Baroma 15:13—“Aboobo Leza Uupa Bulangizi Amuzuzye Kukondwa Koonse Alimwi Aluumuno”

“Aboobo Leza uupa bulangizi amuzuzye kukondwa koonse alimwi aluumuno eelyo nomumusyoma, ikutegwa mwiindile kuba abulangizi munguzu zyamuuya uusalala.”—Baroma 15:13, Bbaibbele lya Busanduluzi Bwanyika Mpya.

“Lino Leza wabulangizi amuzuzye bukondwi boonse aluumuno mukusyoma kwanu, kuti mwiinde kuba abulangizi kunguzu zya-Muuya Uusalala.”—Baroma 15:13, The Bible in Tonga Lyamu 1963.

Bupanduluzi bwa Baroma 15:13

Kwiinda mukubelesya majwi aaya, mwaapostolo Paulo wakatondezya ncaakali kulombozya kuti Leza azuzye basyominyina ‘akukondwa alimwi aluumuno.’ Bube oobu bubotu buliswaangene abulangizi mbwapa Leza alimwi anguzu zyamuuya uusalala.

Tulaiya kujatikizya bulangizi mbwapa Leza kwiinda mu Jwi lyakwe, Bbaibbele. Kweelana alugwalo lwa Baroma 15:4, “zintu zyoonse izyakalembwa kaindi [mu Bbaibbele] zyakalembelwa kutuyiisya, kutegwa kwiinda mukuliyumya kwesu alimwi akwiinda muluumbulizyo lwamu Magwalo tube abulangizi.” Bbaibbele lilayubununa cisyomezyo ca Leza cakumana mapenzi aapa bantu kutyompwa mazuba aano, mapenzi mbuli bucete, kutalulama, kuciswa alimwi alufwu. (Ciyubunuzyo 21:4) Leza uyoobelesya Jesu Kristo kuzuzikizya zisyomezyo eezyi. Nkakaambo kaako ncotukonzya kuba abulangizi bubotu bwakumbele.—Baroma 15:12.

Tulakonzya ‘kwiindila kuba’ abulangizi mbwatupa Leza lilikke buyo kuti katumusyoma. Mbotuyaabwiiya zinji kujatikizya nguwe, tuyoosinizya ncobeni kuti ulasyomeka. (Isaya 46:10; Tito 1:2) Akaambo kabulangizi bwini-bwini oobu, muntu ulakonzya kuzuzyigwa akukondwa alimwi aluumuno nociba ciindi nali mumapenzi.—Baroma 12:12.

Luumuno, lukkomano, alimwi abulangizi ziliswaangene ‘amuuya uusalala,’ nkokuti nguzu zya Leza zibeleka.a Leza uyoobelesya muuya uusalala ooyu kuzuzikizya zisyomezyo zyakwe. Ikuzyiba kaambo aaka kutupa bulangizi bwakumbele. Kuyungizya waawo, muuya ooyu ulakonzya kupa bantu kuba abube bubotu mbuli lukkomano alimwi aluumuno.—Bagalatiya 5:22.

Makani aayengelede lugwalo lwa Baroma 15:13

Bbuku lya Baroma mubwini ndugwalo ilwakalembelwa Banakristo ibakali kukkala mudolopo lya Roma. Bamwi akati ka Banakristo aaba bakali kuzwa mumikwasyi yaba Juda mpoonya bamwi tiibakali ba Juda. Paulo wakabakulwaizya boonse kuti babeleke canguzu mukukamantana mumizeezo amumicito nokuba kuti bakaliindene mbobakakomezyegwa alimwi azilengwa.—Baroma 15:6.

Paulo wakayeezya Banakristo baku Roma kuti kaindi Leza wakasinsima kujatikizya ciindi bantu bazwa mumisyobo yoonse nobayookamantana akumukomba caantoomwe. Kusinizya makani aaya, wakazubulula mu Magwalo aa Chihebrayob ziindi zyone. (Baroma 15:9-12) Kaambo nkaakali kwaamba nkakuti: Kutali buyo ba Juda, pele abantu bamumasi oonse balakonzya kugwasyigwa amulimo ngwaakacita Jesu. Nkamu zyoonse zyobilo nkokuti ba Juda abatali ba Juda balakonzya kuba abulangizi mbwapa Leza. Aboobo tacikwe makani ambobakakomezyegwa, boonse buyo mumbungano yaku Roma bakeelede “kutambulana” caluzyalo naa kusamausya.—Baroma 15:7.