Ino Ncinzi Bbaibbele Ncolyaamba Kujatikizya Cikwati?

Bwiinguzi bwamu Bbaibbele

Naakamana kulenga mwaalumi wakusaanguna alimwi amukaintu, Leza wakabakwatanya. Wakatalisya cikwati akati kamwaalumi amukaintu kuti ibe ntalisyo yabo mbotu alimwi ayabana babo kumbele.​—Matalikilo 1:27, 28; 2:18.

Leza uyanda kuti banabukwetene kabakkomene. (Tusimpi 5:18) Mu Bbaibbele, wakabikka zyeelelo zyacikwati alimwi anjiisyo zyalo zikonzya kugwasya banabukwetene kuzwidilila.

Mucibalo eeci tulalanga-langa makani aatobela

• Ino nzyeelelo nzi nzyabikkide Leza kujatikizya cikwati?

• Ino mbuti kujatikizya kwaandaana alimwi akulekana?

• Sena cikwati ceelede kulembesyegwa kumulawo kutegwa cizuminwe a Leza?

• Ino Bbaibbele libapa mikuli nzi balumi alimwi abamakaintu?

• Sena Leza uyanda kuti banabukwetene boonse kababa abana mazuba aano?

• Mbuti Bbaibbele mbolikonzya kundigwasya mucikwati cangu?

• Tupango twamu Bbaibbele tujatikizya cikwati

Ino nzyeelelo nzi nzyabikkide Leza kujatikizya cikwati?

Kuzwa kumatalikilo, Leza uyanda kuti cikwati kacili camwaalumi omwe amukaintu omwe. (Matalikilo 2:24) Leza tazumizyi maali, koonana kwabantu bakozyenye zizo naa bantu basyabene kukkala antoomwe. (1 Bakorinto 6:9; 1 Batesalonika 4:3) Jesu wakayiisya basikumutobela kuti kabatobela zyeelelo zya Leza zijatikizya cikwati.​—Marko 10:6-8.

Leza ubona cikwati kuti ncaanzyo calukamantano citamani. Ciindi mwaalumi amukaintu nobakwatana, balakonka kuli umwi amweenzinyina kuti banoosyomeka akuti banookkala antoomwe kufwumbwa buyo kuti kabacipona. Leza uyanda kuti kabacibamba cikonke eeci.​—Marko 10:9.

Ino mbuti kujatikizya kwaandaana alimwi akulekana?

Kulakonzya kuba ciindi nocitakonzyeki kumulumi amukaintu kuba antoomwe, mbuli ciindi umwi naaunka kwaakulanganya makani aamukwasyi. Pele Bbaibbele talikulwaizyi kwaandaana akaambo kamapenzi mucikwati. Muciindi caboobo, mubukkale oobu likulwaizya banabukwetene kubamba twaambo.​—1 Bakorinto 7:10.

Nzila ilikke yamu Magwalo iizumizya kulekana mbumambe. (Matayo 19:9) Aboobo, ikuti mulumi alimwi amukaintu basala kwaandaana naa kulekana akaambo twaambo tutayi komoonga kunze lyabumambe, Bbaibbele talizumizyi umwi akati kabo kutalika kweenda amuntu uumbi naa kukwata naa kukwatwa.​—Matayo 5:32; 1 Bakorinto 7:11.

Sena cikwati ceelede kulembesyegwa kumulawo kutegwa cizuminwe a Leza?

Leza uyanda kuti Banakristo kabatobela milawo yabeendelezi iijatikizya cikwati. (Tito 3:1) Ciindi bantu ibayanda kukwatana nobalembya cikwati cabo, batondezya kuti balabalemeka beendelezi alimwi aceelelo ca Leza cakuti cikwati ncaanzyo calukamantano citamani.a

Ino Bbaibbele libapa mikuli nzi balumi alimwi abamakaintu?

• Nzyobeelede kucita boonse bobilo. Balumi abamakaintu beelede kweendelezyanya munzila yaluyando alimwi akulemekana. (Baefeso 5:33) Kunze lyaboobo, beelede kupana zyeelede mucikwati munzila yaluyando alimwi akweeleba kutasyomeka kuli koonse. (1 Bakorinto 7:3; Bahebrayo 13:4) Ikuti kabajisi bana, balumi abamakaintu beelede kubelekela antoomwe kubakomezya.​—Tusimpi 6:20.

  

  Bbaibbele talyaambi zinji kujatikizya banabukwetene mbobeelede kwaabana milimo yakumubili alimwi amilimo yaaŋanda. Balakonzya kusala cikonzya kubabelekela kabotu mumukwasyi wabo.

• Mukuli wamulumi. Bbaibbele lyaamba kuti “mulumi ngomutwe wamukaintu wakwe.” (Baefeso 5:23) Ngomutwe mukuti weelede kuusololela mukwasyi wakwe alimwi akusala zintu zikonzya kugwasya mukaintu wakwe abana.

  

  Mulumi weelede kubona masimpe kuti banamukwasyi balijisi nzyobayandika kumubili, mumizeezo, alimwi akumuuya. (1 Timoteyo 5:8) Kuyungizya waawo, ulatondezya kuti ulabubikkila maano bube bwamukaintu wakwe alimwi anzyakonzya kucita kwiinda mukubelekela antoomwe alimwi akumvwa mizeezo yakwe, ambwalimvwa kujatikizya zyakusala. (Tusimpi 31:11, 28) Bbaibbele lyaamba kuti mulumi weelede kwiilanganya mikuli yakwe munzila yaluyando.​—Bakolose 3:19.

• Mukuli wamukaintu. Bbaibbele lyaamba kuti “mukaintu . . . weelede kumulemeka kapati mulumaakwe.” (Baefeso 5:33) Leza ulakkomana ciindi mukaintu nalemeka mukuli ngwapedwe mulumaakwe.

  

  Mukuli wakwe ngwakugwasyilizya mulumaakwe caboola mumakani akusala zyakucita. (Matalikilo 2:18) Bbaibbele lilamutembaula mukaintu uuzuzikizya mukuli wakwe mucikwati.​—Tusimpi 31:10.

Sena Leza uyanda kuti banabukwetene boonse kababa abana mazuba aano?

Peepe. Kaindi, Leza wakalailila bakombi bakwe bamwi kuba abana. (Matalikilo 1:28; 9:1) Pele malailile aaya taabeleki ku Banakristo mazuba aano. Jesu kunyina naakalailila basikumutobela kuba abana. Alimwi buya kunyina naba omwe akati kabasikwiiya bakwe bakusaanguna wakaamba kuti banabukwetene beelede kuba abana. Banabukwetene balakonzya kulisalila kuba abana naa pe.

Mbuti Bbaibbele mbolikonzya kundigwasya mucikwati cangu?

Bbaibbele lilijisi njiisyo zikonzya kugwasya banabukwetene kutalika kabotu cikwati cabo. Kuyungizya waawo, njiisyo zyamu Bbaibbele zilakonzya kugwasya banabukwetene kulwana buyumuyumu.

Njiisyo zyamu Bbaibbele zilakonzya kugwasya banabukwetene . . .

• kutondezya luyando lwini-lwini.​—1 Bakorinto 13:4-7; Bakolose 3:14.

• kulwana buyumuyumu.​—1 Bakorinto 10:24.

• kuba baswiilizi babotu.​—Jakobo 1:19.

• kutondezya bulemu.​—Baroma 12:10.

• kulekelela.​—1 Petro 4:8.

• kusyomeka.​—Marko 10:9.

• kukkazika moyo.​—Baefeso 4:2, 3.

• kubelekela antoomwe.​—Mukambausi 4:9.

• kuzumanana kuyumya cikwati cabo.​—Lwiimbo lwa Solomoni 8:7.