SENA CAKALENGWA BUYA?
Gulu Wankumba-nkumba Iitegwa Barnacle
Basyaazibwene mulwiiyo lwabanyama bakazyiba kaindi kuti nkumba-nkumba eeyi ilakonzya kunamatila kumwala, kucikkonkili mpobainda bantu nobanjila mubwato alimwi akubwato. Gulu uupangwa ankumba-nkumba eeyi ulisumpukide kapati kwiinda yooyo uupangwa abantu. Talili kaindi basayaansi nobakatalika kumvwisya nkumba-nkumba eeyi mboicikonzya kunamatila kuzintu izili mumaanzi.
Amulange-lange: Buvwuntauzi butondezya kuti kana kankumba-nkumba nokeenda mumaanzi kalalangisisya kakatanasala mpokayanda kunamatila aayelela. Kufwumbwa buyo mbokaabona aayelela kalagusya misyobo yobilo yazintu zinamatila. Cintu cakusaanguna, mafwuta aapa kuti kutabi maanzi mpokayanda kunamatila. Kunze lyaboobo mafwuta aaya apa kuti cikonzyeke kuti cintu cabili cinamatile, calo cijisi maprotein ayiitwa kuti phosphoproteins.
Zintu zyobilo eezyi zyasangana zipanga gulu uutakonzyi kunyonyoonwa nokuba kutuzunda. Cileelela kuti gulu ooyu kauli muyumu kapati nkaambo nkumba-nkumba eeyi mpoinookkala buumi bwanjiyo boonse.
Nkumba-nkumba, atutambo twagulu
Mboupangwa gulu wankumba-nkumba eeyi kwakali kubakatazya kapati kumvwisya basayaansi. Umwi wabaabo ibakazyiba mboupangwa gulu ooyu wakaamba kuti: “Gulu ooyu ulagambya kapati mboucikonzya kunamatila kucintu icili mumaanzi.” Buvwuntauzi bulakonzya kugwasya basayaansi kupanga gulu uukonzya kubelesyegwa mumaanzi, muzintu zyamalaiti alimwi azizo zyakupanga izibikkwa mumubili wamuntu.
Ino muyeeya buti? Sena gulu wankumba-nkumba eeyi wakusanduka buya naa wakalengwa buya?