Nkaambo Nzi Bakamboni ba Jehova Ncobatainguli Mutwaambo Toonse Ntobatamikizyigwa?
Bakamboni ba Jehova batobela lulayo lwamu Bbaibbele lwakuti tabeelede kubweza ntaamu kukutamikizyigwa koonse alimwi akusampaulwa. Mucikozyanyo, kaambyo kamwi kamu Bbaibbele kaamba kuti: “Ooyo uululamika muntu sikusampaula uliletela buyo masampu.” (Tusimpi 9:7, 8; 26:4) Muciindi cakubikkila maano mumakani aatayi koomoonga aakuzwangana akaambo kakutamikizyigwa, tubikkila maano kucita zintu zikkomanisya Leza.—Intembauzyo 119:69.
Kumane buya, kuli “ciindi cakuumuna aciindi cakwaambaula.” (Mukambausi 3:7) Tulabaingula babombe myoyo ibayanda kuzyiba kasimpe, pele tulasoleka kutantamuka muuya wakukazyanya. Kwiinda mukucita boobo, tutobela njiisyo acikozyanyo ca Jesu kubikkilizya a Banakristo bakusaanguna.
Jesu kunyina naakaingula ciindi naakatamikizyigwa kumbele lya Pilato. (Matayo 27:11-14; 1 Petro 2:21-23) Kuyungizya waawo, Jesu kunyina naakaingula ciindi nobakamutamikizya kuba cakolwa akuba mulyato. Muciindi caboobo, wakalekela milimo yakwe kuti ibape bwiinguzi, kweelana anjiisyo eeyi yakuti: “Busongo bulabonwa kuti buliluleme kwiinda mumilimo yambubo.” (Matayo 11:19) Nokuba boobo, mubukkale bumwi, Jesu cabusicamba wakali kubaingula aabo ibakali kutubejekezya.—Matayo 15:1-3; Marko 3:22-30.
Jesu wakayiisya basikumutobela kuti tabeelede kutyompwa akaambo kakutamikizyigwa. Wakaamba kuti: “Mulikkomene nywebo ciindi bantu nobamusampaula akumupenzya akumubejelezya zintu zibi ziindene-indene akaambo kandime.” (Matayo 5:11, 12) Alimwi Jesu wakaamba kuti ciindi kutamikizyigwa kuli boobo nokujalula nzila kuli basikumutobela kuti bape bumboni, uyoocizuzikizya cisyomezyo cakwe cakuti: “Ndiyoomupa majwi abusongo, eezyo basikumukazya boonse nzyobatakakonzyi kukaka naa kukazya.”—Luka 21:12-15.
Mwaapostolo Paulo wakabapa lulayo Banakristo lwakuti tabeelede kukazyanya abasikukazya, kukazyanya kuli boobo wakakwaamba kuti ‘takugwasyi alimwi nkwabuyo.’—Tito 3:9; Baroma 16:17, 18.
Mwaapostolo Petro wakabakulwaizya Banakristo kwiiminina lusyomo lwabo kuti kacikonzyeka kucita oobo. (1 Petro 3:15) Pele wakabaambila kuti eeci kanji-kanji cibeleka kabotu kwiinda mumilimo kutali mumajwi. Wakalemba kuti: “Kwiinda mukucita zibotu, mukaumuzye bantu bafwubafwuba baambaula makani aabufwubafwuba.”—1 Petro 2:12-15.