Bakolose 3:23—“Kufwumbwa Ncomucita, Amucicite Camoyo Woonse”

“Kufwumbwa ncomucita, amucicite camoyo woonse mbuli kuti mubelekela Jehova, ikutali bantu pe.”—Bakolose 3:23, Bbaibbele lya Busanduluzi Bwanyika Mpya.

“Kufumbwa cintu ncimucita, milimo yanu ibe yamoyo woonse, ibe mbuli milimo iicitilwa Mwami, itabi yakubelekela bantu buyo pe.”—Bakolose 3:23, The Bible in Tonga Lyamu 1963.

Bupanduluzi bwa Bakolose 3:23

Munakristo weelede kusolekesya kubeleka canguzu, nkaambo mbwaubona mulimo wakwe kuliswaangene abukombi bwakwe kuli Jehova Leza.

“Kufwumbwa ncomucita.” Aabo bayanda kukomba Jehova balasolekesya kutobela ncolyaamba Bbaibbele muzintu zyoonse nzyobacita. Balasolekesya kubeleka canguzu, alimwi akusyomeka mumilimo njobacita yaaŋanda buzuba abuzuba, kube kumulimo naa kucikolo.—Tusimpi 11:13; Baroma 12:11; Bahebrayo 13:18.

“Amucicite camoyo woonse.” Mabala aakuti “camoyo woonse” aakasandululwa kuzwa mu Chigiriki “atondezya muntu mbwabikkila maano kubeleka naa kuzuzikizya kuyanda kwa Leza anguzu zyakwe zyoonse.”a

Aboobo, mubelesi uuli boobu ubelesya nguzu alimwi amaano aakwe oonse kutegwa acite kabotu ciindi nabeleka mulimo wakwe. Busanduluzi bumwi bwa Bbaibbele bwaamba mabala aaya kuti “amoyo woonse uumaninide” (BT).

“Mbuli kuti mubelekela Jehova, ikutali bantu pe.” Kufwumbwa mulimo ngobacita, Banakristo balaubikkila maano nkaambo balizyi kuti cilongwe cabo aa Jehova Leza cilijatikizyidwe. Babikkila kapati maano kukkomanisya Jehova, kutali basikubanjizya mulimo naa muntu uumbi buyo. Ciindi Munakristo nabeleka canguzu alimwi bube bwakwe kabuli bubotu, bantu banoomuyeeyela zintu zili kabotu walo kubikkilizya a Leza ngwakomba. Munzila eeyi, Munakristo ulacita ncakonzya ‘kutegwa zina lya Leza . . . litasampaulwi.’—1 Timoteyo 6:1; Bakolose 3:22.

Makani aayengelede lugwalo lwa Bakolose 3:23

Bbuku lyamu Bbaibbele lya Bakolose lyakalembwa amwaapostolo Paulo ku Banakristo baku Kolose lyansiku.b Kulibonya kuti wakalilemba naakali aafwaafwi akwaangununwa ciindi cakusaanguna naakaangidwe ku Roma, cakuma 60-61 C.E.

Lugwalo lwa Bakolose lujisi lulayo lukonzya kugwasya Banakristo boonse ibazwa mubukkale bwiindene-indene kutegwa kabakomba Leza calukamantano. (Bakolose 3:11) Lubakulwaizya kwiiya bube bwa Leza, mbuli luyando, luzyalo alimwi akweengelelana. (Bakolose 3:12-14) Alimwi lilaamba bukombi bwesu kuli Leza mbobukonzya kutujatikizya mubuumi.—Bakolose 3:18–4:1.

Busanduluzi Bumwi bwa Lugwalo lwa Bakolose 3:23

“Kufwumbwa cintu ncomucita, amubeleke amoyo woonse uumaninide, mbuli kuti mubelekela Mwami lwakwe, kutali bantu buyo.”—BT.

Amweebelele kavidiyo aaka mubone zijatikizyidwe mubbuku lya Bakolose.