemekwe abantu boonse, alimwi abulo bwalukwatano butasofwaazyigwi pe, nkaambo Leza uyoobabeteka basibwaamu abasimamambe.” Banabukwetene beelede kusyomeka alimwi akuzumanana kubikkilana maano. Balajana lukkomano kapati ikutali kwiinda mukulikkomanisya beni pele kwiinda mukutobela njiisyo yamu Bbaibbele yakuti: “Kupa kulakkomanisya kapati kwiinda kutambula.”​—Milimo 20:35.