Sena Bbaibbele Liyiisya Kuti ‘Wafwutulwa Ciindi Comwe, Nkokuti Wafwutukila Limwi’?
Bwiinguzi bwamu Bbaibbele
Peepe, taliyiisyi njiisyo yakuti ‘wafwutulwa ciindi comwe, nkokuti wafwutukila limwi.’ Muntu iwafwutulwa kwiinda mukusyoma muli Jesu Kristo ulakonzya kulusweekelwa lusyomo oolo alimwi alufwutuko iluboola akaambo kakuba alusyomo oolo. Bbaibbele lyaamba kuti kuzumanana kuba alusyomo kuyandika kubeleka canguzu, ‘kululwanina.’ (Juda 3, 5) Banakristo bakusaanguna ibakamutambwide kale Kristo bakaambilwa kuti: “Amuzumanane kubelekela lufwutuko lwanu cakuyoowa akukankama.”—Bafilipi 2:12.
Tupango twamu Bbaibbele itutondezya kuti njiisyo yakuti ‘wafwutulwa ciindi comwe, nkokuti wafwutukila limwi’ njakubeja’
Bbaibbele lilatucenjezya kujatikizya kucita zibi zipati izikonzya kupa kuti muntu atanjili mu Bwami bwa Leza ((1 Bakorinto 6:9-11; Bagalatiya 5:19-21). Kucenjezya kuli boobo nokutagwasyi nokwakali kuti muntu afwutuka wafwutukila limwi. Muciindi caboobo, Bbaibbele litondezya kuti muntu iwakafwutulwa ulakonzya kulebwa akutalika kucita zibi zipati. Mucikozyanyo, lugwalo lwa Bahebrayo 10:26 lwaamba kuti: “Ikuti katucita cibi acaali notwamana kutambula luzyibo lwini-lwini lwakasimpe, kunyina cipaizyo cimbi cazibi cili coonse cicisyeede pe.”—Bahebrayo 6:4-6; 2 Petro 2:20-22.
Jesu wakakankaizya mbociyandika kuzumanana kuba alusyomo kwiinda mukupa cikozyanyo mwalo mwaakalikozyanisya kumusaansa mpoonya basikumutobela kumitabi yamusaansa ooyo. Bamwi akati kabo bakali kuyootondezya lusyomo mulinguwe kwiinda mumicelo naa mumicito yabo, pele mukuya kwaciindi bakali kuyakwaalilwa kucita boobo mpoonya ‘akukwezyulwa mbuli mutabi [uutazyali micelo]’ akusweekelwa lufwutuko lwabo. (Johane 15:1-6) Mwaapostolo Paulo wakabelesya cikozyanyo cikozyenye aceeci, kwiinda mukwaamba kuti Banakristo ibatakazumanani kusyomeka ‘bayookwezyulwa.”—Baroma 11:17-22.
Banakristo balaililwa ‘kulangila.’ (Matayo 24:42; 25:13) Aabo iboona kumuuya, ambweni kwiinda mukucita “milimo yamudima” naa kwiinda mukutasungwaala kucita milimo Jesu njaakalailila, tabakafwutuki.—Baroma 13:11-13; Ciyubunuzyo 3:1-3.
Magwalo manji atondezya kuti aabo ibakafwutulwa beelede kuliyumya cakusyomeka kusikila kumamanino. (Matayo 24:13; Bahebrayo 10:36; 12:2, 3; Ciyubunuzyo 2:10) Banakristo bamumwaanda wamyaka wakusaanguna bakakondwa nobakamvwa kuti basyominyina bakali kuliyumya mulusyomo lwabo. (1 Batesalonika 1:2, 3; 3 Johane 3, 4) Ikuti aabo ibataliyumyi bayoofwutulwa abalo, sena ncamaano kuti Bbaibbele kalikulwaizya kuliyumya cakusyomeka?
Mwaapostolo Paulo wakazyiba kuti lufwutuko lwakwe lwakalisyinizyide ciindi lufwu lwakwe nolwakaswena. (2 Timoteyo 4:6-8) Nokuba boobo, wakalizyi kuti tanaakali kukonzya kufwutuka ikuti wabisya. Wakalemba kuti: “Ndilaudinkaula mubili wangu akuweendelezya mbuli muzike, ikutegwa ndamana kukambaukila bamwi, mebo lwangu nditajanwi amulandu uuli woonse.”—1 Bakorinto 9:27; Bafilipi 3:12-14.