BAKUBUSI BALABUZYA
Ino Inga Ndacita Buti Kutegwa Nditaciswi Akaambo Kakukatala?
Sena mulimvwa kuciswa akaambo kakukatala? Ikuti kamulimvwa boobo, cibalo eeci cilamugwasya!
Ikaambo bamwi ncobaciswa
Kucita zintu zinji. Mukaintu umwi wazina lyakuti Julie wakaamba kuti: “Muzintu zyoonse nzyotucita, batwaambila kuti tweelede kuzumanana kusumpuka, kusumpula buumi bwesu, kuyungizya mbaakani nzyotujisi kutegwa tujane bubotu. Cilakatazya kuzicita zyoonse eezyi!”
Tekinoloji. Mafooni, matabbuleti, azibelesyo zimbi, zipa kuti ciindi coonse katubandika abantu, icintu cikonzya kupa kuti mukuya kwaciindi, tuciswe akaambo kakukatala kapati.
Koona mawoola masyoonto. Mukaintu umwi wazina lyakuti Miranda wakaamba kuti: “Bantu banji balafwambaana kubuka akumuka koona akaambo kacikolo, mulimo alimwi akulikondelezya. Eeci tacili kabotu, pele kunyina mbobakonzya kucita.” Kuba acilengwa cili boobo kupa kuti muciswe akaambo kakukatala.
Kaambo ncomweelede kubikkila maano
Bbaibbele lilakulumbaizya kuba bankutwe. (Tusimpi 6:6-8; Baroma 12:11) Pele talyaambi kuti tweelede kuciindizya kubeleka cakuti mane buumi bwesu azintu zimwi zyaba muntenda.
“Bumwi buzuba, ndakalijana kuti kunyina ncondakalya buzuba boonse akaambo kakuti ndakajisi zinji zyakucita. Ndakaiya kuti taciyandiki kuzumina milimo yoonse njoopegwa nkaambo cibikka buumi muntenda.”—Ashley.
Nkakaambo kaako Bbaibbele ncolyaamba kuti: “Mubwa uucipona mubotu kwiinda syuumbwa uufwide.” (Mukambausi 9:4) Kuliyumya-yumya kubeleka inga kwamupa kulimvwa mbuli kuti mujisi nguzu mbuli zyasyuumbwa kwaciindi cili mbocibede. Pele mukuya kwaciindi, inga kwapa kuti mulimvwe kukatala, mane buya akuciswa.
Ncomukonzya kucita
Amwiiye kukaka. Bbaibbele lyaamba kuti: “Balibombya mbabajisi busongo.” (Tusimpi 11:2) Bantu balibombya balizizyi zintu nzyobakonzya kucita anzyobatakonzyi kucita, aboobo balaikaka mikuli imwi.
“Muntu uutakonzyi kukaka, uuzumina mikuli yoonse njobakonzya kumupa bamwi ulakonzya kulimvwa kukatala. Ooku takuli kulibombya pe. Alimwi talikonzyi kulampa, ulakonzya kuciswa akaambo kakukatala.”—Jordan.
Kamujana ciindi cakupumuna. Bbaibbele lyaamba kuti: “Kulyookezya kusyoonto nkubotu kwiinda kulijaya kubeleka mulimo muyumu akutandaanya muwo.” (Mukambausi 4:6) Basyaabusongo baamba kuti ŋonzi “ncakulya cabongo.” Pele bakubusi banji tabooni mawoola aali lusele kusikila kukkumi ngobeelede koona.
“Ciindi nindakajisi zinji zyakucita, ndakaba acilengwa cakoona mawoola masyoonto. Zimwi ziindi kuzumanana koona kwawoola lyomwe kulandigwasya kuzicita kabotu zintu buzuba butobela alimwi akujana lukkomano.”—Brooklyn.
Mutanoosumpyi kucita zintu. Bbaibbele lyaamba kuti: “Makanze aabankutwe masimpe apa kuzwidilila.” (Tusimpi 21:5) Kuzyiba mbomukonzya kucibelesya kabotu ciindi alimwi akwiibeleka kabotu milimo, ciyoomugwasya mubuumi bwanu boonse.
“Kukatala kulakonzya kucesyegwa kwiinda mukuba amulongo wakucita zintu. Kuti kamujisi mulongo wakucita zintu, ncuuba-uba kubambulula mbomuzicita zintu kutegwa mutalimvwi kukatala.”—Vanessa.