Ikwiiminina Lusyomo Lwesu

“Amulemeke Kristo mumyoyo yanu kuti ngo-Mwami. Amube balibambide lyoonse, kuti mubapandulwide boonse bamubuzya makani aalusyomo lumukalilide.”—1 PETRO 3:15.

1, 2. Nkaambo nzi Bakamboni ba Jehova ncobatagambwi nobakazyigwa, pele ino ncinzi ncobalombozya?

MUMASI manji, Bakamboni ba Jehova bazyibidwe kuti mbantu basyomeka, ibalilemeka. Ibantu banji bababona kuba basimukobonyina babotu ibatabusyi mapenzi aali woonse. Pele icigambya ncakuti, aaba Banakristo ibayandisisya luumuno bapenzyegwa calunya kabanyina mulandu—ciindi cankondo acaluumuno. Kwiina nobagambwa akukazyigwa kuli boobo. Atwaambe kuti, balakulangila. Kayi balizyi kuti Banakristo basyomeka mumwaanda wamyaka wakusaanguna C.E. ‘bakasulaikwa,’ aboobo ino nkaambo nzi aabo ibasoleka kuba basikutobela ba Kristo bakasimpe sunu ncobanga balangila kuti balanganizigwe bumbi? (Matayo 10:22) Kunze lyaboobo, Ibbaibbele lyaamba kuti: “Ncobeni boonse abo bayanda kupona cakululama muli-Kristo Jesu mbobayoopenzegwa.”—2 Timoteo 3:12.

² Bakamboni ba Jehova kwiina nobakuyandaula buya kupenzyegwa alimwi kwiina nobaakkomanina mapenzi aaboola—ikubbadelesyegwa, ikwaangwa muntolongo naa ikupenzyegwa calunya. Balombozya kuti ‘buumi bwabo kabuli bwaluumuno alimwi ibutontola’ ikutegwa bakonzye kukambauka makani mabotu aa Bwami bwa Leza kakunyina cibasinkilila. (1 Timoteo 2:1, 2) Balalukkomanina lwaanguluko lwabukombi ndobajisi mumasi manji kuti bazumanane abukombi bwabo, alimwi balacita zyoonse zizumizya manjezeezya aabo kutegwa ‘bakkalane abantu boonse caluumuno’ kubikkilizyaa beendelezi bamfwulumende zyabantunsi. (Ba-Roma 12:18; 13:1-7) Pele ino nkaambo nzi ‘ncobasulaikwa’?

3. Nkaambo nzi komwe Bakamboni ba Jehova ncobasulaikwa munzila iitaluzi?

³ Mubwini, Bakamboni ba Jehova basulaikwa munzila iitaluzi akaambo katwaambo ntoonya ntobakapenzyelwa Banakristo bakusaanguna. Cakusaanguna, Bakamboni ba Jehova batobela nzyobasyoma kumakani aabukombi munzila iipa kuti bantu bamwi kabatabakkomanini. Mucikozyanyo, balakambauka makani mabotu aa Bwami bwa Leza cabusungu, pele kanjikanji bantu tababuteeleli kabotu busungu bwabo, ikukambauka kwabo bakubona kuba “kusandula bantu kwakusungilizya.” (Amweezyanisye Incito 4:19, 20.) Alimwi tabatoli lubazu mutwaambo amunkondo zyacisi, alimwi zimwi ziindi mukulubizya eci caambwa kuti Bakamboni mbaasicisi batatobeli milawo yacisi.—Mika 4:3, 4.

4, 5. (a) Mbuti Bakamboni ba Jehova mbobaba basikutamikizyigwa? (b) Mbaani beni-beni kanjikanji baletelezya kupenzyegwa kwabalanda ba Jehova?

⁴ Icabili, Bakamboni ba Jehova babejelezyegwa twaambo tunji—itwaambo twini twakubeja alimwi akupilinganya nzyobasyoma. Akaambo kaceeci, mumasi amwi batongaukwa akupenzyegwa kakunyinaa kaambo keni-keni. Kunze lyaboobo, akaambo kakuti bayanda busilisi butajatikizyi kubikkwa bulowa bwalo bweendelana akulombozya kwabo kwakutobela mulawo wa Bbaibbele ‘wakulikasya kubulowa,’ munzila iilubide baambwa kuti “mbajayi babana” alimwi “ninkamu yabasikulijaya.” (Incito 15:29) Pele kasimpe nkakuti Bakamboni ba Jehova balabulemeka kapati buumi alimwi balasolekesya kapati kulijanina busilisi bubotu buli boonse ilwabo alimwi abana babo. Ikubejelezegwa kwakuti ibana ba Bakamboni ba Jehova banji balafwa mwakaa mwaka akaambo kakukaka kubikkwa bulowa nkubeja kwini-kwini kwakulipungila buyo. Kunze lyaboobo, akaambo kakuti kasimpe kamu Bbaibbele tabakatambuli munzila iikozyenye banamukwasyi boonse, Bakamboni balatamikizigwa akuti mbaasikupasaula mikwasyi. Pele, aabo ibabazyi kabotu Bakamboni ba Jehova balizyi kuti balabulemeka kapati buumi bwamukwasyi alimwi basola kwaatobelesya malailile aamu Bbaibbele aakuti mulumi amukaintu bayandane akulemekana alimwi akuti bana babalemeke bazyali babo babe basyomi naa pe.—Ba-Efeso 5:21–6:3.

⁵ Iziindi zinji, ibantu beni-beni baletelezya kupenzyegwa kwabalanda ba Jehova bajanika kuti mbakombi basikukazya balo ibabelesya mfwulumende alimwi amakani aamuli sikapepele kuti basole kulesya milimo iicita Bakamboni. Ino swebo to Bakamboni ba Jehova tweelede kulimvwa buti kumakani aajatikizya kukazigwa aali boobu—akube kooko ikuboola akaambo kalusyomo lwesu amilimo njotucita naa ooko kuboola akaambo kakubejelezyegwa?

“Butontozi Bwanu Abuzibwe Kubantu Boonse”

6. Nkaambo nzi ncotweelede kutaciindizya munzila njotulanga baabo ibatali mumbungano ya Bunakristo?

⁶ Cakusaanguna, izintu tweelede kuzilanga munzila iiluzi—ikuzilanga mbwazilanga Jehova—ikujatikizyaa bantu aabo ibatasyomi nzyotusyoma. Ibuyo-buyo tulakonzya kuliletelela kulwanwa akusampaulwa kuzwa kuli bamwi. Imwaapostolo Paulo wakalemba kuti, “butontozi bwanu abuzibwe kubantu boonse.” (Ba-Filipi 4:5) Aboobo, Ibbaibbele litukulwaizya kutaciindizya munzila njotulanga baabo ibatali mumbungano ya Bunakristo.

7. Ncinzi cijatikizidwe kumakani ‘aakuliyobola cakutaba akabala nikaba komwe kaansi’?

⁷ Kulubazu lumwi Magwalo alatulaya kabotu-kabotu kuti “[tuliyobole] cakutaba akabala nikaba komwe kaansi.” (Jakobo 1:27; 4:4) Ibbala lyakuti “aansi” naa kuti “nyika” aawa mbubwena mbuli mumasena manji aambi mu Bbaibbele, lyaamba bbunga lyabantu ibatali Banakristo bakasimpe. Tukkede munkamu yabantu aaba; tulaswaangana ambabo kumilimo, kucikolo alimwi amuminzi motukkala. (Johane 17:11, 15; 1 Ba-Korinto 5:9, 10) Pele, tulaliyobola cakutaba aakabala nikaba komwe kanyika kwiinda mukutatobela ziyanza, mwaambo alimwi abukkale ibutayendelani anzila zya Leza ziluleme. Alimwi cilayandika kapati ikuzyiba ntenda iiliko mukuyanzanaa nyika ino, ikapati ikuyanzanaa baabo ibatazibikkili maanu zyeelelo zya Jehova.—Tusimpi 13:20.

8. Nkaambo nzi lulayo lwakuti tweelede kuzumanana kuliyobola cakutaba akabala nikaba komwe kaanyika ncokutatuzumizyi kusampaula bamwi?

⁸ Nokuba boobo, ilulayo lwakuzumanana kutaba aakabala nikaba komwe kaanyika kwiina nolutuzumizya kunyansya boonse ibatali Bakamboni ba Jehova. (Tusimpi 8:13) Amuyeeye cikozyanyo cabasololi babukombi bwaba Juda icakabandikwa mucibalo camusyule. (Matayo 21:43, 45) Kwiinda mukulisumpula kapati, baalumi aaba basikwiintila bakanyansya bantu Bamasi. Kwiina notujisi kulanga kubyaabi kuli boobu, ikulanga bantu batali Bakamboni calunyansyo. Mbubwena mbuli mwaapostolo Paulo, kulombozya kwesu nkwakuti bantu boonse baumvwe mulumbe wa Bbaibbele wakasimpe akuba bantu Leza mbakkomanina.—Incito 26:29; 1 Timoteo 2:3, 4.

9. Ikulanga zintu munzila iiluzi, kweendelana a Magwalo kweelede kuzijatikizya buti nzyotukanana alibaabo ibatali basyomima?

⁹ Ikulanga zintu munzila iiluzi, ikwamu Magwalo kweelede kweendelezya nzyotukanana kujatikizya bantu batali Bakamboni. Paulo wakalailila Tito kuyeezya Banakristo kunsumbu ya Krete kuti “batanoosampaula muntu pe, batabi bandwane, pele ababe batontozi, akuba babombe-moyo kubantu boonse.” (Tito 3:2) Amubone kuti Banakristo tiibakeelede kusampaula ‘muntu uuli woonse,’—nobaba baabo ibatakali Banakristo ku Krete, bamwi babo bakalizizyilwe kububeji, bulyatu abutolo. (Tito 1:12) Aboobo inga tiicazuminana amagwalo kuti twabelesya majwi aakunyansya notwaamba bantu mbotutakombi limwi. Iciimo cakulisumpula kapati kwiina nocinga cakwelelezya bambi kubukombi bwa Jehova. Pele, iciindi notubalanga akweendelezya bamwi kweelana anjiisyo zya Jwi lya Jehova, ‘tulalemeka muziyanza zyoonse lwiisyo’ lwa Leza.—Tito 2:10.

Notweelede Kuumuna, Notweelede Kwaamba

10, 11. Mbuti Jesu mbwaakatondezya kuti wakalizyi nocakali (a) “ciindi cakuumuna”? (b) “ciindi cakwaamba”?

¹⁰ Ibbuku lya Mukambausi 3:7 lyaamba kuti, kuli “ciindi cakuumuna aciindi cakwaamba.” Aboobo aawa mpaali buyumuyumu: ikusala ciindi cakubalanga buyo basikukazya aciindi cakwaamba kutegwa twiiminine lusyomo lwesu. Tulakonzya kwiiya zinji kucikozyanyo camuntu umwi walo lyoonse wakali kubelesya bupampu mukubandika—Jesu. (1 Petro 2:21) Wakalicizyi “ciindi cakuumuna.” Mucikozyanyo, ibapaizi basilutwe alimwi abapati bamwi nobakamutamikizya kuli Pilato, Jesu “teewakamuvwiila niliba ijwi lyomwe pe.” (Matayo 27:11-14) Kwiina naakayanda kwaamba cili coonse cakali kunoonyonganya kuzwidilila kwakuyanda kwa Leza kulinguwe. Muciindi caboobo, wakasala kuti milimo yakwe yakali kulibonya kubuleya ilyaambilile. Wakalizyi kuti nokaba kasimpe kwiina nookaali kunoocinca mizeezo amyoyo yabo yamapuwo. Aboobo wakaile kubalanga buyo, tanaakayanda kunyonganya makanze aancaakaumunina.—Isaya 53:7.

¹¹ Nokuba boobo, Jesu wakalicizyi “aciindi cakwaamba.” Muziindi zimwi, wakabakazya basikumukazya caantangalala, wakakukaka kutamikizya kwabo. Mucikozyanyo, ibalembi aba Farisi nobakasola kumusampaula kumbele lyabantu kwiinda mukumubejekezya kugusya madaimona munguzu zya Belzebule, Jesu wakasala kutakulekela kuzumanana kubeja oko. Kwiinda mubusongo bugambya alimwi acikozyanyo cibotu, wakabumwaya bubeji bwabo. (Marko 3:20-30; amubone alimwi Matayo 15:1-11; 22:17-21; Johane 18:37) Mbubonya buyo, naakazwaa kwaabwa alimwi akwaangwa, Jesu wakatolwa ku Nkuta Mpati, Mupaizi Silutwe Kayafa cabucenjezu wakamwaambila kuti: “Ndakukonkezya kuli-Leza muumi kuti utwaambile na nduwe Kristo Mwana a-Leza.” Acalo eci cakali “ciindi cakwaamba,” nkaambo ikuumuna buyo nokwakabonwa kuba kukaka kuti ngu Kristo. Aboobo, Jesu wakavwiila kuti: “Ndime.”—Matayo 26:63, 64; Marko 14:61, 62.

12. Nciimo nzi cakakulwaizya Paulo a Barnaba ikwaamba cabusicamba ku Ikoniyo?

¹² Alimwi amubone cikozyanyo ca Paulo a Barnaba. Ibbuku lya Incito 14:1, 2 lyaamba kuti: “Mu-Ikoniyo bakanjila amwi mucikombelo caba-Juda, kukukambauka kwabo banji ba-Juda aba-Helene bakasyoma. Pele ba-Juda basicinguni bakabusya myuuya yabamasi, babatongaukizya mane babisizya babunyina.” Mu Bbaibbele lya The New English Bible kulembedwe kuti: “Pele iba Juda batakasandukide bakakopanya Bamasi akubacitya kuti basulaike Banakristo.” Kabatasalalidwe mukutatobela mulumbe lwabo, iba Juda basikukazya bakabikkila maanu aakutamikizya, kusola kwaambila Bamasi twaambo twakubeja kujatikizya Banakristo.a Elo ilusulo lwabo ku Banakristo lwakali lupati kaka! (Amweezyanisye Incito 10:28.) Eci ba Paulo a Barnaba bakacibona kuba “ciindi cakwaamba,” mukuyoowa kuti basikwiiya bapya inga batyompokelwa akaambo kakusampaulwa kubuleya. “Nkaambo kaako [ba Paulo a Barnaba] bakaakukala oko ciindi cilamfu, balakambauka ecamba mu-Mwami,” walo wakasinizya kuti eci wakacikkomanina, kwiinda mukubapa nguzu zyakutondezya maleele. Eci cakacitya kuti bamwi ‘babe kuba-Juda, bamwi kubaapostolo.’—Incito 14:3, 4.

13. Notusampaulwa, ndiilili nokweelede kuba “ciindi cakuumuna”?

¹³ Aboobo, mbuti mbotweelede kucita notusampaulwa? Ciya mbuli zintu mbozibede. Ibukkale bumwi buyanda kuti tubelesye njiisyo yakuti kuli “ciindi cakuumuna.” Eci cilayandika ikapati basikukazya basinizizye nobayanda kutunjizya munkazyanyo zyabuyo. Tatweelede kuluba kaambo kakuti bantu bamwi tabayandi kuzyiba kasimpe. (2 Tesalonika 2:9-12) Ikusola kukanana abantu ibajisi myoyo yamapuwo iikakatila aakutasyoma tacigwasyi pe. Acimbi ciinda waawa, ikuti twalinjizya mukubandikaa sikutamikizya uuli woonse uututamikizya, tulakonzya kunyonganizigwa kumulimo uuyandika kapati alimwi uugwasya—iwakakugwasya babombe myoyo ibayandisisya kwiiya kasimpe ka Bbaibbele. Aboobo, notuyaanaa bantu basikukazya ibasinizizye aakumwaya bubeji kujatikizya ndiswe, ikulailila kwakutobela kusololedwe aamuuya nkwakuti: “Amubafutatile.”—Ba-Roma 16:17, 18; Matayo 7:6.

14. Muunzila nzi motunga twaiminina lusyomo lwesu kuli bamwi?

¹⁴ Aino eci tacaambi kuti tatwiiminini lusyomo lwesu. Kayi, kuli “[a]ciindi cakwaamba.” Tulababikkila maanu kapati ibantu basinizizye pele ibateelela twaambo twakutamikizya tubyaabi kujatikizya ndiswe. Tulilisungwide kubapandulwida nzyotusyoma munzila iisalala bantu bamwi; masimpe tulacitambula amaanza obile coolwe eci. Petro wakalemba kuti: “Amulemeke Kristo mumyoyo yanu kuti ngo-Mwami. Amube balibambide lyoonse, kuti mubapandulwide boonse bamubuzya makani aalusyomo lumukalilide, pele amuvuwe amoyo mutete akuyoowa Leza.” (1 Petro 3:15) Ibantu bayandisisya kuzyiba nobatubuzya kuti tubasalazizye kujatikizya makani eeni ngotusyoma, nobababuzya kujatikizya kutamikizya nkobacita basikukazya, mmukuli wesu kwiiminina lusyomo lwesu, ikubapa bwiinguzi bwamu Bbaibbele bwini-bwini ibugwasya. Kunze lyaboobo, ibukkale bwesu bulakonzya kupa bumboni kapati. Basikulangilila ibayanda kuzyiba nobajana kuti ncobeni tutobela zyeelelo zya Leza ziluleme, balakonzya kubukaa kubona kuti itwaambo itwakaambwa kujatikizya ndiswe nkwakubeja.—1 Petro 2:12-15.

Ino Mbuti Kujatikizya Kumwaigwa Kwamakani Aakubeja?

15. Mukozyanyo nzi omwe uutondezya makani aataluzi aakalembwa mupepa lyamakani kujatikizya Bakamboni ba Jehova?

¹⁵ Zimwi ziindi, Bakamboni ba Jehova batamikizyigwa twaambo tubyaabi muli sikapepele. Mucikozyanyo, mu August 1, 1997, ipepa lyamakani lyaku Russia lyakamwaya cibalo cakubeja icakaamba akati kazintu zimbi zyakaambwa imakani aya aakuti, Bakamboni bakulwaizya basimbungano ‘kukaka bamakaintu babo, bamalumi babo, alimwi abazyali ikuti naa kabatateeleli alimwi kabatatobeli lusyomo ndobajisi balo.’ Imuntu woonse uubazyi kabotu Bakamboni ba Jehova ulizyi kuti ikaambo aaka nkakubeja. Ibbaibbele litondezya kuti Ibanakristo beelede kulanganya banamukwasyi ibatasyomi munzila yaluyando alimwi yabulemu, alimwi Bakamboni balasolekesya kutobela malailile aayo. (1 Ba-Korinto 7:12-16; 1 Peter 3:1-4) Nokuba boobo icibalo cakasimbwa aboobo, basikubala banji bakazibisyigwa makani aalubide. Mbuti mbotunga twaiminina lusyomo lwesu notusampaulwa munzila iilubide?

16, 17, akabbokesi apeeji 16. (a) Ncinzi Ngazi Yamulindizi cimwi ciindi ncoyakaamba kujatikizya kwiingula makani aakubeja mulisikapepele? (b) Muziimo nzi Bakamboni ba Jehova mobakonzya kwiingula malipooti aakubejelezya mulisikapepele?

¹⁶ Aawa alimwi, kuli “ciindi cakuumuna aciindi cakwaamba.” Ngazi Yamulindizi cimwi ciindi yakacaamba boobu eci: “Kufwumbwa naa tatwaabikkili maanu imakani aakubeja aambwa mulisikapepele naa twaiminina kasimpe munzila iiluzi, ziyeeme buyo aabukkale bwasikutalisya kutamikizya oko alimwi amakanze aakwe.” Muziindi zimwi inga cainda kubota kwiile kuumuna buyo nokuli malipooti aakubeja, aboobo mukucita boobo tatutoli ambele kumwaigwa kwatwaambo twakubeja.

¹⁷ Muziindi zimwi cilakonzya kuba “ciindi cakwaamba.” Simubweza twaambo naa sikuluula twaambo uusyomeka ulakonzya tanaakaambilwa masimpe kujatikizya Bakamboni ba Jehova elyo ulakonzya kwaatambula amaanza obile makani aaluzi kujatikizya ndiswe. (Amubone kabbokesi kakuti “Kululamika Makani Aalubide.”) Ikuti imalipooti mabyaabi aabandikwa mulisikapepele abusya makani aakasya mulimo wesu wakukambauka, ibaiminizi baofesi lyamutabi wa Watch Tower Society balakonzya kubweza ntaamu yakwiiminina kasimpe kababelesya nzila iili kabotu.b Mucikozyanyo, baalu beelela balakonzya kupegwa mukuli wakwaamba twaambo tuluzi, mbuli mumapulogilamu aa TV, iciindi ikutacita boobo nokunga kwaambwa kuti Bakamboni ba Jehova banyina bwiinguzi. Kamboni omwe-omwe cabusongo ulaatobela malailile aa Watch Tower Society abaiminizi bayo mumakani aali boobu.—Ba-Hebrayo 13:17.

Ikwiiminina Makani Mabotu Mumulawo

18. (a) Nkaambo nzi ncotuteelede kuzumizigwaa mfwulumende zyabantunsi ikukambauka? (b) Nintaamu nzi nzyotutola notukasigwa kukambauka?

¹⁸ Ikuzumizigwa nkotuzumizidwe kukambauka makani mabotu aa Bwami bwa Leza, kuzwa kujulu. Jesu, iwakatulailila kucita mulimo oyu ulipedwe “bwami boonse nibuba bwakujulu nibuba bwaansi.” (Matayo 28:18-20; Ba-Filipi 2:9-11) Elyo tatuyandiki kuzumizigwaa mfwulumende zyabantunsi pe kukambauka. Nokuba boobo, tulizyi kuti ikubaa lwaanguluko lwabukombi kulayandika kutegwa kumwaigwe mulumbe wa Bwami. Mumanyika motwaangulukide kucita bukombi bwesu, tuyoobelesya bweende bwamulawo kuukwabilila. Mumasi motutajisi lwaanguluko luli boobo, tuyoosoleka kulujana kwiinda mukubelesya bweende bwamulawo. Mbaakani yesu, taili yakuyanda kusandula bantu boonse pe, pele ‘njakulungulula akusimpikizya Makani Mabotu.’—Ba-Filipi 1:7.

19. (a) Ncinzi cinga cacitika ‘notupa Leza zintu zya Leza’? (b) Makanze nzi ngotukanzide kucita?

¹⁹ Mbotuli Bakamboni ba Jehova, Jehova kulindiswe Mwami Wakujulu Aanyika. Mulawo wakwe ulisumpukide kapati. Tulazitobela izitwaambila mfwulumende zyabantunsi ikweelana amanjezeezya esu, aboobo mukucita boobo ‘tupa Kaisara zintu zya-Kaisara.’ Pele tatukazumizyi cintu niciba cimwi ikunyonganya kuzuzikizya mukuli wesu uuyandika kapati—‘ikupa Leza zintu zya-Leza.’ (Matayo 22:21) Tulasyoma cakumaninina kuti ikucita boobo kuyootucitya kuti ‘tusulaikwe’ abamasi, pele eci tulacizumina kuti ncecaamba kuba sikwiiya. Imakani aabambidwe aatwaambo twamilandu ya Bakamboni ba Jehova mumwaanda wamyaka wa 20, mbumboni butondezya makanze esu aakwiiminina lusyomo lwesu. Kwiinda mulugwasyo ndwapa Jehova, tulazumanana ‘kakunyina kuleka kuyiisya akukambauka makani mabotu.’—Incito 5:42.

Bupanduluzi buyungizidwe

Sena Mulayeeya?

◻ Nkaambo nzi Bakamboni ba Jehova ‘ncobasulaikwa’?

◻ Ibantu ibatasyomi nzyotusyoma tweelede kubalanga buti?

◻ Naakali kubandikaa basikukazya, nkulanga kuli buti kwakutaciindizya Jesu nkwaakatondezya ikweelede kutobelwa?

◻ Notusampaulwa, mbuti mbotunga twabelesya njiisyo yakuti kuli “ciindi cakuumuna aciindi cakwaamba”?

[Kabbokesi kali apeeji 28]

Kululamika Makani Aalubide

“Mudolopo lya Yacuiba ku Bolivia, inkamu yabavangeli yakacita bubambe abakuŋanda yaluwo kuti itondezye cipekupeku aa TV calo icilibonya kuti cakabambwaa basiluleyo. Akaambo kakubija kwapulogilamu eyo, ibaalu bakayeeya kuti baswaye maanda obile aaluwo ikutondezyelwa TV akubalomba kutondezya buleya imavidiyo aa Jehovah’s Witnesses—The Organization Behind the Name alimwi a The Bible—A Book of Fact and Prophecy akuti balaabbadela mali aayandika. Naakamana kulangilila mavidiyo aa Sosaiti, mukamwini waŋanda yasikapepele wakanyema kapati akaambo kamakani aataluzi amupulogilamu yabasiluleyo, mpoona wakalisungula kwaambilizizya Bakamboni ba Jehova kakunyina kubbadela kujatikizya muswaangano wabo wacooko wakalaafwaafwi kucitwa. Ibakajanika bakali banji kapati, alimwi ibunji bwababombe myoyo bakatalika kubuzya mibuzyo yakuyanda kuzyiba ncobeni nobakaswaigwaa Bakamboni mumuunda.”—1997 Yearbook of Jehovah’s Witnesses, mapeeji 61-2.

[Cifwanikiso icili apeeji 29]

Muziindi zimwi, Jesu wakaakazya makani aakubeja caantangalala aakaambwaa basikukazya