Sena Mulembo Wiitwa Kuti Shroud Waku Dolopo lya Turin Ngomulembo Mwaakazambailwa Jesu Aakuzikkwa?

Bwiinguzi bwamu Bbaibbele

Mulembo ooyu uuyeeyelwa kuti mwaakazambailwa Jesu aakuzikkwa tawaambidwe mu Bbaibbele. Akaambo kakuyeeya kuli boobu, mulembo ooyu muzikombelo zya Bunakristo Bwanyika ubonwa kuti ulisetekene kapati. Mazuba aano, mulembo ooyu uyobwedwe mucibikkilo cisumpukide kapati mucikombelo cipati ku Turin, mu Italy.

Sena zibalo zyamu Bbaibbele zileendelana amuzeezo wakuti mulembo ooyu ngwamasimpe? Peepe.

Amubone mbazu zyotatwe zyamulembo ooyu ziteendelani ancolyaamba Bbaibbele.

1. Mulembo ooyu ulampa masentimita aali 442 mubulamfwu mpoonya mubwamba aali 113 alimwi ujisi moombe uusumidwe mubulamfwu uusika kumasentimita aali 8.

   Ncolyaamba Bbaibbele: Mutunta wa Jesu wakazambaidwe kutali mumulembo omwe, pele milembo minji. Mutwe wakwe wakazambaidwe mumulembo nsini. Jesu naakabusyigwa, umwi wabaapostolo bakwe wakaboola kucuumbwe eelyo ‘wakabona milembo ansi.’ Bbaibbele lilayungizya kuti: “Cisani eeco icakali kumutwe wakwe tiicakali antoomwe amilembo eeyo imbi, pele cakalivwungidwe cilikke mubusena bomwe.”​—Johane 20:6, 7.

2. Mulembo ooyo ujisi mabata-bata aabulowa aayeeyelwa kuti akazwa kumutunta uutasanzyidwe.

   Ncolyaamba Bbaibbele: Jesu naakafwa, basikwiiya bakwe bakaubamba mubili wakwe “kweelana acilengwa ncobacita ba Juda nobazikka.” (Johane 19:39-42) Cilengwa eeci cakali kubikkilizya akusanzya mutunta, kuunanika mafwuta atununkilizyo kautanazikkwa. (Matayo 26:12; Milimo 9:37) Aboobo, kweelede kuti basikwiiya ba Jesu bakausanzya mubili wakwe kabatanauzambaila mumilembo.

3. Kweelana abbuku litegwa Encyclopædia Britannica, mulembo ooyu ujisi cifwanikiso camuntu “uulazikidwe mubulamfwu acisela camulembo, kumane cisela cimwi cizambailidwe kumutwe akuvwumba mubili woonse nkouli kumbele.”

   Ncolyaamba Bbaibbele: Basikwiiya ba Jesu bakabandika kujatikizya lufwu lwakwe, cuumbwe, abamakaintu ibakalibonena zyakacitika akubona ‘cilengaano cabangelo, ibakaamba kuti muumi.’ (Luka 24:15-24) Ikuti mulembo ooyu niwakaliko mucuumbwe ca Jesu, cakutadooneka nibakawaamba awalo azitondezyo zyakali alinguwo mumubandi wabo. Pele Bbaibbele kunyina ncolyaamba kujatikizya mubandi ooyo.

Sena mulembo ooyu weelede kukombwa?

Peepe. Nikwali kuti wakaliko ncobeni, ncimwi buyo, nowatali kukombwa. Amubone njiisyo zyamu Bbaibbele zipandulula ncocili boobo.

1. Taciyandiki. Jesu wakapandulula kuti: “Leza Muuya, alimwi aabo bamukomba beelede kumukomba mumuuya amukasimpe.” (Johane 4:24) Bukombi bwakasimpe tabubikkilizyi kubelesya zikozyanyo mubukombi.

2. Cilikasyidwe. Mulawo umwi akati ka Milawo Iili Kkumi ulakasya kukomba mituni. (Deuteronomo 5:6-10) Mbubwenya buyo, Bbaibbele lilailila Banakristo kuti: “Amwiitantamuke mituni.” (1 Johane 5:21) Bamwi inga baamba kuti, kulimbabo, mulembo ooyu tauli mutuni, pele ncikozyanyo ciiminina lusyomo lwabo. Nokuba boobo, cikozyanyo ciba mutuni kumuntu uucikomba.a Aboobo, muntu uuyanda kukkomanisya Leza takonzyi kukomba naa kulemeka cintu cili coonse, kubikkilizya amulembo ooyu.