Baroma 5:8—“Notwakacili Basizibi, Kristo Wakatufwida”

“Leza watutondezya luyando lwakwe mwini mukuti notwakacili basizibi, Kristo wakatufwida.”—Baroma 5:8, Bbaibbele lya Busanduluzi Bwanyika Mpya.

“Leza, walo ulatondezya luyandisyo lwakwe kulindiswe boobo, nkaambo nitwakacili basizibi Kristo wakatufwida.”—Baroma 5:8, The Bible in Tonga, Lyamu 1963.

Bupanduluzi bwa Baroma 5:8

Jehovaa Leza wakatondezya luyando lupati ciindi naakazumizya Mwanaakwe, Jesu Kristo, kuzoofwida bantu akaambo kazibi zyabo. (Johane 3:16) Mbwaanga mbasizibi, bantu balacita zintu akuyeeya munzila iiteendelani azyeelelo zya Leza ziluleme. (Bakolose 1:21, 22) Nokuba boobo, Leza wakapa kuti cikonzyeke kulindiswe kuyanzana anguwe “kwiinda mulufwu lwa Mwanaakwe.” (Baroma 5:10) Aboobo, tulijisi coolwe cakuba acilongwe ciyumu a Leza lino alimwi akuba abulangizi bwakuyoopona kukabe kutamani kumbele.—Baroma 5:11; 1 Johane 4:9, 10.

Makani aayengelede lugwalo lwa Baroma 5:8

Mwaapostolo Paulo wakalemba majwi aaya ku Banakristo baku Roma. Mucaandaano 5 calugwalo lwa Baroma, Paulo wakapandulula ikaambo Banakristo ncobakeelede kukondwa akusinizya bulangizi mbobakajisi. (Baroma 5:1, 2) Bulangizi oobu “tabusololeli kukutyompwa,” nkaambo buyeeme aaluyando lupati ndwaakatondezya Leza kwiinda muli Jesu. (Baroma 5:5, 6) Jesu wakazumanana kumvwida Leza, icintu mwaalumi wakusaanguna, Adamu ncaakalilwa kucita. (Baroma 5:19) Kutamvwida kwa Adamu kwakapa kuti bana bakwe babe basizibi alimwi akuti kabafwa. (Baroma 5:12) Mukwiimpana, kumvwida kwa Jesu alimwi acipaizyo calufwu lwakwe kwapa kuti cikonzyeke kubantu bamvwida ikuba abulangizi bwakupona kukabe kutamani.— Baroma 5:21.