Bafilipi 4:8—“Kufwumbwa Zintu Zyamasimpe, . . . Kamuzumanana Kuziyeeyesya Zintu Eezyi”

“Makani aamamanino bakwesu ngakuti, kufwumbwa zintu zyamasimpe, kufwumbwa zintu ziyandika kapati, kufwumbwa zintu ziluleme, kufwumbwa zintu zisalala, kufwumbwa zintu ziyandwa, kufwumbwa zintu zilaampuwo mbotu, kufwumbwa zintu zili kabotu, alimwi kufwumbwa zintu zyeelela kutembaulwa, kamuzumanana kuziyeeyesya zintu eezyi.”—Bafilipi 4:8, Bbaibbele lya Busanduluzi Bwanyika Mpya.

“Lino bakwesu, makani aakumamanino ngaaya. Kufumbwa zintu zisinizye, kufumbwa zintu zilemekeka, kufumbwa zintu ziluleme, kufumbwa zintu zisalala, kufumbwa zintu ziyandika, kufumbwa zintu zili ampuwo imbotu, na kuli ciyanza niciba cimwi cibotu nanka cintu niciba cimwi citembaulika, amuziyeeyesye zintu ezi.”—Bafilipi 4:8, The Bible in Tonga Lyamu 1963.

Bupanduluzi bwa Bafilipi 4:8

Leza ulabikkila kapati maano kujatikizya zintu nzyobayeeya bantu, kwaambisya akaambo kakuti nzyotuyeeya zilazijatikizya zintu nzyotucita. (Intembauzyo 19:14; Marko 7:20-23) Aboobo, bantu ibayanda kukkomanisya Leza balaikaka mizeezo iitali kabotu mumeso aakwe, muciindi caboobo bayeeya buyo zintu zimukkomanisya.

Kapango aaka kaamba zintu zibotu zili lusele zyalo Banakristo nzyobeelede “kuzumanana kuyeeyesya,” izikonzya kupa ikuba acilengwa cakuyeeya zintu zili kabotu.

• “Masimpe.” Bbala eeli lilapandulula kujatikizya zintu zibotu alimwi zisyomeka, mbuli mulumbe uujanika mu Jwi lya Leza, Bbaibbele.—1 Timoteyo 6:20.

• “Ziyandika Kapati.” Mabala aaya aamba kujatikizya makani ayandika kapati. Taambi kujatikizya zilengwa zitali kabotu, twaambo tutayi komoonga, naa tusyoonto-syoonto. Muciindi caboobo, ikuti Banakristo kabayeeya kujatikizya zintu zili boobu balakonzya kuba aamakanze mabotu aakuzumanana kucita ziluzi.—Tito 2:6-8.

• “Ziluleme.” Bbala eeli lyaamba makanze alimwi azintu nzyotucita ziluzi zyalo izyeendelana azyeelelo zya Leza ikutali kweelana azyeelelo zyabantu.—Tusimpi 3:5, 6; 14:12.

• “Zisalala.” Bbala eeli lyaamba kujatikizya kuba aamizeezo alimwi amakanze aasalala, kutali buyo mumakani aakoonana, pele muzintu zyoonse.—2 Bakorinto 11:3.

• “Ziyandwa.” Bbala eeli lyaamba zintu zibotu, zyalo zitugwasya kuba aaluyando kutali kusulaika bamwi, kunyema, naa mazwanga.—1 Petro 4:8.

• “Zilaampuwo Mbotu.” Mabala aaya aamba zintu zikonzya kupa bamwi kuyeeya mpuwo mbotu njajisi muntu alimwi akuti aabo ibalemeka Leza ulabakkomanina.—Tusimpi 22:1.

• “Zili Kabotu.” Bbala eeli lyaamba zintu zisalala caboola mumakani aakulilemeka kweelana azyeelelo zya Leza. Lyoonse nzibotu.—2 Petro 1:5, 9.

• “Kutembaulwa.” Bbala eeli lyaamba cintu cibotu, kwaambisya mumeso a Leza. Alimwi eeci cilabikkilizya akutembaula milimo ya Leza, yalo iiyandika kapati kubantu kuti kabaiyeeya.—Intembauzyo 78:4.

Makani aayengelede lugwalo lwa Bafilipi 4:8

Mwaapostolo Paulo wakalaangidwe muŋanda ku Roma ciindi naakalemba lugwalo oolu ku Banakristo baku Filipi. Nokuba boobo, basikubandika makani aamu Bbaibbele baamba lugwalo oolu kuti “ndugwalo lwalukkomano” akaambo kakuti wakabelesya majwi aakkomanisya alimwi aakulwaizya luyando.—Bafilipi 1:3, 4, 7, 8, 18; 3:1; 4:1, 4, 10.

Paulo wakali kubayanda kapati bakombinyina baku Filipi, alimwi wakali kuyanda kuti abalo kabajisi lukkomano aluumuno lwalo ndwaakajisi. (Bafilipi 2:17, 18) Nkakaambo kaako kumamanino aalugwalo lwakwe, wakabakulwaizya kuba amizeezo mibotu, kunyoneka, kupaila lyoonse kuli Leza, alimwi akubikkila maano kuzintu zikonzya kubapa kuba aluumuno lwamumizeezo alimwi akuba muluumuno a Leza.—Bafilipi 4:4-9.

Amweebelele kavidiyo aaka mubone zijatikizyidwe mubbuku lya Bafilipi.