BAKUBUSI BALABUZYA
Ino Bbaibbele Inga Lyandigwasya Buti?—Cibeela 1: Kulimvwisya Kabotu Bbaibbele
“Ndilasola kulibala Bbaibbele, pele ndilatyompwa akaambo kakukomena kwandilyo!”—Briana, 15.
Sena andinywe mbomulimvwa? Cibalo eeci cilakonzya kumugwasya!
Ino nkaambo nzi ncomweelede kubala Bbaibbele?
Sena kubala Bbaibbele takumukkomanisyi? Kuti kacili boobo, tacigambyi pe. Mulakonzya kwaamba kuti Bbaibbele ndibbuku lijisi mapeeji ainda ku 1,000, talijisi zifwanikiso alimwi talinoneezyi mbuli TV amavidiyo.
Pele amuciyeeyele boobu: Ikuti mwajana ciyobwedo calubono cansiku, sena inga tiimwayanda kuzyiba izili mukati?
Bbaibbele lili buyo mbuli ciyobwedo calubono eeco. Lijisi mbono zinji zyabusongo izikonzya kumugwasya
Kusala kabotu
Kumvwana abazyali banu
Kujana balongwe bali kabotu
Kuliyumya kuti mwatyompwa
Ino mbuti bbuku lyakaindi boobo mbolikonzya kugwasya mazuba aano? Nkaambo kakuti “Magwalo oonse akasololelwa a Leza.” (2 Timoteyo 3:16) Eeci caamba kuti lulayo luli mu Bbaibbele luzwa kuli yooyo uujisi lulayo lwiinda kubota.
Bbaibbele nciyobwedo calubono cijisi busongo butakonzyi kuulwa amali
Ino ndeelede kulibala buti Bbaibbele?
Nzila imwi nkwiinda mukulibala kuzwa kumatalikilo kusikila kumamanino. Kucita boobo kulakonzya kumugwasya kuzyiba mulumbe uuli mu Bbaibbele. Kuli nzila zinji zyakubala Bbaibbele. Amubone zikozyanyo zyobilo:
Mulakonzya kubala mabbuku aali mu Bbaibbele aali 66 kweelana aambwaatobelana, kuzwa ku Matalikilo kusikila ku Ciyubunuzyo.
Mulakonzya kubala Bbaibbele kweelana ambozyakali kutobelana kucitika zintu.
Ncomweelede kuyeeya: Makani aayungizyidwe A7 mu Bbaibbele lya Busanduluzi Bwanyika Mpya alapa mulongo wambozyakali kutobelana kucitika zintu mubuumi bwa Jesu.
Nzila yabili yakubala Bbaibbele njakusala cibalo iceendelana abuyumuyumu mbomwajana. Mucikozyanyo:
Sena inga tiimwayanda kujana balongwe basyomeka? Amubale cibalo caamba Jonatani a Davida. (1 Samuele, caandaano 18-20) Mpoonya amubelesye pepa lyakulembela lyakuti “Mbomukonzya Kujana Balongwe Basyomeka” kutegwa mwiiye ziiyo zigwasya kuzwa kucibalo.
Sena inga tiimwayanda kuyumya makanze aanu aakuzunda masunko? Amubale cibalo caamba Josefa mbwaakazunda masunko. (Matalikilo, caandaano 39) Mpoonya amubelesye pepa lyakulembela lyakuti “Mbomukonzya Kulwana Sunko . . . Josefa—Cibeela 1” alimwi alyakuti “Wabejelezyegwa! Josefa—Cibeela 2” kutegwa mwiiye ziiyo zigwasya kuzibalo eezyi.
Sena inga tiimwayanda kwiiya mboukonzya kumugwasya mupailo? Amubale cakacitika kuli Nehemiya. (Nehemiya, caandaano 2) Mpoonya amubelesye pepa lyakulembela lyakuti “Leza Wakawiingula Mupailo Wakwe” kutegwa mwiiya ziiyo zigwasya kucibalo eeci.
Ncomweelede kuyeeya: Ciindi nomubala Bbaibbele, amube masimpe kuti kunyina zisabila mpomubede kutegwa mubikkile maano.
Nzila yatatu yakubala Bbaibbele nkusala cibalo naa ntembauzyo, amucibale mpoonya amubone mbocikonzya kumugwasya. Mwamana kubala amulibuzye mibuzyo mbuli bwayeeyi:
Nkaambo nzi Jehova ncaakabikkilizya makani aaya mu Bbaibbele?
Ino ayubununa nzi kujatikizya bube bwa Jehova naa nzila mbwacita zintu?
Ino mbuti mbondikonzya kwaabelesya makani aaya mubuumi bwangu?
Muzeezo: Amulibikkile mbaakani! Amulembe deeti nomuyanda kuyootalika kubala Bbaibbele.