Mbolulisalazya Lukanda lwa Zenimutende Uutegwa Pilot Whale

Nkumba-nkumba alimwi azilenge zyamumaanzi zimwi zibumbilila mato nkwaali kunsi zileta buyumuyumu kuli basikweenzya. Kubumbililwa ooku kupa kuti mato kaatabaliki, kaabelesya mungwimba munji, alimwi akupa kuti kwainda buyo myaka yobilo kaatolwa kukusalazyigwa. Basayaansi batalika kwiiya kuzilenge kutegwa bajane nzila yakumana mapenzi aaya.

Amulange-lange: Basikuvwuntauzya bakajana kuti lukanda lwazenimutende uutegwa pilot whale lulakonzya kulisalazya. Lujisi tufwolo tusyoonto-syoonto twalo tupa kuti bana bankumba-nkumba kabatacikonzyi kunamatila. Tufwolo ootu tuzwide mafwuta aalwana nyanzabili alimwi atuzunda. Ciindi zenimutende nalikwama lukanda, ulazwa mafwuta aambi.

Basayaansi bayanda kujana nzila yakusalazya mato kwiinda mukubelesya nzila njabelesya zenimutende kulisalazya. Kaindi, kwakali kubelesyegwa penti iilesya kuti zyuuka kazibumbilila kubwato. Pele mapenti kanji-kanji aakali kubelesyegwa akalesyegwa akaambo kakuti akali kujaya zilenge zyamumaanzi. Nzila njibajana basikuvwuntauzya njakuvwumba bwato nkobuli kunsi ansefwa ikuli tupulo imuzwa musamu uutajayi. Musamu ooyo wasangana amaanzi aamulwizi ulaangana akuba mafwuta, alo aaba mbuli lukanda akuvwumba bwato boonse nkobuli kunsi. Mukuya kwaciindi, lukanda oolu ilujisi ntuli iisika ku 0.7 milimita lulazwa, antoomwe atuuka toonse itwajanika kuti twabumbilila. Mpoonya kupangika mafwuta aambi kutegwa avwumbe bwato.

Nobakapima bakajana kuti nzila eeyi nimbotu kapati mukulesya zyuuka kubumbilila kumato. Eeco cilagwasya kapati kumakkampani aabelesya mato nkaambo kuleta bwato kunkomwe kutegwa busalazyigwe ciladula kapati.

Ino muyeeya buti? Sena kucikonzya kulisalazya kwalukanda lwazenimutende uutegwa pilot whale kwakabako akaambo kakusanduka naa kwakalengwa buya?